Job 7
7
Job hemi komplen go long God
1Laef blong pipol hemi barava had tumas olsem man hemi wanfala soldia.
Laef ya hemi hadwaka olowe nomoa.
2Laef ya hemi olsem wanfala slev wea hemi taet tumas an hemi laek fo go res
long sado wea hemi kol.
Ya, laef hemi olsem wakaman wea hemi gohed weit fo tekem pei blong hem.
3Fo plande mans nao, God hemi mekem laef blong mi hemi yusles nomoa.
Hemi gohed fo mekem mi safa evri naet nomoa.
4Taem mi leidaon fo slip, naet hemi long tumas an mi tingabaotem nomoa taem wea mi save getap.
Mi nating save slip gudfala, mi ta-tane olobaot nomoa go-go kasem delaet.
5Staka soa nao i kavaremap bodi blong mi,
an olketa wom blong bluflae i fulap nao long olketa soa ya.
Staka doti nao hemi kavaremap olketa soa ya.
An staka nana tu hemi gohed fo kamaot long olketa soa ya.
6Laef blong mi hemi gopas kuiktaem nomoa olsem wata wea hemi ran.
Kolsap hemi finis nao an hemi samting nating nomoa.
Job hemi prea go long God
7God, yu tingim kam laef blong mi.
Laef blong mi hemi olsem nomoa lelebet win.
Ating bae mi no lukim eni gudfala samting moa.
8Yu lukim mi distaem,
bat bae yu no save lukim mi moa enitaem.
Sapos yu trae fo lukaotem mi,
bae yu no save faendem mi bikos bae mi lus finis nao.
9Taem man hemi dae,
hemi olsem wanfala klaod wea hemi lus kuiktaem.
10Taem man hemi dae,
hemi no save kambaek long ples blong hem.
11Tingting blong mi hemi fulap long trabol,
so mi no save stap kuaet, mi mas tok.
Mi barava filnogud tumas,
so mi mas komplen nao.
12?Waswe nao yu lukluk long mi fo kontrolem mi?
Ating, yu tingse mi olsem dipsi o wanfala jaean snek long dipsi.
13Mi trae fo leidaon long bed blong mi fo res,
mekem mi filgud lelebet.
14Bat wea, yu gohed fo mekem mi fraet fogud
long olketa nogud drim wea yu mekem mi fo lukim.
15Long olketa samting ya, mi no laek fo laef nao.
Mi laekem nomoa samwan fo skuisim nek blong mi mekem mi dae.
16Mi givap long disfala laef nao.
Mi les nomoa fo laef.
Yu no wari moa long mi,
bikos laef blong mi hemi yusles nomoa.
17?Waswe nao yu tingting tumas long man olsem?
?Waswe nao yu lukstrong long hem?
18Evri moning nomoa,
yu lukluk kam long hem.
An evritaem nomoa,
yu traem laef blong hem.
19Plis yu luk go deferen from mi fo lelebet taem,
mekem mi save tekwin lelebet.
20Yu lukluk long olketa man,
bat sapos mi bin sin watkaen nogud samting nao mi duim long yu?
?Waswe nao yu mekem mi olsem mak blong yu fo sut long hem?
Ating mi nao mi mekem tumas trabol fo yu ya.
21?Waswe nao yu no save fogivim eni sin blong mi?
No longtaem bae mi godaon insaet long grev nao.
An nomata yu lukaotem mi, bae mi no stap.
Currently Selected:
Job 7: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
