Emos 4
4
1 (Profet) Yufala olketa ris woman long Samaria, yufala barava fat fogud olsem olketa buluka long Basan. Yufala mas lisin gudfala long disfala toktok. Oltaem yufala gohed fo tritim nogud olketa hu i no save faet, an yufala gohed fo daonem olketa pua pipol. An oltaem yufala tokstrong long olketa hasban blong yufala fo tekem kam staka waen fo yufala. 2Lod Yawe hemi barava holi, an hemi promis finis olsem, ?Wanfala de, olketa enemi bae i kam an hukum yufala long olketa huk, an pulum yufala goaot olsem fis. 3An bae olketa pulum yufala go long olketa hol long bikfala wolston blong taon ya an torowem yufala go aotsaet, long saet go fo maonten long Hemon.?
Hem nao mesij blong Yawe.
Olketa pipol blong Israel i bikhed tumas
4Yawe hemi tok moa olsem, ?!Olketa pipol blong Israel! Yufala laekem tumas fo kam long disfala tambuples long taon long Betel fo mekem wosip, bat yufala gohed nomoa fo sin. An yufala laek fo go moa long disfala tambuples long taon long Gilgal fo mekem wosip, bat yufala gohed fo dabolem nomoa olketa wei blong yufala fo sin. Nomata yufala gohed fo bonem sakrifaes long mi long evri moning, an nomata yufala gohed fo tekem kam wan-tent long olketa samting blong yufala fo givim long mi long evri mektri de,#4:4 Disfala sakrifaes wea God hemi tokabaotem, olketa pipol sud mekem wanfala taem nomoa long wanfala yia, an i no long evri de. Lukim 1 Samuel 1:21. An olketa sud tekem kam wan-tent long olketa samting blong olketa fo givim long God wanfala taem nomoa long evri mektri yia, an i no long evri mektri de. Lukim Diutronomi 14:28. wei blong yufala hemi nogud tumas. 5Taem yufala bonem bred wetem yist fo tengkiu long mi,#4:5 Lo blong olketa pipol blong Israel hemi no letem olketa pipol fo bonem bred wetem yist antap long olta fo tengkiu long God. Lukim Levitikas 2:11; 7:12-13. yufala gohed nomoa fo sin. An taem yufala givim kam olketa ofaring long mi wea hemi ovam mak wea Lo hemi putum, yufala tok praod tumas an gohed fo haemapem yufala seleva long hem. !Hem nao olketa samting wea yufala laekem tumas fo duim!?
Hem nao mesij blong Lod Yawe.
6Yawe hemi gohed fo tok olsem, ?Mi nao bin mekem bikfala taem blong hanggre fo kasem evri ples blong yufala, bat nomata olsem, yufala nating tane nomoa from olketa ravis wei blong yufala an kambaek moa long mi. 7An mi nao bin stopem fo hemi no ren taem olketa gaden blong yufala i barava nidim wata. Mi letem fo hemi ren nomoa long samfala taon, bat i no long olketa narafala taon. Mi letem fo hemi ren nomoa long samfala gaden, bat long olketa narafala gaden hemi barava drae an olketa kolsap dae nao. 8Olketa pipol blong samfala taon i barava dae nao fo dring. So olketa go long olketa narafala taon fo faendem wata bat wata hemi nating naf nomoa fo olketa evriwan. !Bat nomata olsem, yufala nating tane kambaek nomoa long mi!
9?Mi nao bin sendem kam hot win fo kilim dae olketa gaden blong yufala, an mi bin sendem kam staka ren fo spoelem olketa grep tri long olketa plantesin blong yufala. An mi nao bin letem olketa grashopa fo kaikaim olketa fig tri an olketa oliv tri. !Bat yufala nating tingting kambaek nomoa long mi!
10?Mi nao bin sendem disfala ravis sik fo kasem yufala, olsem wea mi bin sendem bifoa fo kasem olketa pipol blong Ijip. An mi bin letem olketa enemi fo kilim dae evri yang man blong yufala long faet, an fo tekem olketa hos blong yufala tu. Mi nao bin mekem ples blong yufala fo smel nogud long bodi blong olketa man ya hu i dae finis. !Nomata olsem, yufala nating tanem nomoa tingting blong yufala fo kambaek long mi!
11?Mi nao bin kilim dae samfala long yufala olsem wea mi bin kilim dae olketa pipol blong Sodom an Gomora. Yufala hu i laef yet, yufala lake ya bikos yufala olsem wanfala stik wea man hemi pulumaot from wanfala bikfala faea. !Bat nomata olsem, yufala nating tanem nomoa tingting blong yufala fo kambaek long mi! 12!Yufala pipol long Israel! !From diswan nao, bae mi barava panisim yufala fogud! So, yufala evriwan mas redim yufala seleva fo stanap frant long mi taem mi jajem yufala.?
Hem nao mesij blong Yawe.
(Profet hemi tok)
13God nao hemi garem paoa fo mekem olketa maonten,
hem tu hemi save mekem win fo hemi blou,
an hemi letem olketa pipol fo save long tingting blong hem.
Hemi garem paoa fo mekem delaet fo hemi tudak.
Hemi hae tumas, an hemi gohed fo rul long evri ples long wol.
Nem blong hem nao Yawe, God hu hemi garem evri paoa.
Currently Selected:
Emos 4: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
