Revelesin 7
7
God putum mak long pipol blong hem
1Bihaen,#Jeremaea 49:36; Daniel 7:2; Sekaraea 6:5. mi lukim moa fofala enjel wea olketa gohed fo stanap long fofala kona blong wol ya. Olketa stanap fo satem fofala win long wol, mekem no eni win hemi save blou kam long graon an long olketa tri an long si. 2Nao mi lukim nara enjel wea hemi stat kamap long saet long ist, an hemi holem samting fo putum mak long pipol blong God hu hemi laef. Enjel ya hemi singaot go long nara fofala enjel ya, wea God hemi givim paoa long olketa finis, mekem olketa save spoelem graon wetem si ya. 3Hemi#Esikiel 9:4, 6. sei olsem long olketa, “Yufala no spoelem yet graon wetem olketa tri an si. Mifala mas putum wanfala mak long fohed blong olketa#7:3 “wanfala mak long fohed blong olketa” Mak ya hemi minim wea God nao hemi lukaotem olketa Kristin pipol olsem. God hemi no letem olketa fo go insaet disfala barava nogud taem wea bae hemi kam. Lukim Matiu 24:22. pipol blong God fastaem.” 4Nao olketa talem mi dat namba blong olketa pipol wea mak blong God hemi stap long olketa, hemi kasem 144,000.#7:4 “144,000” Hemi minim namba ya hemi barava bik tumas wea hemi no fit fo kaontem olketa. Maet hemi minim evri Kristin pipol olsem long ves 9, o maet hemi minim olketa pipol blong Jiu hu i Kristin nomoa. An olketa ya, kamaot long evri traeb blong pipol blong Israel.
5Long traeb blong Jiuda hemi garem 12,000,
an long traeb blong Ruben hemi garem 12,000,
an long traeb blong Gad hemi garem 12,000,
6an long traeb blong Asa hemi garem 12,000,
an long traeb blong Naftali hemi garem 12,000,
an long traeb blong Manase hemi garem 12,000,
7an long traeb blong Simion hemi garem 12,000,
an long traeb blong Livae hemi garem 12,000,
an long traeb blong Isaka hemi garem 12,000,
8an long traeb blong Sebulun hemi garem 12,000,
an long traeb blong Josef hemi garem 12,000,
an long traeb blong Benjamin hemi garem 12,000.
Olketa pipol blong God hipap long heven
9Den mi luk go moa, an mi lukim plande pipol tumas, wea no eniwan save kaontem olketa. Olketa pipol ya olketa kam from evri traeb an evri laen an evri kantri an evri langguis long wol. Olketa werem waet kaleko an olketa holem lif blong pam tri#7:9 “lif blong pam tri” Lif ya hemi somaot dat olketa pipol ya olketa hapi tumas. Lukim Jon 12:13. long han blong olketa, an olketa gohed fo stanap long frant long tron ya, an long frant long Smolfala Sipsip ya. 10Nao olketa singaot bikfala olsem,
“God blong yumi hu hemi sidaon long tron
wetem Smolfala Sipsip ya,
tufala nao sevem yumi.”
11Nao olketa enjel stanap raonem disfala tron wetem olketa bikman an fofala animol ya. Olketa nildaon long graon long frant long tron, an olketa gohed fo wosipim God 12olsem,
“Ya, hemi tru ya.
God blong mifala,
mifala preisim yu
an liftimap nem blong yu
an talem tengkiu long yu
an mekhae long yu.
Mifala preisim yu from waes tingting blong yu
an bikfala paoa blong yu
an strong blong yu.
Evrisamting ya hemi gohed evritaem an olowe. Amen.”
13Nao wanfala long olketa bikman ya hemi askem mi olsem, “?Hu nao olketa pipol wea olketa werem waet kaleko ya? ?An olketa stap kam long wea ya?”
14An#Daniel 12:1; Matiu 24:21; Mak 13:19. mi ansarem hem olsem, “Masta, yu nomoa yu save.”
So hemi sei long mi olsem, “Hem nao olketa pipol hu i bin gotru long bikfala trabol ya. An long distaem olketa wasim finis kaleko blong olketa#7:14 “olketa wasim finis kaleko blong olketa” Diswan hemi minim wea dae blong Jisas Kraes hemi tekemaot finis evri sin blong olketa. long blad blong Smolfala Sipsip ya, an kaleko blong olketa hemi kamap waet moa. 15Dastawe olketa gohed fo stanap long frant long tron blong God. An olowe, nomata de an naet, olketa gohed fo wosipim hem insaet long tambuhaos blong hem.#7:15 “tambuhaos blong hem” Hemi nara wei fo talem heven nomoa. An God hu hemi sidaon long tron, bae hemi stap wetem olketa fo lukaftarem olketa.#7:15 “bae hemi stap wetem olketa fo lukaftarem olketa gudfala” Long langguis long Grik hemi sei, “bae hemi stanemap haostent blong hem raonem olketa”. Lukim Revelesin 21:4. 16Bae#Aesaea 49:10. olketa no save hanggre an no save dae long wata moa. An bae hot san hemi no save spoelem olketa moa. 17Bikos#Sams 23:1; Esikiel 34:23; Sams 23:2; Aesaea 49:10; 25:8. Smolfala Sipsip wea hemi stap long tron, bae hemi lukaftarem olketa olsem man hu hemi lukaftarem sipsip blong hem. An bae hemi lidim olketa go fo dring long olketa springwata wea hemi save givim laef. An God bae hemi draem evri tias long ae blong olketa, mekem olketa no save sore moa.”
Currently Selected:
Revelesin 7: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.