Tobit 5
5
Tobias hemi tingting fo go long Media
1Nao Tobias hemi tok olsem long dadi blong hem, ?Ya, bae mi duim evrisamting wea yu talem long mi. 2?Bat hao nao bae mi save tekembaek olketa seleni from Gabael? Mi no save long disfala man ya. ?Wanem nao bae mi duim bifoa hem save hu nao mi, mekem hem save givim olketa seleni ya long mi? An mi no save tu disfala rod fo go long Media.? 3Tobit hemi ansa olsem long san blong hem, ?Gabael an mi, mitufala bin saenem wanfala agrimen. Den mi katem long tufala haf. Bihaen, mi putum haf blong hem insaet long baeg blong seleni ya, an narafala haf blong agrimen ya, mi tekem kam. Distaem hemi winim tuentifala yia nao long taem wea mitufala mekem agrimen ya. Oraet, yu mas go faendem wanfala man wea evriwan trastem hem, mekem hemi go wetem yu long Media, an hemi kambaek wetem yu. Yumitufala bae peim hem taem yutufala kambaek long hia. Mi laekem yu fo tekem kambaek disfala seleni wea mi putum wetem Gabael.?
Tobias hemi mitim Rafael
4Den#Hibrus 13:2. Tobias hemi goaot fo faendem wanfala man wea hemi save long disfala rod fo go long Media, mekem hemi go wetem. Taem hemi lusim haos blong hem, hemi mitim stret Rafael. Tobias hemi no save olsem Rafael hemi wanfala enjel blong God. 5An hemi askem, ??Brata, yu blong wea?? An Rafael hemi tok olsem long hem, ?Mi wanfala man blong Israel an wantok blong yu. Mi kam long hia long Nineve fo faendem waka.? Tobias hemi ask moa olsem, ??Waswe, yu save long disfala rod go long Media?? 6Rafael hemi ansa olsem, ?Ya, mi save. Mi go long ples ya plande taem finis. Mi savegud long evri rod ya. Evri taem mi go long dea mi stap wetem wantok blong yumi Gabael, hu hemi stap long Rages. Nao sapos yu stat long biktaon long Ekbatana go kasem Rages, bae hemi tekem winim tufala ful de, bikos Rages hemi stap long olketa maonten.? 7Tobias hemi tok moa olsem long Rafael, ?Wantok, yu weitem mi long hia taem mi go insaet fo talem dadi blong mi. Mi laekem yu fo kam wetem mi long Rages, an bae mi peim yu.? 8Rafael hemi tok olsem, ?!Hem oraet! Bae mi weit, bat yu mas hariap.? 9Tobias hemi go insaet, an tok olsem long dadi blong hem, ?Mi mitim wanfala man blong Israel hu hemi wiling fo go wetem mi.? Tobit hemi tok olsem long Tobias, ?Talem hem fo kam insaet. Mi wande save man ya hem blong watkaen laen an traeb ya. An mi wande save tu, sapos hemi wanfala gud man wea mi save trastem fo go wetem yu.?
Rafael hemi go kasem Tobit
So Tobias hemi go aotsaet an hemi kolem kam Rafael, an tok olsem long hem, ?Dadi blong mi hemi laek fo tok wetem yu.? Taem Rafael hemi go insaet long haos, Tobit hemi welkamem hem. Den Rafael hemi sensim welkam blong Tobit an hemi tok olsem, ??Hao, yu oraet nomoa?? Tobit hemi ansa olsem, ??Hao nao bae mi oraet taem ae blong mi hemi blaen, an mi no save lukim enisamting? Hem olsem mi dae finis. Mi no save lukim eni laet. Mi herem nomoa olketa pipol toktok, bat mi nating save lukim olketa.? Rafael hemi tok moa olsem, ?!No wari! No longtaem, bae God hemi mekem ae blong yu gudbaek moa.? Nao Tobit hemi tok olsem, ?Tobias hemi laek go long Media. ?Waswe, yu save go wetem fo som rod fo hem? No wari, bae mi peim yu.? Rafael hem tok olsem, ?Ya, mi save go wetem. Mi go long ples ya plande taem finis, an mi save long evri rod long olketa maonten an olketa flat ples.? 10An Tobit hemi askem Rafael moa olsem, ??Fren, yu blong watkaen laen an traeb ya?? 11Bat, Rafael hemi askem Tobit olsem, ??Waswe nao yu wande save?? Nao Tobit hemi tok olsem, ?Yu mas toktru. ?Hu nao nem blong yu an hu nao yu?? 12So Rafael hem ansa olsem, ?Nem blong mi nao Asarias, an mi san blong bik Ananaeas hu hemi wanfala wantok blong yu.? 13Tobit hemi tok olsem long hem, ?!San, mi hapi tumas fo lukim yu! Letem God hemi blesim yu. Yu no kros long mi. Mi wande save nomoa abaotem laen blong yu. Mi jes save nao yu wantok blong mi. Mi save long dadi blong yu Ananaeas an brata blong hem, tufala i san blong bik Semaea. Tufala stap strong long biliv blong tufala. Bifoa, mitrifala save go tugeta long Jerusalem fo wosip. Olketa long laen blong yu, i gud pipol. Letem God gadem gogo blong yutufala.? 14Tobit hemi tok moa olsem, ?Bae mi peim yu wanfala silva seleni evri de long gogo blong yutufala. An bae mi peim tu evrisamting wea yutufala nidim. 15Yu fren gudfala wetem Tobias, an bae mi givim ekstra pei fo yu.? 16Rafael#Jenesis 24:7, 40. hemi tok olsem, ?Ya, bae mi go wetem hem. Yu no wari, bae mitufala kambaek sef nomoa. No eni trabol save kasem mitufala falom rod ya.? An Tobit hemi tok olsem, ?Letem God hemi go wetem yutufala!? Bihaen, hemi kolem Tobias an hemi sei, ?San, redim evrisamting fo gogo blong yutufala, mekem yutufala save go nao. Letem God an enjel blong hem lukaftarem yutufala, an tekem yutufala kambaek sef moa long mi.? Bifoa tufala go, Tobias hemi kisim mami an dadi blong hem, an hemi sei gudbae long tufala. Den Tobit hemi tok olsem moa long tufala, ?!Letem God hemi blesim gogo blong yutufala!? 17Nao mami blong Tobias hemi stat fo krae, an hemi hatem Tobit olsem, ??Hao nao yu letem san blong mi go? Hem nomoa save lukaftarem yumitufala. Distaem, hu nao bae hemi lukaftarem yumitufala? 18?Waswe, datfala seleni nao hemi bikfala samting tumas long yu, fo yu fo sendem san blong yumitufala fo hemi tekem kambaek? ?Yu nating wari nomoa long laef blong hem? 19?Waswe, yumitufala no save hapi nomoa long olketa samting wea God hemi givim finis long yumi?? 20Tobit hemi tok olsem long waef blong hem, ?Isi nomoa mami. Bae hemi go kasem ples ya an kambaek sef nomoa. Bae yu lukim seleva long ae blong yu. 21Mami, yu no wari tumas long tufala. Wanfala gudfala enjel bae hemi go wetem Tobias. Evrisamting wea hemi go fo duim bae hemi gud. An bae hemi gud nomoa taem hemi kambaek.? So Ana hemi stap kuaet an hem no krae.
Currently Selected:
Tobit 5: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.