Mak 1

Jon Baptaes talemaot toktok blong God

(Matiu 3:1-12; Luk 3:1-18; Jon 1:19-28)

1Hem ya nao stat long Gudnius abaotem Jisas Kraes, San Blong God.#1:1 Samfala olfala kopi long Mak olketa no garem “San Blong God”. 2God#Malakae 3:1. hemi talem profet Aesaea fo raetem olsem,

“Bae mi sendem go niusman blong mi fo go fastaem long yu,

an hem nao bae hemi mekredi long rod fo yu.”

3“Wanfala#Aesaea 40:3. man hemi toktok bikfala insaet long drae eria, an hemi sei,

‘!Yufala mas mekredi long rod fo Masta,

an yufala mas stretem olketa smolfala rod fo hem!’”

4So Jon hemi kam long wanfala drae eria, an hemi go-gohed nao fo baptaesim olketa pipol an talemaot toktok blong God long olketa olsem,#1:4 “So Jon hemi kam …” Samfala olfala kopi long Mak olketa sei, “So Jon Baptaes hemi kam long wanfala drae eria, an hemi talemaot toktok blong God long olketa pipol olsem”. “Yufala evriwan mas lusim ravis wei blong yufala an yufala mas baptaes, mekem God save fogivim olketa sin blong yufala.” 5Nao long taem ya nomoa, evri pipol long Jerusalem an olketa nara ples long provins long Jiudia olketa kam an lisin long hem. Olketa talemaot olketa sin blong olketa an Jon hemi baptaesim olketa insaet long riva long Jodan.

6Jon#2 Kings 1:8. hemi werem olketa raf kaleko wea olketa wakem long hea blong kamel, an strap blong hem hemi skin blong animol nomoa. An kaikai blong hem nao hemi grashopa wetem wael hani. 7Nao hemi talemaot toktok blong God long olketa pipol olsem, “Bae wanfala man hemi kam, an hem nao hemi bikfala moa winim mi. Mi barava nating fitim hem, nomata fo bendaon an tekemaot sandol blong hem. 8Mi baptaesim yufala long wata nomoa, bat man ya bae hemi baptaesim yufala long Holi Spirit.”

Jon baptaesim Jisas

(Matiu 3:13-17; Luk 3:21-22)

9No longtaem bihaen, Jisas hemi lusim kam Nasaret long provins long Galili, an Jon hemi baptaesim hem long riva long Jodan. 10Taem Jisas hemi kamaot long wata nomoa, hemi lukim skae hemi open nao, an Holi Spirit hemi kamdaon long hem olsem wanfala kurukuru. 11Long#Jenesis 22:2; Sams 2:7; Aesaea 42:1; Matiu 3:17; 12:18; Mak 9:7; Luk 3:22. semtaem nomoa, toktok hemi kamdaon long heven wea hemi sei, “Yu nao barava San blong mi wea mi lavem yu tumas, an mi hapi tumas long yu.”

Seitan traem Jisas

(Matiu 4:1-11; Luk 4:1-13)

12Bihaen nomoa, Holi Spirit hemi lidim Jisas fo go insaet long drae eria ya nao. 13An ples ya tu olketa wael animol olketa stap long hem. Jisas hemi stap long ples ya fo foti de, an oltaem nomoa Seitan hemi gohed fo traem hem. An olketa enjel i kam an helpem hem.

Jisas kolem fofala fisingman

(Matiu 4:12-22; Luk 4:14-15; 5:1-11)

14Taem olketa putum Jon Baptaes long prisin finis, Jisas hemi go long Galili nao an hemi go-gohed fo talemaot Gudnius blong God. 15Hemi#Matiu 3:2. sei olsem, “!Barava taem blong God hemi kamtru nao! !Kingdom blong God,#1:15 “Kingdom blong God” Lukim long diksonari. hemi kolsap kam nao! !Yufala mas lusim ravis wei blong yufala, an biliv nomoa long Gudnius!”

16Nao taem Jisas hemi wakabaot go long saet long leik long Galili nomoa, hemi lukim tufala brata wea waka blong tufala nao fo fising. Wanfala hemi Saemon an narawan hemi brata blong hem Andru. Tufala go-gohed fo fising wetem net long leik ya. 17An Jisas hemi sei long tufala olsem, “Yutufala kam falom mi. Mi bae mi som yutufala hao fo fising fo kasem pipol.” 18So long semtaem nomoa, tufala lusim olketa net blong tufala an go wetem Jisas nao.

19Nao Jisas hemi wakabaot lelebet go moa an hemi lukim Jemes an Jon, tufala san blong Sebedi. Tufala sidaon insaet long bot blong olketa, an go-gohed fo mekem gud moa net blong olketa. 20Nao taem ya nomoa, Jisas hemi kolem tufala brata ya fo falom hem tu. So semtaem nomoa, tufala lusim dadi blong tufala Sebedi insaet long bot ya wetem olketa wakaman blong olketa, an tufala go wetem Jisas nao.

Jisas tisim olketa pipol long preahaos long Kapaneam

(Luk 4:31-37)

21Nao Jisas wetem olketa disaepol blong hem olketa kam kasem taon long Kapaneam. Nao long Sabat de nomoa, Jisas hemi go insaet long preahaos,#1:21 “preahaos” Lukim long diksonari. an hemi stat fo tisim olketa pipol nao. 22An#Matiu 7:28-29. olketa pipol wea olketa herem toktok blong hem ya, olketa barava sapraes long tising blong hem, bikos wei wea hemi toktok ya hemi somaot klia dat hemi garem paoa ya. Toktok blong hem ya hemi barava no olsem tising blong olketa tisa blong Lo.

