Job 3
3
Job hemi sore tumas bikos hemi bon kam long disfala wol
1Nao Job hemi stat fo toknogud abaotem de wea hemi bon kam long hem. 2Hemi tok olsem:
3Letem datfala de wea mi bin bon kam long hem hemi lus.
An letem datfala naet wea mami blong mi i kamap babule hemi lus.
4Letem datfala de hemi kamap tudak.
Ya, mi les fo God hemi rimembarem datfala de,
an mi no laekem eni laet fo saen kam long hem.
5Letem tudak hemi tekova long datfala de,
an letem wanfala blak klaod i kavaremap de ya,
an letem tudak ya blokem laet blong san.
6Letem datfala naet hemi kamap tudak tumas,
an letem hemi lus from insaet long kalenda,
olsem hemi no wanfala de long yia.
7No letem eni narafala woman moa hemi babule long datfala sem naet.
An no letem eniwan i hapi long datfala naet.
8Olketa hu i save tok fo mekem trabol kasem pipol,
letem olketa ya tok wetem Leviatan#3:8 “Leviatan” Leviatan hemi wankaen jaean animol blong dipsi wea olketa fraetem tumas. Long tingting blong olketa Jiu bifoa kam, wei wea God hemi winim disfala Leviatan hemi somaot paoa blong God. Lukim Job 41:1 an Aeasaea 27:1. fo mekem trabol kasem datfala de.
9Hemi gud sapos olketa sta blong eli moning long datfala naet i bin kamap tudak.
An hemi gud tu sapos datfala naet hemi weit nating long delaet.
10Mi les long datfala de bikos hemi letem mami blong mi fo bonem mi.
Hemi bonem mi nomoa mekem mi stap insaet long trabol.
11?Waswe nao mi no dae kam insaet long bele blong mami blong mi?
?Waswe nao mi no dae long semtaem wea mi bon?
12?Waswe nao mami blong mi hemi mekem mi fo sidaon gudfala antap long lek blong hem?
?Waswe nao hemi givim susu long mi?
13Sapos mi dae yet long datfala taem ya,
ating distaem mi res gudfala nao from enikaen trabol.
14Sapos olsem, ating mi res gudfala nao wetem olketa king an olketa bikman hu dae
nomata olketa garem biknem bikos olketa bin wakembaek olketa olfala haos blong king hu i dae finis.
15Sapos mi bin dae, ating distaem mi gohed fo slip gudfala nao olsem olketa sif hu i dae
nomata olketa haos blong olketa i bin fulap long gol an silva.
16?Waswe nao olketa no berem mi olsem pikinini wea hemi dae finis bifoa hemi bon,
o wea hemi dae taem hemi bon?
17Ya, insaet long beregraon, olketa ravis pipol i no wari moa,
an olketa hu i taet tumas from olketa hadwaka, olketa res nao.
18Nomata olketa slev, olketa hapi fo stap kuaet long ples ya,
bikos olketa no save herem moa raf toktok blong masta blong olketa.
19Long ples ya, olketa hu i garem biknem, an olketa man nating tu i stap.
Olketa slev tu i fri nao from paoa blong masta blong olketa.#Jeremaea 20:14-18.
20?Waswe nao God hemi letem olketa hu i safa tumas fo lukim laet nomoa?
?An waswe nao God hemi letem olketa hu i filnogud tumas fo gohed laef?
21Oltaem, olketa ya laek fo dae, bat olketa no save dae.
Olketa ya laekem tumas fo dae winim eni gudfala samting long wol.#Revelesin 9:6.
22Olketa ya save hapi an filgud nomoa taem olketa dae an godaon insaet long grev.
23?Waswe nao God hemi givim laet long man bat hemi no letem man ya lukim wei blong hem seleva,.
?An waswe nao God hemi gadem man ya mekem hem no save falom wei wea hemi laekem?
24Krae blong mi nao hemi olsem kaikai blong mi.
Ya, mi krae olowe nomoa olsem wata wea hemi ran.
25Olketa samting wea mi fraetem, i kasem mi nao.
Olketa samting mi wari long hem, i kamap nao long mi.
26Mi nating save stap kuaet, an mi nating save res.
An mi nating save garem piis, bat mi garem trabol nomoa.
Currently Selected:
Job 3: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.