Mak 2

Jisas mekem gudbaek wanfala man wea bodi blong hem hemi no save muv

(Matiu 9:1-8; Luk 5:17-26)

1Nao bihaen samfala de moa, Jisas hemi kambaek moa long Kapaneam. Olketa pipol olketa herem nius wea Jisas hemi stap nao long haos blong hem. 2So plande long olketa kam hipap long haos ya, an nomata long aotsaet long doa ya hemi barava fulap fogud nao. An taem Jisas hemi go-gohed fo talemaot toktok blong God long olketa pipol nomoa, 3fofala man olketa karim kam wanfala man wea bodi blong hem hemi no save muv.

4Bat bikos plande pipol tumas, hemi barava had fo olketa tekem man ya go long Jisas. So olketa karim man ya antap long haos nomoa, an olketa openem wanfala hol long ruf ya stret antap long ples wea Jisas hemi stanap long hem. Taem olketa mekem hol ya finis nomoa, olketa tekem man ya wetem bed blong hem an mekem hem godaon insaet long haos ya nao. 5Taem Jisas hemi luksave long biliv blong olketa, hemi sei olsem long sikman ya, “Fren, mi fogivim nao olketa sin blong yu.”

6Long taem ya, samfala long olketa tisa blong Lo, olketa stap long ples ya tu, an olketa tingting olsem long maen blong olketa seleva. 7“!Maewat! ?Hao nao disfala man ya hemi tok olsem? !Hemi barava tokspoelem God ya! !God nomoa hemi save fogivim olketa sin!”

8Long semtaem ya, Jisas hemi save finis wanem olketa tingim, so hemi sei olsem, “?Waswe nao yufala garem tingting olsem long maen blong yufala? 9Hemi isi tumas fo sei long disfala sikman, ‘Mi fogivim nao olketa sin blong yu’. Bat hemi had tumas fo sei, ‘Yu stanap an tekem bed blong yu, an yu wakabaot go’. 10Bat distaem bae mi barava somaot long yufala wea mi San Blong Man, mi garem paoa long disfala wol fo fogivim olketa sin.” Nao Jisas hemi sei long disfala sikman ya olsem, 11“!Mi talem long yu, yu stanap, tekem bed blong yu an yu gobaek long haos blong yu!”

12Long semtaem nomoa, man ya hemi stanap an tekem bed blong hem an hemi wakabaot go nao. Olketa pipol barava sapraes fogud taem olketa lukim diswan, an olketa mekhae long God, an olketa sei, “!Maewat, bifoa kam, yumi nating lukim enisamting olsem yet ya!”

Jisas kolem Livae nomata hemi waka fo gavman blong Rom

(Matiu 9:9-13; Luk 5:27-32)

13Nao Jisas hemi gobaek moa long saet long leik long Galili. Taem ya nomoa, plande pipol nao olketa kam long Jisas an hemi gohed fo tisim olketa. 14An taem hemi wakabaot go moa, hemi lukim wanfala man nem blong hem Livae, san blong Alfeas. Long taem ya, Livae hemi sidaon long ples wea olketa pipol save peim taks long hem ya. An Jisas hemi tok olsem long hem, “Yu kam falom mi.” So Livae hemi getap an falom Jisas nao.

15Plande taem nao, olketa man fo tekem taks an olketa nara ravis pipol moa olketa save go wetem Jisas. Nao long taem ya, Jisas hemi go kaikai long haos blong Livae#2:15 “haos blong Livae” Samfala olfala kopi long Mak olketa sei,“haos blong hem”. an plande long olketa ravis pipol nao olketa kam fo kaikai wetem Jisas an olketa disaepol blong hem. 16Nao samfala tisa blong Lo wea olketa i Farasi tu, olketa lukim dat Jisas hemi kaikai wetem olketa ravis pipol ya. Taem ya nomoa, olketa tok olsem nao long olketa disaepol blong Jisas, “?Ei, waswe nao man ya hemi kaikai wetem olketa man fo tekem taks an olketa nara ravis pipol olsem ya?”

17An taem Jisas hemi herem diswan, hemi tok olsem long olketa nao, “Yufala save, pipol hu i no sik olketa no wande lukim dokta. Bat pipol hu i sik nao olketa wande fo lukim dokta. So mi no kam fo kolem olketa stretfala pipol, bat mi kam fo kolem olketa pipol wea olketa garem sin.”

Niufala tising mas no miks wetem olfala tising

(Matiu 9:14-17; Luk 5:33-39)

18Long wanfala taem, olketa disaepol blong Jon Baptaes an olketa Farasi, olketa stop fo no kaikai. Nao samfala pipol olketa kam askem Jisas olsem, “Olketa disaepol blong Jon Baptaes an olketa disaepol blong olketa Farasi, olketa stop fo no kaikai ya. ?Bat waswe nao olketa disaepol blong yu olketa nating duim diswan?”

19An Jisas hemi ansarem olketa olsem, “?Waswe, hemi oraet nomoa fo olketa pipol wea olketa stap long fist blong marit fo stop fo no kaikai? !Nomoa ya! Taem man hu hemi marit hemi stap wetem olketa fren blong hem, hemi no fitim fo olketa stop fo no kaikai. 20Bat bae hemi kasem taem wea olketa tekem hem go from olketa. An long taem ya nao, bae olketa save stop fo no kaikai.

21“Hemi no fitim fo yumi tekem niufala pis kaleko fo somap long wanfala olfala kaleko wea hemi garem hol long hem finis. Sapos yumi duim olsem, taem yumi wasim, bae niufala pis kaleko ya save brekem moa nara pis long olfala kaleko ya. An hol ya bae hemi bikfala moa winim bifoa.

22“An narasamting moa, yumi no save fulumapem niufala waen insaet long olketa olfala skin blong nanigot fo kipim waen long hem. Bikos taem niufala waen ya hemi go saoa, hemi save mekem olketa olfala skin ya fo suelap an bae olketa brek, an waen wetem skin ya bae tufala evriwan nogud nao. So yumi mas fulumapem niufala waen insaet long olketa niufala skin.”

Jisas hemi Masta blong Sabat

(Matiu 12:1-8; Luk 6:1-5)

23Long#Diutronomi 23:25. wanfala Sabat de, Jisas hemi wakabaot long samfala gaden blong wit, an semtaem ya, olketa disaepol blong hem olketa gohed nao fo tekem samfala wit. 24So taem olketa Farasi olketa lukim nomoa, olketa tok olsem long Jisas nao, “!Ei, yu lukim! ?Waswe nao olketa duim waka long Sabat de wea hemi tambu long Lo?”

25-26Nao#Levitikas 24:9; 1 Samuel 21:1-6. Jisas hemi tok olsem long olketa, “?Waswe, yufala no ridim nomoa samting King Deved hemi duim taem Abaeata hemi Haeprist yet ya? Long taem ya, Deved an olketa man blong hem olketa hanggre an olketa sot long kaikai. An Deved hemi go insaet long haos blong God an hemi kaikaim tambu bred ya nao, an hemi givim tu long olketa man blong hem. Bat falom tising blong Lo ya, olketa prist nomoa save kaikaim diskaen bred.”

27An Jisas hemi talem long olketa olsem moa, “Sabat ya, God hemi mekem fo helpem pipol nomoa, bat hemi no mekem Sabat fo bos ovarem olketa. 28So mi San Blong Man nao mi Masta blong Sabat.”

Currently Selected:

Mak 2: SIDC

Highlight

Copy