Job 2
2
Seitan hemi traem Job moa
1Wanfala de moa, taem olketa long heven i kam stanap frant long Yawe, Seitan tu hemi kam wetem olketa. 2Yawe hemi askem hem moa olsem, “?Seitan, yu stap kam long wea ya?”
An hemi ansa olsem, “Mi gohed fo wakabaot olobaot nomoa raonem disfala wol ya.”
3Yawe hemi tok olsem long hem, “?Waswe, yu lukim wei blong disfala wakaman blong mi Job? No eni man long disfala wol hemi olsem hem. Hemi wanfala gudfala an stretfala man. Hemi tinghae long mi an hemi les fo duim eni ravis samting. Yu nao yu mekem mi fo letem yu spoelem hem fo nating nomoa. Nomata olsem, Job hemi gohed yet fo falom stretfala wei nomoa.”
4Bat Seitan hemi tok olsem, “Skin sensim skin.#2:4 “Skin sensim skin” Mining long disfala toktok hemi no klia, bat olketa tingse mektu toktok long disfala ves hemi garem semkaen mining. Man save lusim evrisamting blong hem fo mekem hem seleva i laef. 5Bat sapos yu go spoelem bodi blong hem, bae hemi tokspoelem yu nogud long ae blong yu ya.”
6Yawe hemi tok olsem long hem, “Oraet, hemi long han blong yu nao, bat yu mas no kilim hem dae.”
7So Seitan hemi goaot, an hemi mekem enikaen ravis soa nomoa fo kavaremap bodi blong Job, stat long hed blong hem go-go kasem fut blong hem. 8Job hemi go an sidaon long ples wea olketa bonem ravis, an hemi tekem wanfala pis sap ston fo skrasim olketa soa long bodi blong hem.
9Den waef blong hem hemi tok olsem long hem, “?Waswe nao, yu gohed fo falom stretfala wei nomoa? !Hemi moabeta yu tokspoelem God an yu dae nao!”
10Nao Job hemi ansa olsem , “!Yu no tok krangge olsem! Taem God hemi givim olketa gudfala samting long yumi, yumi hapi fo tekem. ?Waswe nao yumi komplen taem hemi givim kam trabol long yumi?”
Nomata evri nogud trabol ya i kasem Job, hemi nating toknogud.
Trifala fren blong Job i kam fo visitim hem
11Trifala long olketa fren blong Job nao i Elifas from Teman, an Bildad from Sua, an Sofa from Naama. Taem olketa herem nius abaotem trabol wea i kasem Job, olketa mekem plan fo go filsore wetem hem, an strongim tingting blong hem. 12Taem olketa stap farawe yet, olketa luk go long Job, bat olketa nating luksave long hem nao. Den olketa stat fo krae bikfala, an brekem kaleko blong olketa, an torowem dast long hed blong olketa bikos olketa barava sore tumas long hem. 13Olketa kam nao an sidaon long graon wetem hem fo sevenfala de an sevenfala naet. Olketa nating toktok long hem bikos olketa lukim dat hemi barava safa tumas.
Currently Selected:
Job 2: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.