Emos 5
5
Olketa pipol blong Israel mas tanebaek from evri sin blong olketa
1 (Profet) !Olketa pipol blong Israel! Yufala mas lisin gudfala long disfala singsing wea mi singim fo olsem krae blong mi long dae blong yufala. Disfala singsing hemi olsem:
2!Ooo Israel! !Ooo Israel!
Olketa enemi blong yu i kilim yu dae
an yu no save laefbaek moa enitaem.
Yu dae nomoa long ples blong yu,
bat no eniwan nao save helpem yu.
!Ooo Israel! !Ooo Israel!
3Dastawe nao Lod Yawe hemi tok olsem, ?1,000 soldia long wanfala taon long Israel i goaot fo faet, bat 100 nomoa i laef an kambaek. An 100 soldia blong narafala taon tu i goaot fo faet, bat tenfala nomoa i laef an kambaek.?
4Yawe hemi tok moa olsem long olketa pipol blong Israel, ?!Yufala mas kambaek moa long mi! Sapos yufala kambaek long gudfala wei blong mi, bae yufala save stap gudfala. 5Yufala mas no go long taon long Beereseba o long taon long Betel fo mekem wosip, bikos olketa enemi bae i spoelem Betel finis nao. An yufala mas no joen wetem olketa pipol long taon long Gilgal, bikos olketa bae i kamap slev long narafala kantri.?
6 (Profet) !Yufala mas kambaek long Yawe! Sapos yufala kambaek long hem, bae yufala save stap gudfala. Bat sapos yufala pipol blong Israel i no kambaek long hem, bae hemi kamdaon long yufala olsem wanfala bikfala faea wea hemi bone, an bae hemi bonem yufala evriwan long Betel. Ya, no eniwan nao save kilim dae disfala faea. 7!Yufala hu i spoelem olketa stretfala wei blong pipol an sensim long olketa barava ravis wei blong yufala, yufala lisin kam long mi!
8-9Yawe nao hemi garem paoa.
Hemi mekem olketa sta
an hemi putum olketa long skae.
Hemi mekem tudak fo kamap delaet,
an hemi mekem de fo kamap naet.
Hemi mekem wata fo goap long skae,
an hemi mekem hem kamdaon moa long wol olsem ren.
Hemi garem paoa olsem laetning fo spoelem finis
olketa strong man blong disfala wol,
an fo brekemdaon olketa strongfala sefples
blong olketa fo haed long hem.
!Ya, nem blong hem nao, Yawe!
10Wei blong yufala long kot hemi nogud tumas. Sapos wanfala stretfala man hemi kamap an hemi talem evri tru toktok, o hemi agensim ravis wei ya long kot wea olketa trae fo ravem samwan, yufala heitem diskaen man ya. 11Oltaem, hemi olsem wea yufala step nomoa long olketa puaman an yufala stilim kaikai blong olketa tu long disfala wei wea yufala gohed fo ravem olketa. From diswan nao, bae yufala no save stap insaet long olketa haos wea yufala bin wakem long ston, an yufala no save dringim waen long olketa gudfala grep tri wea yufala bin plantem. 12Mi savegud finis long yufala. Plande taem nomoa yufala gohed fo brekem olketa Lo, an olketa sin blong yufala hemi barava nogud tumas. Yufala tekem seleni long olketa nogud man fo saet wetem olketa long kot, so yufala spoelem olketa puaman an fo ravem olketa mekem olketa lus nomoa long kot nomata olketa tok tru. 13Ya, long taem olsem diswan wea olketa ravis pipol i spoelem narafala pipol olsem yufala ya duim, man hu hemi laek fo talem tru samting long kot, hemi sud stap kuaet nomoa.
