Iruka 4

Haga 4

Ahiag Tihãꞌãg Kahato Iesui

Mateu 4.1-11; Maku 1.12-13 Piat Ewy

1Tosetꞌok kahu raꞌyn hawyi Iesui howopy kahato raꞌyn Tupana Paꞌãu wakuat wo hawyi taꞌaipok iraꞌyn Iutãu hy kaipyi hawyi Tupana Paꞌãu tioto raꞌyn yahig wato kape 2Itote tuwemosyꞌat 40 eꞌat yt kat i tutuꞌu. Miꞌi turan ahiag hãꞌãg kahato itote. Miꞌi hawyi 40 eꞌat turan tuwesyꞌat hawyi hesyꞌat kahato raꞌyn. 3Miꞌi turan ahiag toꞌe -Pywo En Tupana saꞌyru pote etunug no meikowat nu kawiat man emiꞌu wo. 4Maꞌato Iesui tiwesat -Mio tã e ti miwan me Teturonamia 8.3 me --Yt miꞌu kaipyi yn i rat miitꞌin tukupteꞌen kuap e. 5Mio tã e hawyi ahiag tioto raꞌyn Iesui yityꞌok ywaiti rakat kape. Itote pyi toimoherep yne mesuwarotiat tekat koꞌi. 6Itote ahiag toꞌe Iesui pe -Pyno mesuwat yne uhekareꞌen wyti atum neran uwe pe uimikyꞌesat ewy. Maꞌato atum neran epe uimotypot hatno ereineꞌen pote. 7Miꞌi tupono erepỹꞌãtutuk uimotypot hamo miꞌi pote atum yne raꞌyn ewatno e. 8Maꞌato Iesui tiwesat mio tã e miwan me -Waku etimotypot e Tupana yn e. Waku miꞌi yn toineꞌen emimotypotno iraniaꞌin kai e Teturonamia 6.13 miwan me. 9Miꞌi hawyi ahiag tioto Iesui Ierusarẽi kape. Itote pyi totioto Tupana motypot yat poꞌog ywaiti rakat kape. Itote mio tã e -Pywuat En Tupana saꞌyru pote eꞌoghytꞌat ro meiũpe pyi yi kape e. 10Katupono saꞌawyꞌi wuat miwan me mio tã e -Tupana tipoꞌoro wyti aru temiitꞌin iꞌapykok hamo e Tawi wepy 91.11 pe. 11Miꞌiria ti aru eꞌokhytsat taꞌatupo pe. Meimewat nu etiat ewaꞌahyk tet pupi e. 12Mio tã e pote Iesui tiwesat -Maꞌato saꞌawyꞌi wuat miwan me mio tã e --Yt ehãꞌãg neiꞌo eTupana e. Teturonamia 6.16 pe. 13Karãpe ahiag hãꞌãg kahu raꞌyn Iesui kat e hap kat e hap ete hawyi toto porapꞌi iraꞌyn.

