2 Tesaronika 3
3
Haga Myẽꞌym 3
1Uruwyriaꞌin miꞌi tupono waku ewehẽtup Tupana kape urupowyro ihay sytpok merepꞌe ran hamuat hap aikotã waku hamuat hap aikotã eiꞌewywuat miitꞌin ewaku kahato hamuat hap waku ewehẽtup. 2Ewehẽtup o yt nakuaria i po pywiat hesoꞌok takaria po pywiat Tupana piat uruehakyeraꞌat hamuat hap. Katupono yt imohey yne i haria tukupteꞌen mesuwat yi tote. 3Aikaꞌiwat wyti temiit yt atoiat hat i toineꞌen maꞌato aimoesaika kahato hatno toineꞌen Aikaꞌiwat. Aikawiatno kahato ti ahiagnia akag mupi. 4Koitywy eipe uruiꞌatumohey kahato Aikaꞌiwat mohey kahato rakaria eipe pote. Tohenoi raꞌyn uruepe imohey ehepiat hap. Miꞌi pote uruiꞌatumohey kahato eipe urumienoi nug yne mukiꞌite mesup hamuat hap katupono uruhẽtup kahato ehupi. 5-Urukaꞌiwat urutoꞌe etiꞌatumoherep tawa Tesaronika piaria pe aikotã aikotã etiꞌatukyꞌe kahato hap uruikyꞌesat. Taꞌatukuap taꞌatupyꞌa pe epiat taꞌatukyꞌe hap aikotã Esaꞌyru urukaꞌiwat iperupꞌi kahato tepiat hoꞌopot hap koꞌi ete. Motꞌi kahato hap ewy etiꞌatumoesaika iꞌatuwanetup hawe iꞌatupiit pe urutoꞌe.
Iperupꞌi Rakaria Etiat
6Uruwyriaꞌin tukupteꞌen aipyꞌasetpe iperup kahato rakaria -Uito ti Iesui mohey hat e haria pykai. Miꞌiria ti yt ipotpap teran i rakaria wo gupteꞌen haria. Miꞌiria ti tukupteꞌen eipyꞌasetpe -Yt atunug neran Pauru mienoi e haria. Miꞌi haria o yt ewetunug neiꞌo eiwy wo. 7Eweikuap taꞌyn ipotpap takaria wo urukupteꞌen hap miꞌi tupono waku ewehãꞌãg uruꞌewywuat hap urutoꞌe. Pyno uruiãꞌãkap wo eweikupteꞌen itote urusaipepiatno urueiam mo uruꞌewywuat hewyry rakaria wo eweikupteꞌen. 8Yt uwe yat upi i uruesyꞌat urutoꞌe putꞌok urutoꞌe turan katupono uruewyry hap upi taꞌi urumisaꞌup nug kaipyi yn urutenuk. Taꞌi motpap urutunug uruepiat turan urusero kahato wãtym muo ihatꞌok puo. Miꞌi kaipyi ti uruipuẽti urumiꞌu saꞌup koꞌi iꞌewyte uruesokpe uruekareꞌen saꞌup koꞌi urutoꞌe. Yt uruikyꞌesat hin i urutuweteweru ehepiat hap. 9Iꞌewyte eimuꞌe saꞌup yt uruhekatup hin i eikaipyi. Uruhẽtup teran pote uruhẽtup kuap maꞌato yt urutunug i miꞌi tã. Waku eweikupteꞌen ipotpap kahato rakaria wo uruꞌewy. 10Katupono urutukupteꞌen eipyꞌasetpiat turan mio tã urutoꞌe yt ipotpap teran i rakat pe. Pyno yt naku i miꞌi hat pe wahoꞌoium imiꞌu wo urutoꞌe. Waku meruwuaria hesyꞌat rakaria wo teꞌeropyhuꞌat urutoꞌe.
11Maꞌato tukupteꞌen Iesui mohey haria eipyꞌasetpiaria yt ipotpap takaria i yt woꞌopowyro teran i haria. Pyno miꞌi haria pe waku waĩ watoꞌe. Iꞌewyte woꞌoeremopusu hap ete yn iꞌatupotpap taꞌatuewyry hap upi taꞌatunug. Miꞌiria pe waku waĩ watoꞌe. 12Miꞌi tupono waku waĩ watoꞌe iperup takaria pe. Aikaꞌiwat Aipotypot Iesui yt tikyꞌesat i sẽtup i sẽtup i e haria wo watoineꞌen hap waku watoꞌe miꞌi hat pe. Iesui tikyꞌesat watoiat mekewat aipotꞌeremopusu hap hawyi waku aiwepotpap aimosakup i hap aiwemosero hap kaipyi yn waku aimiꞌu ahekat toineꞌen waku watoꞌe aiwoꞌope. 13Uruwyriaꞌin yt naku i kahato aipohep ahero pykai yt naku i aipohep wakuap nug hap ete pyi.
14Iꞌewyte toineꞌen mote wẽtup ok eipyꞌasetpe -Yt atikyꞌesat i Pauruꞌin piat uinapin hap e hat waku yt eiwehik teiꞌo miꞌi tã hat ete. Miꞌi tã watunug hawyi mono teꞌeruwemoti raꞌyn hawyi tuwat urumienoi kape i raꞌyn toꞌe haype. 15Maꞌato yt naku i eweiꞌe -Koitywy en uhewanikap taꞌyn yt naku i mio tã eweiꞌe miꞌi miit pe maꞌato waku eweinapin perupꞌi popuo aikotã aheywyt aheinyt napin hap ewy. 16Aiwoꞌomowese hap nug hat sese ti Aipotypot. Miꞌi pe uruhẽtup kahato -Etum o aiwyriaꞌin tawa Tesaronika piaria pe toꞌowese wuatꞌi eꞌat piat hamuat hap urutoꞌe. Karãpe iꞌatusatek turan etum o iꞌatumowepiit hap iꞌewyte iꞌatuehãite hap. Ereineꞌen wuatꞌi eꞌat pe iꞌatupyꞌasetpe urutoꞌe uruhẽtup Tupana pe ehupi uruwyriaꞌin. 17Pyno mesup kurin atiwan uiwewi uipo wuat mesuwat Pauru piat mienoi sese moherep hamo. Pywuat uiat yne uimienoi sehay toineꞌen mesuwe hap kuap hamo uhet Pauru e hap atiwan. 18-Uikaꞌiwat Uipotypot Iesui etiꞌatukyꞌe teꞌen neꞌi o aiwyriaꞌin tawa Tesaronika piaria areꞌe yn ahẽtup yn ehupi Aikaꞌiwat pe.
Currently Selected:
2 Tesaronika 3: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
