1 Timoteu 1
1
Haga Wẽtup 1
1Timoteu koitywy atipoꞌoro uimiwan ewowi. Uito ti Pauru mekewat Aipotypot Iesui ehay moherep hat. Uito ti Ahehakyeraꞌat hat Tupana potpoꞌoro paĩ. Aimiekatup Iesui potpoꞌoro uito paĩ. 2Timoteu uhaꞌyru sese ewy kahato ereineꞌen katupono saꞌawyꞌi ereineꞌen Iesui mohey hatno uimienoi kaipyi pote are. Miꞌi tupono ahẽtup kahato Tupana pe eupi -Uiꞌywot erahaꞌat Timoteu kape ihakyꞌeꞌi hap wywo are. Etum o tope yt kat saꞌup i egyiꞌat hap. Iwanetup hap wẽtup yn etum iwepiit hamuat are Tupana pe eupi.
Timoteu Tawa Ewesu Pe Turan Toipuẽti Sehay Yt Hãpyk I Rakat
3Pyno mesup ahẽtup i raꞌyn eupi Timoteu tawa Ewesu piat ereineꞌen hamuat. Aikotã saꞌawyꞌi ahẽtup ewowi karãpe areto yi Masetunia kapiat turan -Ereineꞌen no tawa Ewesu tote mekewat itotiaria sehay yt pywo rakat i enoi haria ewaĩ hamo. 4Atikuap koitywy tukupteꞌen itote Iesui mohey haria sehay potꞌi enoi haria kat ywania kat ywania kat set kat set koꞌi enoi haria. Miꞌiria pe waku waĩꞌere -Wẽtup sehay upi neꞌi pote ti aru yt karãpe i Tupana mikyꞌesat nug hamo eweikupteꞌen katupono Iesui mohey kahato hap yn Tupana mikyꞌesat ewy. 5Yt naku i ti watuꞌuka sehay potꞌi ete ereꞌe o itotiaria pe katupono Tupana tikyꞌesat aiwoꞌowese ahehay wuat hap ereꞌe o iꞌatuepe. Wẽtup wanetup hap wywo yn waku watoꞌokyꞌe ereꞌe o. Yt iꞌatuekat kyewi i ti watopotkyꞌe ereꞌe o. Waku watoꞌokyꞌe wẽtup sok yn aito Iesui mohey haria aito pote. 6Yt kan hamo i sehay wo watuꞌuka. Maꞌato mio tã watuꞌuka hap watunug mote aiwoꞌowese hap moma hamuat hap topyhuꞌat. Miꞌi pote waku ehenoi itotiaria pe -Yt eiwuꞌuka teiꞌo sehay wo ere. Miꞌi tã ewetunug mote yt kat i aiwoꞌowese hap toineꞌen meiũpe. Waku poꞌog watunug aiwoꞌowese hap miꞌi hawyi aiwanetup hap ikahu kahato rakat topyhuꞌat waku ere. Iꞌewyte Iesui mohey haria sese watopyhuꞌat waku ereꞌe o itotiaria pe Timoteu. 7Iraniaꞌin ikyꞌesat kahato miitꞌin muꞌe hamo Tupana mienoi Muisei piat hap maꞌato yt taꞌatukuap i kat e kat e hap pykai i. -Waku uruto yn eiꞌatumuꞌe hanuaria wo iꞌatuꞌe taꞌatuehay pirik wo yt taꞌatukuap i taꞌatuꞌe hap koꞌi pykai.
Waku Saꞌawyꞌi Wuat Iꞌatunapin Hap Kape Teꞌeruweꞌaipok
8Tupana piat ainapin saꞌawyꞌi wuat hap waku kahato watiꞌatumuꞌe. Hãpyk kahato watiꞌatumuꞌe pote ti aipowyro kahato wakuap nug hamo. 9Wakuap nug haria tikyꞌesat kahato Tupana piat tonapin hap. Maꞌato iraniaꞌin saꞌag kyꞌesat hap nug haria yt ikyꞌesat hin i Tupana ehay wuat kat pote yt nakuaria i pote he kahato iꞌatuepe iꞌatuminug saꞌag koꞌi. Maꞌato ti miꞌiria pe Tupana tum iꞌatuewaĩ e hamuat. Maꞌato waku hap nug haria yt kat i raꞌyn Tupana miium waĩꞌe hap kat pote toikyꞌesat wakuap nug hap yn pote. Yt woꞌoꞌewaĩ kuap i haria napin hamo Tupana tum waĩ toꞌe hap. Morekuaria woꞌonapin hap pun haria napin hamo tutum waĩ toꞌe hap. Mekewat yt kat i Tupana e haria napin hamo tutum waĩ toꞌe hap. Yt naku i nug haria piatnuat tutum waĩ toꞌe hap iꞌewyte yt karãpe i Tupana kapiat wanetup teran haria tutum waĩ toꞌe hap. Toꞌywot toty auka haria woꞌopotꞌauka hat napin hamuat tutum waĩ toꞌe hap. 10Wuatꞌi haryporia wywuat wuatꞌi ihainia wywuat ieineꞌen haria napin hamuat tutum waĩ toꞌe hap. Iꞌewyte woꞌopiat woꞌopytyk piat ewaĩ hamuat ihainia toꞌope iꞌewyte haryporia toꞌope miꞌi e haria ewaĩ hanuat. Iꞌewyte miitꞌin eroꞌok haria piatnuat heso rakaria napin hanuat tutum. Woꞌokuasa i kuasa i haria napin hanuat tutum waĩ toꞌe hap. Toĩ poꞌog meimewat kai saꞌag nug hap koꞌi. Yt ahenoi kuap yne i. Miꞌi tupono miꞌi hap nug haria waĩꞌe hamo Tupana tum naꞌyn iꞌatunapin hap hãpyk kahato rakat. 11Tupana ewaku hap ewywuat yt kat i miꞌi rẽ watipuẽti. Yt uwe i ikahu hap ewy topyhuꞌat iꞌewyte yt kat i ikahu iwat ihay ewywuat. Miꞌi e hap yn ahytpok wuatꞌi puo. Iꞌe uhepiat hap yn ahenoi miitꞌin me paĩ.
