Revelesin 8
8
Smolfala sipsip brekem mekseven tambu mak
1Nao Smolfala Sipsip ya hemi brekem moa mekseven tambu mak long skrol ya, an long taem ya nomoa, no eni noes nao long heven, go-go kolsap haf-aoa hemi finis. 2An bihaen, mi lukim dat olketa givim go sevenfala trampet long olketa sevenfala enjel wea olketa gohed fo stanap long frant blong God.
3Nao#Emos 9:1; Eksodas 30:1, 3. narafala enjel moa hemi kam an stanap kolsap long olta ya. An hemi holem wanfala sosa blong insens wea olketa mekem long gol. Olketa givim hem plande insens moa fo hemi adem go wetem olketa prea blong olketa pipol blong God. An hemi mekem sakrifaes long hem long disfala olta wea olketa mekem long gol, wea hemi stap long frant blong tron ya. 4An smok blong insens ya wetem olketa prea blong olketa pipol blong God, hemi goap from sosa long han blong enjel ya an hemi go kasem God. 5Bihaen#Levitikas 16:12; Esikiel 10:2; Eksodas 19:16; Revelesin 11:19; 16:18. nomoa, enjel ya hemi tekem sosa blong insens an hemi fulumapem long faea long olta. Hemi tekem nomoa, an hemi torowem godaon long wol. Taem ya nomoa, bikfala noes nao hemi kam an laetning hemi laet an tanda hemi bosta an wanfala etkuek hemi sekem graon.
Siksfala enjel bloum trampet
6Nao sevenfala enjel wea olketa holem sevenfala trampet ya, olketa mekredi fo bloum.
7Den#Eksodas 9:23-25; Esikiel 38:22. fas enjel hemi bloum trampet blong hem.#8:7 “bloum trampet blong hem” Olketa nogud samting wea hemi kasem wol ya olketa kolsap semsamting wea hemi kasem ples blong Ijip bifoa. Lukim Eksodas 7:14—10:29. An aes an faea wea tufala miks wetem blad#8:7 “miks wetem blad” Maet hemi minim wea plande pipol bae olketa garekil an dae. Lukim Esikiel 38:22. hemi foldaon kam long wol olsem ren. An insaet long wol ya, bikfala haf#8:7 “bikfala haf” Long langguis long Grik hemi sei, “1/3 (wanfala long trifala haf)* blong graon nao faea hemi bonem wetem bikfala haf blong olketa tri an evri grin gras.
8Nao mektu enjel hemi bloum trampet blong hem. An wanfala samting wea hemi luk olsem wanfala bik maonten wea hemi bone, hemi foldaon go insaet long si. An bikfala haf blong si ya hemi kamap blad, 9an bikfala haf blong olketa fis insaet long si olketa dae. An bikfala haf tu blong olketa sip long si olketa barava nogud.
10Nao#Aesaea 14:12. mektri enjel hemi bloum trampet blong hem. An wanfala bikfala sta wea hemi laet olsem bikfala faea, hemi kamdaon long skae an foldaon antap long bikfala haf blong olketa riva, an antap long olketa springwata tu. 11An#Jeremaea 9:15. nem blong bikfala sta ya nao olketa kolem “Saoa”. Bikfala haf blong olketa wata ya hemi kamap saoa fogud, an plande pipol dae bikos olketa dringim olketa saoa wata ya.
12Nao#Aesaea 13:10; Esikiel 32:7; Joel 2:10, 31; 3:15. mekfoa enjel hemi bloum trampet blong hem. An bikfala haf blong san an bikfala haf blong mun hemi dae. An hemi olsem tu long olketa sta, wea bikfala haf blong olketa hemi dae. So bikfala haf long de hemi no garem eni laet long hem, an bikfala haf long naet hemi olsem tu.
13Bihaen mi luk go moa, an mi herem wanfala igol wea hemi flae antap tumas, hemi gohed fo singaot bikfala olsem, “!Sore tumas! !Sore tumas! Sore tumas long olketa pipol long wol, bikos taem nara trifala enjel moa olketa bloum trampet blong olketa, bae hemi barava nogud tumas long olketa ya.”
Currently Selected:
Revelesin 8: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