14!Yufala mas lusim olketa ravis wei blong yufala an kambaek long gudfala wei blong Yawe! Sapos yufala kambaek long disfala gudfala wei, bae yufala save stap gudfala. Distaem yufala talem dat Yawe, God hu hemi garem evri paoa, hemi stap olowe wetem yufala. !Bat diswan hemi nating tru! Bat sapos yufala gohed fo falom stretfala wei olsem wea mi bin talem, bae Yawe hemi stap tru wetem yufala olowe nao. 15!Yufala mas lusim olketa ravis wei an falom nomoa olketa wei wea hemi stret! An taem yufala mekem kot yufala mas mekem nomoa long stretfala wei. Sapos yufala duim olsem, maet Yawe bae hemi sore long yufala blong Israel hu i laef yet an maet hemi no panisim yufala.
16-17Dastawe nao Yawe, Masta hu hemi garem evri paoa, hemi tok olsem, ?Bae mi kam fo panisim yufala. An bae yufala krae fogud falom olketa rod insaet long taon blong yufala. Olketa pipol wea yufala peim fo krae fo yufala bae i krae fogud fo yufala. Bat hemi no naf, so bae yufala kolem kam olketa pipol hu i waka insaet long olketa gaden fo helpem yufala fo krae. Oltaem pipol i hapi insaet long olketa plantesin blong grep, bat long taem wea mi kam fo panisim yufala, bae yufala evriwan i krae fogud.?
Hem nao toktok blong Yawe.
Olketa pipol blong Israel i trastem laea wosip
18 (Profet) !Sore tumas long yufala hu i barava laek fo lukim disfala De blong Yawe! ?Watkaen gudfala samting nao bae yufala garem long disfala De? ?Yufala tingse disfala De ya bae hemi delaet? Nomoa ya, bae hemi tudak. 19Long datfala De, bae hemi olsem wea wanfala man hemi ranawe from wanfala laeon, an taem hemi gohed fo ran go, hemi mitim narafala bikfala wael animol moa long frant long hem. O hemi olsem taem wea wanfala man hemi kambaek long haos blong hem, an hemi putum han blong hem go nomoa long wol bat wanfala poesen snek hemi baetem hem nao. 20Long datfala De blong Yawe, bae hemi tudak an no eni laet nao bae hemi saen.
21Yawe hemi tok moa olsem, ?Mi barava heitem olketa fist an olketa miting wea yufala mekem fo wosipim mi, mi barava les long olketa. 22Nomata yufala mekem olketa sakrifaes long animol wea i mas barava bone, mi barava les long olketa. Nomata yufala givim kam olketa presen long kaikai from gaden, mi les long olketa tu. An nomata yufala mekem sakrifaes long olketa fat animol fo talem tengkiu long mi, mi nating laekem nao. 23Mi barava les fo herem disfala noes wea yufala mekem taem yufala singsing an ringim gita fo preisim mi an wosipim mi. 24!Yufala olketa pipol blong mi! !Yufala mas lusim disfala ravis wei blong yufala! Yufala mas no spoelem olketa narafala pipol, an yufala mas stret olowe long laef blong yufala, olsem wea wanfala bikfala riva hemi ran olowe an hemi no save drae enitaem.
25?!Olketa pipol blong Israel! Fo fotifala yia mi bin lidim olketa grani blong yufala bifoa long drae eria. ?Long datfala taem, hu nao olketa bin mekem sakrifaes an givim ofaring fo wosipim hem? ?Waswe, olketa mekem sakrifaes kam long mi? !Nomoa nao! 26-27Olketa bin lusim mi finis an wosipim tufala kaving god ya Sakut, disfala king god blong olketa, an Kaewan,#5:26-27 ?Sakut?, ?Kaewan? Sakut an Kaewan i tufala laea god blong Asiria. disfala sta god blong olketa. !Yufala tu i gohed fo duim disfala semsamting! From diswan nao, bae mi mekem olketa enemi fo fosim yufala fo lusim lan blong yufala an stap long wanfala farawe ples narasaet go long taon long Damaskas. An taem yufala go, bae yufala mas karim go tufala kaving god ya blong yufala.?
Hem nao toktok blong Yawe, wea nem blong hem nao God hu hemi garem evri paoa.
Currently Selected:
Emos 5: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