Mateu 4.12; Maku 1.14 Piat Ewy

14Miꞌi hawyi Iesui taꞌaipok i raꞌyn mekewat yi Karireia kape. Miꞌi turan Tupana Paꞌãu toineꞌen kahato iwywo. Miꞌi hap koꞌi wuatꞌi puo mekewat yi wato oktan taꞌatukuap taꞌyn Iesui etiat. 15Miꞌi hawyi toiꞌatumuꞌe kahato raꞌyn mekewat woꞌomuꞌe koro hap yat pe. Miꞌi turan yne miitꞌin mimotypotno kahato toineꞌen. 16Miꞌi hawyi toto iraꞌyn tawa Nasare kape aiũpe saꞌawyꞌi tuwemotag hap kape. Itote teke raꞌyn Tupana motypot hap eꞌat pe mekewat woꞌomuꞌe koro hap yat pe. Aikotã taꞌatueko ewy. Itote ipoĩꞌam Tupana ehay mowẽpap hamo. 17Itote taꞌatuium mekewat Isaia miwan. Miꞌi toiꞌapypok imowẽpap hamo. Itote toipuẽti mio tã e miwan miat hap. 18Miꞌi ti toimowẽpap mio tã e hap -Uipotypot wyti hum topaꞌãu uhepe miꞌi ti uiꞌairo tehay wakuat enoi ihakyꞌeꞌi rakaria piat hamo. Iꞌewyte uipoꞌoro tehay enoi mipyhik koꞌi piat hamo. Iꞌewyte yt ihapytig i rakaria piat henoi hamo. Iꞌewyte mekewat miitꞌin mimohit koꞌi ehehakyeraꞌat hamo e. 19Heꞌat putꞌok e raꞌyn aipotypot tiꞌatuehakyeraꞌat raꞌyn temiitꞌin hap eꞌat. Miꞌi hap etiat toimowẽpap Isaia miwan kaipyi. 20Miꞌi hawyi Iesui timowẽpap kahu raꞌyn popera hawyi toiꞌapyhik taꞌyn hawyi tutum naꞌyn mekewat woꞌomuꞌe yat piat woꞌopowyro hat pe hawyi taꞌapyk taꞌyn. Miꞌi turan torannia miitꞌin itotiaria teꞌerehaꞌat Iesui kape yt teꞌerehapo ywyk hin i. 21Miꞌi hawyi Iesui ihay raꞌyn itote mio tã e -Mesup taꞌyn mekewat miwan miat e hap ewy heꞌat putꞌok e raꞌyn aikotã ehewaure piat emikuap ewy. 22Miꞌi hawyi torannia Iesui ehay ikuap hawyi teꞌeruwanetup kahato ihay hãpyk kahato hap kape. Hawyi teꞌeroꞌe Kat poteĩ ihay hãpyk kahato iꞌatuꞌe. Meiẽ apo yt Iuse saꞌyru hin i iꞌatuꞌe. 23Miꞌi hawyi Iesui toꞌe i iꞌatuepe -Taꞌi atikuap wyti eweiꞌe uhepiat hap -Mohag nug hat pote ewewi eremoehãite kuap eweiꞌe iꞌewyte eweiꞌe waku etunug mesuwe etawa pe aikotã emienoi uruepiat tawa Kawanaum piat eminug ewy eweiꞌe. 24Miꞌi hawyi poꞌog toꞌe i -Atikuap wyti eiperia yt wẽtup ok i Tupana ehay enoi haria kyꞌe haria mesuwe ehetama pe.

25Pyno eweikuap to saꞌawyꞌi iꞌatu kahato hiwuria tukupteꞌen Isareu pe mekewat Tupana ehay moherep hat Eria eꞌat piat hap. Miꞌi hap eꞌat pe yt iꞌaman hin i myẽꞌym anu patꞌok turan syꞌat iwato kahato toineꞌen mekewat yi tote. 26Maꞌato mekewat eꞌat pe Tupana yt tipoꞌoro hin i Eria hiwuria ieineꞌen hap Isareu piaria kape. Maꞌato toipoꞌoro aiũpe wẽtup ok hiwu toineꞌen mekewat tama Serepa e hap mekewat yi Sitau totiat kape yn. Sakaria tote iꞌatu rakaria Isareu etama pe wen maꞌato Tupana tipoꞌoro raꞌyn Eria wẽtup ywania kape yi Serepa ywania etawa kape yi Sitau kape wẽtup ok hiwu powyro hamo. 27Iꞌewyte tukupteꞌen kahato hepihi pihi rakaria Isareu pe mekewat Tupana ehay moherep hat Eria eꞌat pe. Maꞌato mekewat eꞌat pe yt wẽtup ok i toiꞌatumoehãite maꞌato mekewat Naꞌama e hap tama Siria piat yn toimoehãite. 28Mio tã e hap taꞌatukuap hawyi torannia mekewat woꞌomuꞌe yat koro piaria iꞌatupyꞌahak kahato raꞌyn. 29Miꞌi hawyi iꞌatupoĩꞌam naꞌyn Iesui porenotem tawa pywiat hamo hawyi taꞌatuereto raꞌyn yityꞌok ywaiti rakat totiat tawa koꞌi kape. Itote pywiat iꞌokhytpun hamo. 30Maꞌato itote pyi Iesui tuwemorem hawyi tuweityk taꞌyn iꞌatupyꞌasetpyi hawyi toto raꞌyn.

