Matiu 7

Tising abaotem jajem nara man

(Luk 6:37-38, 41-42)

1An Jisas hemi sei moa, “Yufala mas no jajem nara man, nogud bae God hemi jajem yufala tu, 2bikos#Mak 4:24. wei wea yufala jajem nara man, bae God hemi jajem yufala long hem tu ya. An watkaen lo yufala yusim fo jajem nara man, bae God hemi yusim diswan tu fo jajem yufala long hem.

3“?Waswe nao yu lukim wanfala smol pisgraon wea hemi stap long ae blong brata blong yu, bat yu ya, yu nating filim nomoa bikfala pisgraon wea hemi stap long ae blong yu seleva? 4An hao nao yu save talem olsem long brata blong yu, ‘Ei, letem mi tekemaot disfala smol pisgraon from ae blong yu ya.’ Bat yu ya, disfala bikfala pisgraon nao hemi stap long ae blong yu seleva. 5!Yu man fo laea tumas ya! Yu mas aotem bikfala pisgraon ya from ae blong yu seleva fastaem. An bihaen, bae yu save lukluk gud nao, an yu save aotem moa smolfala pisgraon ya wea hemi kasem ae blong brata blong yu.

6“Yufala mas no tekem olketa samting wea hemi tambu an givim go long olketa dog nomoa, bikos bae olketa tane kam long yufala an spoelem yufala. An yufala no torowem enisamting wea hemi gudfala tumas long olketa pikpik, bikos bae olketa step antap long olketa samting ya nomoa.”

Tising abaotem prea

(Luk 11:9-13)

7Nao Jisas hemi sei moa, “Yufala mas askem God fo olketa samting, an bae hemi givim long yufala. An yufala mas kam long God fo lukaotem olketa samting, an bae yufala save faendem. An yufala mas kam noknok long doa blong God, an bae hemi openem fo yufala. 8Bikos eniwan hu hemi askem God fo enisamting, bae God hemi givim long hem, an eniwan hu hemi kam long God fo lukaotem enisamting, bae hemi save faendem, an eniwan hu hemi noknok long doa blong God, bae God hemi openem doa fo hem.

9“?Waswe, sapos san blong yu hemi askem yu fo bred, bae yu givim hem wanfala ston nomoa? 10?O sapos hemi askem yu fo fis, bae yu givim hem wanfala snek nomoa? 11Nomata yufala nogud olsem wanem, yufala save givim olketa gudfala samting long olketa pikinini blong yufala. So Dadi blong yufala long heven wea hemi gud tumas winim evriwan, bae hemi givim plande gudfala samting long eniwan hu hemi askem hem.

12“Wanem#Luk 6:31. yufala laekem olketa nara pipol fo duim long yufala, hem tu yufala mas duim long olketa. Diswan nao hemi mining blong Lo blong Mosis an tising blong olketa profet.

Tising abaotem rod blong tru laef

(Luk 13:24)

13“Yufala mas go insaet long disfala smolfala geit, bikos geit wea hemi bikfala tumas an rod wea hemi isi tumas fo go long hem, hem nao hemi go kasem long hel an plande pipol nao olketa go-go falom. 14Bat geit wea hemi smolfala nomoa an rod wea hemi had fo go long hem, hem nao hemi go kasem tru laef an hemi no plande pipol nao wea olketa faendem.”

Tising abaotem olketa laea profet

(Luk 6:43-44; 13:25-27)

15An Jisas hemi sei moa, “Yufala mas lukaot long olketa laea profet. Long aotsaet, olketa luk olsem gudfala sipsip, bat long insaet long tingting blong olketa, olketa barava olsem wael dog nomoa. 16Bat bae yufala save luksave long olketa ya, long olketa samting wea olketa duim. Bikos yumi no save faendem frut blong grep tri#7:16 “grep tri” “fig tri” Lukim long diksonari. o frut blong fig tri long olketa ravis tri olobaot. 17Gudfala tri hemi garem gudfala frut ya, bat ravis tri hemi garem ravis frut nomoa. 18Gudfala tri hemi no save garem ravis frut, an ravis tri hemi no save garem gudfala frut. 19An#Matiu 3:10; Luk 3:9. evri tri wea hemi no garem gudfala frut, olketa mas katemdaon an torowem go insaet long faea. 20So#Matiu 12:33. hem nao ya, bae yufala luksave long olketa laea profet ya long wanem olketa duim.

21“Olketa hu i sei long mi, ‘Yu Masta blong mi’, bae i no evriwan long olketa nao wea olketa save go insaet long kingdom long Heven. Bat man hu hemi duim wanem Dadi blong mi long heven hemi laekem, hem nao bae hemi save go insaet long laef ya. 22An long Lasde, plande pipol bae olketa sei long mi, ‘Oo Masta, mifala bin talemaot toktok blong God long nem blong yu. An mifala bin raosim olketa devol long nem blong yu. An mifala bin mekem plande mirakol long nem blong yu tu.’ 23Bat#Sams 6:8. long taem ya, bae mi talem klia long olketa olsem, ‘Yufala ya, mi no save long yufala ya. !Yufala giraot, bikos wei blong yufala hemi ravis tumas ya!’”

Tising abaotem wei fo obeim toktok blong Jisas

(Luk 6:47-49)

24Jisas hemi sei moa, “Eniwan hu hemi herem toktok blong mi an hemi duim wanem mi talem, hemi olsem wanfala man hu hemi garem gudfala tingting. Taem hemi wakem haos blong hem, hemi mekem faondesin wea hemi stanap strong antap long bikfala ston insaet long graon. 25So nomata ren hemi ka-kamdaon an bikfala wata hemi ran kam an win hemi go-gohed fo blou strong go long haos ya, haos ya hemi no save foldaon. Bikos hemi stap strong antap long bikfala ston insaet long graon. 26Bat eniwan hu hemi herem toktok blong mi an hemi nating duim wanem mi talem, hemi olsem wanfala man hu hemi nating garem eni gudfala tingting. Taem hemi wakem haos blong hem, hemi stanemap haos antap long sanbis nomoa. 27So taem ren hemi ka-kamdaon an bikfala wata hemi ran kam an win hemi go-gohed fo blou strong go long haos ya, haos ya hemi foldaon an hemi brek finis nao.”

28Taem#Mak 1:22; Luk 4:32. Jisas hemi finisim olketa toktok blong hem, olketa pipol ya olketa sapraes fogud long tising blong hem, 29bikos wei wea hemi tok ya hemi somaot klia dat hemi garem paoa. Toktok blong hem ya, hemi barava no olsem tising blong olketa tisa blong Lo.

Currently Selected:

Matiu 7: SIPB

Highlight

Copy