12Pyno uiwepiit kahato arehum kahato Aikaꞌiwat Iesui ete Wuatꞌi Porekuat ete katupono Miꞌi hum tesaika hap uhepe tehay moherep hamuat. Arehum kahato tuwete katupono uiꞌairo teꞌeropat hat miitꞌin muꞌe hamuat. 13Saꞌawyꞌi te yt atimohey i te turan ateremopusu kahato Iesui. Atiꞌatusatyꞌi satyꞌi kahato hemiitꞌin. Miꞌi turan ne uhehay saꞌag Iesui ete. Yt imohey i hap kaipyi areineꞌen saꞌag Iesui ete. Yt uiweꞌeg hin i haype maꞌato miꞌi pykai uikyꞌe hap wywo ihaꞌat uhowowi. Yt atikuap i kahato atunug saꞌag mekewat eꞌat piat. 14Sakpoꞌe hegyiꞌat kahato rat uhepe paĩ Uikaꞌiwat uheineꞌen ne wanikap nuat turan. Miꞌi hawyi tutum tomohey hamuat hap uhepe. Koitywy iwywo wẽtup piit hap ewy yn naꞌyn urutukupteꞌen. 15Timoteu ahenoi teran epe sehay pywuat sese rakat sakpo aimimohey wuat. Mio tã are Aikaꞌiwat Iesui tuwemoherep mesuwe yi tote yt nakuaria i atuehakyeraꞌat hamo tuwemoherep. Miꞌi atikuap kahato katupono uito poꞌog yt nakuat i wuatꞌi kawiat paĩ are. 16Maꞌato miꞌi pykai Tupana uikyꞌe kahato yt kat i uhewaku hap upi. Tuwekaipywiat tegyiꞌat hap moherep hamo uhehakyeraꞌat. Koitywy ti iraniaꞌin uiꞌewywuaria saꞌag nug haria tikuap taꞌyn Tupana tiꞌatuehakyeraꞌat kuap torannia yt naku i nug haria hap. Miꞌi tupono ti aru wuatꞌi miitꞌin saꞌag nug haria -Pyno uito uhehakyeraꞌat kuap wy iꞌatuꞌe. Uhehakyeraꞌat Tupana piat hap atikuap taꞌyn iꞌatuꞌe irane. 17Uruꞌywot Tupana uruimotypot aat kaꞌap En iꞌatuꞌe. Urupotypot koro wuatꞌi eꞌat piat En iꞌatuꞌe Tupana piat uhehakyeraꞌat hap upi. Yt karãpiat i weityk hat En iꞌatuꞌe. Miitꞌin yt teꞌeraꞌakasa kuap i ewowi rakat En. Wẽtup Tupana yn ereineꞌen. Miꞌi rẽ yt kat i hin i Tupana toineꞌen iꞌatuꞌe hap upi. Miꞌi urumimotypot kahato En. Wuatꞌi kawiat poꞌog ikahu rakat En. Iꞌewyte wuatꞌi eꞌat piat ieineꞌen hat En paĩ iꞌatuꞌe taꞌatukuap Tupana piat uhehakyeraꞌat hap hawyi.
18Uhaꞌyru sese ewy kahato ereineꞌen Timoteu. Miꞌi tupono woronapin neran. Saꞌawyꞌi Tupana eꞌairo kahato Iesui mohey haria wẽ pyi. Itote toꞌe epe -En ni uimipoꞌoro uhehay moherep hanuat e Tupana Paꞌãu epe itote. Miꞌi hap o yt etiwaure teiꞌo. Waku etopytyk miꞌi e hap aikotã surara po pe moryꞌa wato hap ewywuat wanikap wywo wuꞌuka hamuat. Miꞌi e hap wywo o waku etuꞌuka ahiag e hap auka hamo woronapin uhaꞌyru. 19Uhaꞌyru atimoheg kahato o epiat Iesui mohey hap aikotã enapin hap kape erewanetup kahato. Miꞌi hawyi etunug ewanetup hap kaipyi wakuap erenapin hap oktan katupono tukupteꞌen epyꞌasetpe yt naku i nug haria. Saꞌawyꞌi miꞌiria Iesui mohey haria tukupteꞌen maꞌato taꞌatupun naꞌyn Iesui mohey hap taꞌatukawiat. Miꞌiria ti tukupteꞌen hoꞌowasat rakaria ewywuaria aikotã aheꞌyara apyꞌat hap yt watipuẽti i raꞌyn hap ewywuaria miꞌiria tukupteꞌen yt kat i poꞌog Iesui mohey hap mio iꞌatukai. 20Typy ok ti miꞌi haria set mehin Imeneu hawyi Arisãtere. Saꞌawyꞌi Iesui mohey haria tukupteꞌen miꞌiria maꞌato koitywy Tupana moweukaꞌi hanuaria wo raꞌyn tukupteꞌen -Pyno koitywy eipe ahiag eiporekuat no raꞌyn Satanai watnuaria eipe are iꞌatuepe.
Currently Selected:
1 Timoteu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
