Job 6
6
Job hemi komplen go long trifala fren blong hem
1Job hemi tok olsem:
2Sapos mi putum wei wea mi filnogud an trabol antap long wanfala skel,
3bae hemi hevi moa winim hevi blong evri sanbis long saetsi.
Dastawe mi tok krangge.
4God hu hemi garem evri paoa hemi mekem mi fo safa
olsem man wea olketa sutim hem long olketa poesen aro.
Poesen blong aro ya hemi go insaet long laef blong mi.
Mi fraetem tumas an safa nao
long olketa nogud trabol wea God hemi sendem agensim mi.
5?Waswe, dongki save singaot nogud taem hemi kaikaim gras?
?Waswe, buluka save meknoes taem hemi garem kaikai?
Nomoa, taem olketa garem kaikai, olketa i hapi.
6?Hu nao laekem kaikai wea hemi olsem wata nating sapos hemi no garem eni solt long hem?
?Hu nao save kaikaim drae disfala flaoa blong sego pam?
7Mi nating laekem diskaen kaikai nomoa,
hemi mekem mi toraot.
Job hemi laekem God fo finisim laef blong hem
8?Waswe nao God hemi no save givim kam samting wea mi askem?
?Waswe nao hemi no save ansarem kam prea blong mi?
9Mi laekem hem fo kilim mi dae.
Mi laekem hem fo katemaot laef blong mi.
10An sapos hemi duim diswan,
nomata mi barava filnogud tumas bae mi hapi fogud
bikos mi no tokagensim toktok blong God hu hemi holi tumas.
11Mi nating strong.
?So waswe nao mi gohed fo stap olsem nomoa?
Laef blong mi hemi yusles finis.
?Fo wanem nao mi save weit long hem?
12?Waswe, mi strong olsem ston?
?Waswe, bodi blong mi hemi aean?
13Hemi tru ya, mi no fit fo sevem laef blong mi seleva.
No eniwan nao hem i stap wea hemi save helpem mi.
Job hemi komplen abaotem trifala fren blong hem
14Man wea hemi barava filnogud, nomata hemi lusim wei fo tinghae long God hu hemi garem evri paoa,
hemi nidim tumas olketa fren fo lavem hem.#6:14 Long Hibru Baebol, mining blong disfala ves hemi no klia.
15Bat mi no save trastem olketa fren blong mi.
Olketa ya i olsem wanfala smol riva wea hemi drae taem no eni ren hemi kam.
16Taem snou antap long olketa hil hemi ranaot,
smol riva olsem hemi fulap long wata an hemi ran bikfala.
17Bat long taem blong biksan,
wata ya hemi finis, an smol riva olsem hemi kamap barava drae.
18Taem olketa wata i drae, olketa bisnis man wea i go long kamel
olketa mas lusim rod fo go lukaotem wata insaet long drae eria,
go-go olketa dae nomoa.
19Olketa ya from Seba an Tema,
i gohed fo lukaotem wata.
20Bat taem olketa kasem saet long olketa smolfala wata,
olketa barava givap nao taem olketa lukim wata ya i drae nao.
21Yutrifala i nating helpem mi nomoa.
Yutrifala kamap olsem nomoa olketa drae riva ya.
Yutrifala lukim bikfala trabol blong mi,
an yufala fraet long hem.
22Mi no askem yutrifala fo givim eni presen long mi.
Mi no talem yutrifala fo peim eniwan fo nilam hem, mekem hemi helpem mi.
23Mi nating talem yufala nomoa fo kam peim mi aot from olketa enemi blong mi.
An mi no askem yutrifala fo sevem mi from han blong olketa ravis man.
Job hemi talem dat hemi stret nomoa
24Oraet, yutrifala trae fo tisim mi,
an bae mi stap kuaet.
Yutrifala mas mekem mi save long rong blong mi.
25Stretfala toktok hemi save mekem man fo filpein.
Bat toktok blong yutrifala hemi krangge nomoa.
26?Waswe, yutrifala tingse toktok blong mi hemi olsem win nomoa?
?Waswe, yutrifala laek fo stretem toktok blong mi taem mi filnogud?
27Hemi luk olsem yutrifala pleim gem fo winim pikinini wea i no garem dadi, mekem hemi kamap slev blong yufala.
An hemi luk olsem wea yutrifala laek fo salem fren blong yufala.
28!Yutrifala mas luk kam long mi.
Mi nating laea long yutrifala.
29Yutrifala mas tingting moa long mi.
Mi laekem yutrifala fo no duim eni rong samting.
Yutrifala mas tingim mi moa,
bikos nogud yutrifala no lukim stretfala wei blong mi.
30?Waswe, mi save laea?
!Nomoa nao!
?Waswe, yutrifala tingse mi no save abaotem trabol?
!Nomoa nao!
Currently Selected:
Job 6: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