Maku 1.21-28 Piat Ewy

31Itote pyi Iesui toto raꞌyn Kawanaum kape mekewat yi Karireia yat kape. Itote toiꞌatumuꞌe kahato Tupana motypot hap eꞌat pe. 32Miꞌi hawyi teꞌeruwanetup kahato ihay se kahato topotmuꞌe hap ete. Ihay wyti aikotã morekuat ehay ewy. 33Miꞌi turan wẽtup ok miit toineꞌen iꞌatuwoꞌomuꞌe hap yat pe ahiag ipiit piat rakat. Miꞌi ti ihay pirik itote. 34-Kan etikyꞌesat urukaipyi Iesui tawa Nasare piat e. Eriot apo meikowo uruꞌatuuka hamo. Taꞌi atikuap kahato ti uwe en hap. Taꞌi en wyti wakuat kahato Tupana mipoꞌoro e. 35Miꞌi hawyi Iesui toꞌe maꞌãu saꞌag me -Epoꞌinik to erẽtem no meiẽwat miit piit pyi. Mio tã e hawyi torannia miitꞌin ehamo ahiag tipun naꞌyn miit yi tote hawyi tuwẽtem naꞌyn miit piit pyi turan yt kat i hin i ihig hap ipiit ete. 36Miꞌi hawyi torannia miitꞌin teꞌeruwanetup kahato raꞌyn hawyi -Kat poteĩ meketã iꞌatuꞌe. Uwe ehay pyi som tutunug meketã. Taꞌi meiẽwat miit wyti aikotã morekuat ewy esaika kahato. Miꞌi pote ti toiporenotem kuap kahato maꞌãu saꞌag koꞌi iꞌatuꞌe. Miꞌi hawyi tuwat iraꞌyn itote pyi. 37Miꞌi hawyi Iesui minug koꞌi etiat taꞌatuhenoi henoi raꞌyn wuatꞌi puo mekewat yi wato hap oktan.

Yne Iesui Minug Hap Koꞌi Iraniaꞌin Taꞌatukuap Taꞌyn

Mateu 8.14-17; Maku 1.29-34 Piat Ewy

38Miꞌi hawyi Iesui tuwẽtem iraꞌyn woꞌomuꞌe hap yat pyi hawyi itote pyi toto raꞌyn Simau yat kape. Miꞌi turan Simau sakitu iꞌahuu kahato ipiit sakup kahato. Miꞌi hap taꞌatuhenoi Iesui pe. 39Miꞌi hawyi toto raꞌyn hewowi hawyi toineꞌen mekewat heꞌyni ywyt pe. Itote pyi toꞌe ahuu kape hawyi meremo ahuu tokosap taꞌyn ipiit pyi hawyi meremo ipoĩꞌam iraꞌyn hawyi toterepat raꞌyn Iesui.

Iesui Tiꞌatumoehãite Iꞌatu Rakaria

Mateu 4.23-25; Maku 1.32-39 Piat Ewy

40Mekewat ewãtym muo wyti taꞌatuwyriaꞌin ipy kĩꞌã rakaria iꞌewyte aikotã aikotã iꞌahuu rakaria taꞌatuerepoꞌok kahato Iesui kape hawyi Iesui tuwepo nug yne iꞌatuete hawyi toiꞌatumoehãite yne raꞌyn. 41Miꞌi hawyi maꞌãu saꞌag koꞌi tuwenoꞌẽ kahato raꞌyn miitꞌin piit pyi. Miꞌi turan iꞌatuehay pirik kahato -En wyti Tupana saꞌyru iꞌatuꞌe. Taꞌatukuap wyti Iesui Tupana mipoꞌoro woꞌehakyeraꞌat hat. Mio tã iꞌatuꞌe pote Iesui -Eipoꞌinik to e iꞌatuepe.

Maku 1.35-39 Piat Ewy

42Hunete Iesui tuwẽtem naꞌyn tawa pyi hawyi toto raꞌyn yahig wato kape aikope yt uwe i miit hap kape. Hãipe kai miitꞌin tikat raꞌyn. Miꞌi hawyi taꞌatupuẽti raꞌyn hawyi yt taꞌatukyꞌesat i raꞌyn toto itote pywiat hap. 43Maꞌato Iesui toꞌe iꞌatuepe -Taꞌi atikyꞌesat ahenoi wakuat Tupana ieineꞌen hap etiat iraniaꞌin tawa koꞌi puo wy e. Katupono miꞌi nug hamo Tupana uipoꞌoro e. 44-Miꞌi tupono ti tohenoi kahato raꞌyn Tupana ehay woꞌomuꞌe hap koro yat pe torannia yi Karireia piaria pe.

Currently Selected:

Iruka 4: mav

Highlight

Copy