Job 5
5
Elifas hemi talem dat Job nao hemi rong
1Job, yu singaot go, mekem yumi lukim hu nao bae kam fo helpem yu.
?Waswe, hu nao long olketa enjel bae yu kolem fo helpem yu ya?
2Wei fo filnogud bae kilim krangge man.
Joles tingting bae spoelem man i no garem save.
3Mi lukim finis krangge man wea hemi gohed fo stap gudfala nomoa,
bat wea mi toktok fo mekem trabol kam kasem ples blong hem.
4Olketa pikinini blong hem i nating save stap sef moa.
An no eniwan save helpem olketa long kot.
5An olketa pipol hu i hanggre bae tekem kaikai long gaden blong olketa.
Nomata olketa kaikai wea i grou long midol long olketa ropnila, bae olketa tekem tu.
An olketa gridi pipol i tekem risis blong hem.
6Ravis wei no save grou insaet long gaden,
an trabol no save grou kamap from graon.
7Man nao hemi mekem trabol fo kasem hem seleva.
Ya, hemi tru olsem faea wea hemi laet goap.
Elifas hemi advaesim Job
8Sapos mi olsem yu, bae mi mas tane go long God nao.
An mi mas talem trabol blong mi long hem.
9God nao hemi duim olketa bikfala samting wea man hemi no save minim.
Olketa mirakol wea hemi mekem, no eniwan save kaontem nao.
10Hemi nao hemi sendem kamdaon ren long graon,
an hemi wata long olketa gaden.
11God nao hemi haemapem olketa hu i hambol.
An hemi mekem olketa pipol hu i sore an krae, fo kamap hapi moa.
12Hemi spoelem olketa plan blong olketa ravis man.
An mekem olketa ya fo no kasem wanem olketa laekem.
13Hemi mekem olketa trik blong pipol hu i tingse i save, fo spoelem olketa seleva.
An hemi spoelem olketa ravis plan blong olketa ya.#1 Korin 3:19.
14An nomata long midol long de, hemi mekem tudak hemi kavaremap olketa ya.
So olketa no save lukluk olsem wea hemi midol long naet.
15Bat God hemi sevem olketa pua pipol from ravis toktok blong nogud pipol.
An hemi sevem olketa hu i no garem enisamting, from pipol hu i strong tumas.
16So, God hemi mekem tingting blong pua pipol fo kamap strong moa,
an hemi satem maos blong olketa ravis pipol.
Elifas hemi talem Job wea God bae helpem hem
17Man wea God hemi stretem laef blong hem, hemi save hapi.
So taem God hu hemi garem evri paoa hemi stretem yu, yu mas no les long hem.#Provebs 3:11; Hibrus 12:5-6.
18Hemi save mekem man fo garem soa,
bat hemi save putum meresin long hem tu.
Hemi save mekem man fo garekil,
bat hemi save mekem hem gud baek moa.#Hosia 6:1.
19Evritaem nomoa bae hemi sevem yu from trabol.
Nomata plande nogud samting i kasem yu bae hemi lukaftarem yu.
20Sapos hadtaem long kaikai hemi kamap,
bae hemi kipim yu laef.
An long taem blong faet,
bae hemi gadem yu from dae.
21God bae hemi sevem yu from olketa laea wea hemi save spoelem yu.
An bae hemi sevem yu taem olketa trabol fo spoelem yu i kam.
22Ya, long taem blong bikfala trabol,
an hadtaem fo garem kaikai,
bae yu hapi an laf nomoa.
An bae yu no wari long olketa wael animol.
23Ples wea bae yu mekem gaden long hem,
bae hemi no garem eni ston long hem.
An olketa wael animol bae i no kam fo kilim yu dae.
24Bae yu save stap long piis long ples blong yu.
Taem yu sekap long olketa sipsip blong yu,
bae yu save lukim dat olketa stap gud nomoa.
25Olketa pikinini blong yu an olketa grani blong yu,
bae i save plande fogud olsem olketa lif blong gras.
26Bae yu save laef gudfala go-go yu barava olo fogud,
olsem kaikai blong wit wea hemi grou gudfala long gaden go kasem taem wea hemi fit fo tekemaot.
27Job, mifala bin luklukgud long olketa samting ya,
an hemi tru tumas.
Yu mas herem olketa toktok ya an falom.
Currently Selected:
Job 5: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
