MARKA 8

Ta Yesu loko a engeta a andzisa swinkwa ra vumbirhi.

1Emasikwini lawa, vunyingi lebyikulu a byi ri kona, kambe a va pfumala swakudya; kutani Yesu a vitana vadyondzisiwa va yena, a ku eka vona: 2“Ndzi twela vunyingi lebyi, vusiwana; hikuva hi masiku manharhu va tshamile eka mina va nga ri na swakudya. 3Kungakuloko ndzi va tlherisela ekaya ka vona va ri ni ndlala, va nga hela matimba endleleni, hikuva van'wana va vona va tile hi le kule.” 4Vadyondzisiwa va yena va n'wi hlamula, va ku: “Va nga laveriwa kwihi swinkwa leswi va nga xurhaka ha swona kwala emananga xana?” 5A va vutisa, a ku: “Mi ni swinkwa swingani?” Va ku: “Ntlhanu na swimbirhi.” 6Kavaloko a lerisa vunyingi leswaku va tshama ehansi, kutani a teka swinkwa swa ntlhanu na swimbirhi; kuteloko a khensile, a phema, a nyiketa vadyondzisiwa va yena leswaku va phamela vanhu; vona va avela vunyingi. 7Kambe a va ri ni tinhlampfinyana ti nga ri tingani; kuteloko a khensile, a lerisa leswaku na tona ti averiwa vanhu. 8Kutani va dya, va xurha, va ko va rhola ntlhanu wa swirhundzu na swirhundzu swimbirhi swa mahlanhla lama seleke. 9Kasi lava nga dya a va lava ku endla mune wa makume ya madzana, (4 000). Kutani a va tlherisa.

Ta comela xa Vafarisi.

10Kutani a hatlisa ku nghena ebyatsweni ni vadyondzisiwa va yena, a ya etikweni ra Dalmanuta. 11Kavaloko Vafarisi va huma, va sungula ku kanetana na yena, va kombela masingita lama humaka etilweni, ku n'wi ringa. 12Kutani a hefemuteka emoyeni wa yena, a ku: “Rixaka leri, ri kombelela yini masingita? Kunene ndza mi byela, ndzi ri: Rixaka leri ri nga ka ri nga nyikiwi masingita!” 13Kutani a va tshika a tlhela a nghena ebyatsweni, a tlhandlukela entsungeni.

14Kambe vadyondzisiwa a va rivele ku teka swinkwa, a va ri ni xinkwa xin'we ntsena ebyatsweni. 15Kutani a va laya, a ku: “Tivoneleni, mi chava comela xa Vafarisi, ni comela xa Heroda!” 16Kutani va tsundzuxana, va ku: “Kumbe hi leswi hi nga riki na swinkwa.” 17Kuteloko Yesu a swi twa, a ku eka vona: “Xana mi anakanya leswaku ndzi vula sweswo hi leswi mi nga tekangiki swinkwa xana? Timbilu ta n'wina ta ha nonon'hwa ni sweswi xana? 18Leswi mi nga ni mahlo, a mi voni ha yini-ke? Ni leswi mi nga ni tindleve, a mi twi ha yini-ke, a mi tsundzuki ha yini-ke? 19Xana siku ndzi phameleke lava ntlhanu wa makume ya madzana swinkwa swa ntlhanu, a mi tekile swirhundzu swingani leswi teleke mahlanhla-ke?” Va ku eka yena: “Khume na swimbirhi.” 20“Ni siku ndzi phameleke lava mune wa makume ya madzana swinkwa swa ntlhanu na swimbirhi, a mi tekile swirhundzu swingani leswi teleke mahlanhla xana?” Va ku: “Ntlhanu na swimbirhi.” 21Kutani a ku eka vona: “A mi twisisi ha yini-ke?”

Ta ku hanyisiwa ka lowo fa mahlo wa Betsayida.

22Kutani va fika eBetsayida. Va n'wi tisela lowo fa mahlo, va n'wi khongela leswaku a n'wi khumba. 23Kutani a khoma lowo fa mahlo hi voko, a n'wi yisa ehandle ka muti, a n'wi tota mahlo hi marhi, a n'wi tlhandleka mavoko henhla, a n'wi vutisa, a ku: “Xana u vona yini?” 24Kuteloko a langutile, a ku: “Ndzi vona vanhu, ndzi va vona loko va famba va fana ni mirhi.” 25Kutani a tlhela a n'wi veka mavoko emahlweni a n'wi langutisa kutani a hanyisiwa, a vona swinene swilo hinkwaswo. 26Kutani a n'wi tlherisela ekaya ka yena, a ku: “U nga tshuki u nghena emutini.”

Yesu Kriste i mani?

27Kutani Yesu a suka ni vadyondzisiwa va yena ku ya emitini ya Khezariya wa Filipi. Kakuloko va ha ri endleleni, a vutisa vadyondzisiwa va yena, a ku: “Vanhu va ri ndzi mani xana?” 28Va hlamula, va ku: “Van'wana va ri u Yohane Mukhuvuri, van'wana va ri u Eliya, van'wana va ri u un'wana wa vaprofeta.” 29Kutani a ku eka vona: “Xana n'wina mi ri ndzi mani-ke?” Petro a hlamula a ku eka yena: “U Kriste.” 30Kutani a va laya ngopfu leswaku va nga tshuki va n'wi vula eka munhu, hambi a ri un'we.

Ta Yesu loko a vula nhlomulo wa yena ni rifu ra yena.

31Kutani a sungula ku va dyondzisa leswaku a swi fanela N'wana wa Munhu leswaku a twisiwa ku vaviseka lokukulu, a tshikiwa hi vakulukumba ni vaprista ni vatsari, kutani a dlawa, a ta tlhela a pfuka hi siku ra vunharhu. 32A a va byela mhaka yeleyi erivaleni; kambe Petro a n'wi tekela etlhelweni, a sungula ku n'wi tshinya. 33Kambe yena a rhendzeleka, a languta vadyondzisiwa va yena, a tshinya Petro, a ku: “Suka eka mina Satana, hikuva a ku twi swa Xikwembu, u twa swa vanhu ntsena.”

Ta ku landza Yesu.

34Kuteloko a vitanile vunyingi ni vadyondzisiwa va yena, a ku eka vona: “Munhu, hambi a ri mani na mani loyi a rhandzaka ku ndzi landza, a a titshike, a tirhwexe xihambano xa yena, kutani a ndzi landza. 35Hikuva la rhandzaka ku hlayisa vutomi bya yena, u ta lahlekeriwa ha byona; kambe la lahlekeriwaka hi vutomi bya yena hikwalaho ka mina ni Evhangeli, u ta byi hlayisa. 36Hikuva munhu, hambi a nga fuwa misava hinkwayo, kambe a lahlekeriwa hi moya wa yena, swi ta n'wi pfuna yini-ke? 37Kumbe munhu a nga xava moya wa yena ha yini-ke? 38Hikuva loyi a nga ni tingana hikwalaho ka mina ni marito ya mina, emahlweni ka rixaka leri ra vaoswi ni ra vadyohi, na yena N'wana wa Munhu u ta khomiwa hi tingana hikwalaho ka yena, siku a taka vuya hi ku kwetsima ka Tata wa yena swin'we ni tintsumi leto kwetsima.”

Currently Selected:

MARKA 8: TSO29

Highlight

Copy