Tobit 6
6
Tobias hemi holem wanfala fis
1Tobias an disfala enjel i stat fo go nao long Media, an tekem tu dog blong Tobias wetem tufala. Tufala wakabaot go-go kasem taem wea san hemi godaon, an tufala go res saet long Taegris riva. 2Taem Tobias hemi godaon long riva fo wasim lek blong hem, wanfala bikfala fis hemi kamap an hemi wande kaikaim lek blong hem. So Tobias hemi singaot. 3Enjel hemi singaot go olsem long hem, ?!Yu holem fis ya! !No letem hem go!? Nao Tobias hemi holem fis ya, an pulum kam long soa. 4Enjel ya hemi tok olsem, ?Yu katem bele blong fis ya, an aotem golblada, an haat, an liva blong hem, an yu mas kipim gud bikos hemi gud fo meresin. An yu mas torowem nogud pat long bele blong hem.? 5So Tobias hemi duim nao wanem enjel hemi talem hem. Bihaen, hemi kukim fis ya, an tufala kaikaim haf blong hem. An hemi soltem narafala haf fo kipim. Tufala gohed go-go kolsap kasem Media. 6Nao Tobias hemi ask olsem, ??Brata blong mi, Asaraeas, disfala golblada, an haat, an liva, i save kiurim watkaen sik ya?? 7Enjel ya hemi ansa olsem, ?Haat an liva blong hem ya, yu save bonem, mekem smok blong hem hemi raosim eni nogud devol wea hemi spoelem eniwan. Taem yu yusim, bae devol ya hemi ranawe an no save spoelem man ya moa. 8An yu save yusim golblada fo aotem waet samting wea hemi satem ae blong man hu hemi blaen. Yu tekem an yu putum long ae blong hem, an yu bloum go long waet samting ya, an man ya bae hemi save lukluk moa.?
Rafael talem Tobias fo maritim Sera
9Taem tufala kasem Media an tufala go kolsap long biktaon long Ekbatana, 10Rafael hemi tok olsem, ?Tobias.? An Tobias hemi ansa olsem, ??Wanem ya?? Rafael hemi tok moa olsem, ?Tunaet bae yumitufala stap long haos blong wantok blong yu, Raguel. Hemi garem wanfala dota. Nem blong hem nao Sera. 11Bikos yu nao garem raet long laen blong Raguel, hemi stret fo yu maritim Sera. An yu garem raet fo tekova long evrisamting wea dadi blong hem hemi onam. 12Sera hemi garem gudfala tingting, an hemi no save fraet, an hemi wanfala naesbola. An dadi blong hem hemi gudfala man. Tunaet, bae mi stori wetem dadi blong hem, an askem hem fo yu maritim dota blong hem. Bae hemi letem dota blong hem fo maritim yu ya. Bihaen, taem yumitufala kambaek from Rages, bae yumi mekem fist long marit blong yutufala. Raguel hemi no save stopem Sera fo maritim yu, an hemi no save letem eni man moa fo maritim hem. Sapos hemi no letem fo yu, oraet, falom lo blong Mosis, hemi mas dae nao. Hemi save dat yu nomoa save maritim dota blong hem, an tekova long evrisamting blong hem. So yu mas falom advaes blong mi. Tunaet, mitufala Raguel bae stori fo stretem evrisamting fo yu maritim Sera. Taem yumitufala kambaek from Rages, bae yumitufala tekem Sera go long hom.? 13Tobias hemi tok olsem long Rafael, ?Asaraeas, mi herem finis stori abaotem sevenfala man hu i maritim Sera. Evriwan long olketa man ya i dae taem olketa no slip yet wetem Sera. 14Mi herem dat wanfala nogud devol nao hemi kilim evriwan dae. Devol ya hemi no spoelem Sera, bat hemi kilim dae evri man hu i go kolsap long Sera. Mi fraetem tumas disfala devol ya. Mi seleva nomoa wanfala pikinini blong mami an dadi blong mi, an sapos mi dae bae tufala dae long sore. An tufala no garem eni narafala san moa fo berem tufala.? 15Enjel ya hem tok olsem, ??Waswe, yu fogetem nao olketa gudfala toktok wea dadi blong yu hemi talem long yu? Hemi talem dat yu mas maritim wanfala long traeb blong yu. So yu mas herem gud olketa samting mi talem yu. No wari long devol ya. Yu mas maritim Sera. Mi save finis, tunaet bae Raguel hemi letem Sera fo maritim yu. 16Taem yu redi fo go insaet long rum fo slip, yu mas tekem haat an liva blong fis ya, an yu mas putum long insens wea hemi bone. 17Den smel blong hem bae hemi fulumap rum ya. Taem devol ya hemi smelem, bae hemi ranawe an nating save kambaek moa long Sera. Bifoa yutufala slip tugeta, yutufala mas prea long Lod long heven fo kaen long yutufala, an gadem yutufala. Yu no fraet, Sera hemi blong yu finis stat kam yet long taem God hemi mekem disfala wol. Bae yu nao yu sevem hem from devol ya. An bae hemi go wetem yu long hom blong yu. Yutufala Sera bae i garem plande pikinini wea bae yutufala lavem olketa tumas. !So yu mas no wari long enisamting!? Tobias hemi herem gud wanem Rafael hemi talem. Hemi save dat Sera hemi wanfala long laen blong dadi blong hem. So Tobias hemi stat fo laekem Sera, an hemi hapi tumas fo maritim hem.
Currently Selected:
Tobit 6: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.