23Nao long taem ya tu, wanfala man wea ravis devol hemi stap long hem, hemi stap insaet long preahaos ya an hemi singaot bikfala olsem, 24“?Jisas blong Nasaret, wanem nao yu wande fo duim long mifala ya? !Ating yu kam fo spoelem mifala ya! !Mi save long yu finis nao, olsem yu barava Holi Man blong God ya!”

25So Jisas hemi tokstrong long devol ya olsem, “!Yu kuaet, yu kamaot from man ya!”

26Nao ravis devol ya hemi mekem bodi blong man ya barava seksek fogud. An semtaem hemi mekem hem fo singaot bikfala moa, an hemi kamaot from hem nao. 27Evriwan olketa barava sapraes fogud nao an olketa stat fo tok olsem tugeta long olketa seleva, “?Wanem nao ya? !Ating niu kaen tising moa ya, an hemi tokstrong olsem man hu hemi garem paoa nao! Nomata olketa ravis devol ya tu, taem hemi tokstrong long olketa, olketa save obeim hem nomoa.”

28An kuiktaem nomoa ya, nius abaotem Jisas hemi go kasem evri ples long provins long Galili nao.

Jisas mekem plande sik pipol fo gudbaek moa

(Matiu 8:14-17; Luk 4:38-41)

29Taem Jisas wetem Jemes an Jon an olketa nara disaepol moa olketa kamaot long preahaos ya nomoa, olketa go stret nao long haos blong Saemon an Andru. 30Taem Jisas hemi go kasem haos nomoa, olketa talem hem dat mami-inlo blong Saemon hemi leidaon long bed, from hemi sik wetem fiva nao. 31So Jisas hemi go long hem an hemi holem han blong hem fo mekem hem stanap. An semtaem nomoa, disfala fiva ya hemi finis from hem nao ya. An bihaen, hemi redim kaikai fo olketa.

32Kasem ivining, bihaen san hemi godaon nomoa, olketa pipol tekem kam enikaen man wea olketa garem sik an olketa wea devol i stap long olketa. 33Evri pipol long taon ya olketa kam hipap long frant blong haos ya nao. 34An Jisas hemi mekem plande pipol wea olketa garem deferen kaen siknis fo gudbaek moa. An hemi raosim tu plande devol fo goaot from olketa pipol. Bat hemi no letem olketa devol ya fo toktok,#1:34 “Bat hemi no letem olketa devol ya fo toktok” Jisas hemi no laek fo talemaot klia yet, wea hemi Mesaea an San Blong God. Lukim Mak 9:9. bikos olketa save long hem finis.

Jisas talemaot toktok blong God long Galili

(Luk 4:42-44)

35Long barava eli moning, taem san hemi no kamap yet, Jisas hemi wekap nomoa an hemi go nao long wanfala ples wea no eniwan stap long hem, an hemi prea. 36Bihaen nomoa, Saemon an olketa fren blong hem olketa go-gohed fo lukaotem Jisas nao. 37An taem olketa faendem hem nomoa, olketa talem hem olsem, “!Evriwan ya olketa gohed fo lukaotem yu ya!”

38Bat Jisas hemi sei long olketa olsem, “Yumi mas go moa long olketa nara taon, mekem mi save talemaot toktok blong God long olketa tu, dastawe nao mi kam long hia.”

39So#Matiu 4:23; 9:35. hemi go-goraon long evri ples insaet long Galili fo talemaot toktok blong God insaet long olketa preahaos, an hemi gohed fo raosim olketa devol goaot from olketa pipol.

Man wea hemi garem ravis sik blong skin

(Matiu 8:1-4; Luk 5:12-16)

40Long wanfala taem, wanfala man hu hemi garem ravis sik blong skin#1:40 “ravis sik blong skin” Long Grik langguis hemi sei “lepra” bat sik ya hemi no diskaen sik wea yumi kolem “leprosi” tude. Lukim Levitikas 13 an lukim long diksonari. hemi kam an nildaon long frant blong Jisas an kraeaot, “Plis, sapos yu wiling, yu save mekem mi gudbaek moa.”#1:40 “gudbaek moa” Long langguis long Grik hemi sei,“klin moa” Lukim “Klin” long diksonari.

41Nao Jisas hemi sore tumas#1:41 “hemi sore tumas” Samfala olfala kopi long Mak olketa sei,“hemi kros tumas”. long hem, so hemi tasim man ya an hemi sei long hem, “Ya, mi wiling. !Yu gudbaek nao!” 42An semtaem nomoa disfala ravis sik blong skin ya, hemi finis nao from man ya an bodi blong hem hemi gudbaek moa. 43-44An#Levitikas 14:1-32. Jisas hemi tokstrong long man ya olsem, “Yu no stori abaotem diswan long eniwan. Bat yu mas go an letem prist fo lukluk long bodi blong yu fastaem. An bihaen, yu mas go an mekem sakrifaes olsem Mosis hemi bin talem, mekem olketa save dat yu gudbaek finis nao.” Nao semtaem nomoa, Jisas hemi sendem go man ya nao.

45Bat taem man ya hemi go nomoa, hemi stat fo talemaot nius ya long evri ples nao. So from diswan nao Jisas hemi no save wakabaot go insaet long eni vilij long ae blong olketa pipol. Hemi stap aotsaet nomoa long olketa ples wea no eniwan hemi stap long hem, bat olketa pipol ya olketa ka-kam from evri ples fo lukim hem nomoa.

Currently Selected:

Mak 1: SIDC

Highlight

Copy