MARKA 16
16
Ta ku pfuka ka Yesu.
1Kuteloko Savata ri hundzile Mariya wa Magadala, na Mariya mana wa Yakobo, na Salome va xava mirhi leyi nun'hwelaka ku ya n'wi tota. 2Nimpundzu hi siku ro sungula ra vhiki, va ya esirheni, loko dyambu ri huma. 3A va ri karhi va vutisana, va ku: “I mani la nga ta hi vumbuluxela ribye, a ri susa enyangweni ya sirha?” 4Kambe loko va languta, va vona leswaku ribye ri vumbuluxiwile; kasi a ri ri lerikulu ngopfu.
5Loko va nghenile esirheni, va vona jaha leri tshameke etlhelweni ra xinene, leri ambaleke nguvu leyo leha, leyo basa; kutani va tshuka. 6Kambe ri ku eka vona: “Mi nga chaveni, mi lava Yesu wa Nazareta la vambiweke; u pfukile, a nga kona la; vonani laha ingi a vekiwile kona. 7Fambani, mi ya byela vadyondzisiwa va yena, na Petro, leswaku u ta mi rhangela emahlweni ku ya eGaleliya; mi ta n'wi vona kona hilaha a mi byeleke hakona.” 8Vona va hatlisa va huma esirheni, va tsutsuma va khomiwa hi ku rhurhumela ni ku hloleriwa; kambe a va byelanga munhu nchumu, hikuva a va tshukile.
9Kambe Yesu, kuteloko a pfukile empundzwini wa siku lero sungula ra vhiki a tikombisa eku sunguleni eka Mariya wa Magadala, loyi a hlongoleke mademona ya ntlhanu na mambirhi eka yena. 10Kutani yena a ya byela lava ingi va ri na Yesu, va le nkosini, va rila; 11volavo, loko va yingisa leswaku wa hanya, ni leswaku u voniwile hi yena, a va pfumelanga.
12Endzhaku ka swona, a tikombisa hi xivumbeko xin'wana eka vambirhi va vona loko va ri karhi va famba erivaleni. 13Vona va tlhela, va ya byela van'wana, kambe na vona, a va va pfumelanga.
14Eku heteleleni, a tikombisa eka lava khume na un'we loko va tshamile eswakudyeni, kutani a sola ku kaneta ka vona, ni ku nonon'hwa ka timbilu ta vona, hikuva a va nga pfumelanga lava n'wi voneke loko a pfukile.
15Kutani a ku eka vona: “Yanani emisaveni hinkwayo, mi ya byela swivumbiwa hinkwaswo Evhangeli. 16La nga ta pfumela, kutani a khuvuriwa u ta hlayiseka; kambe la nga pfumeriki, u ta avanyisiwa. 17Hi wona masingita lama nga ta endliwa hi lava pfumeleke: Va ta hlongola mademona hi vito ra mina, va ta vulavula tindzimi letintshwa; 18va ta khoma tinyoka; kutani, hambi va nga nwa nchumu lowu dlayaka, wu nga ka wu nga va endli nchumu; va ta veka mavoko ehenhla ka lava vabyaka, kutani va ta hanya.”
19Hosi, kuteloko yi vulavurile na vona, yi tekeriwa etilweni, kutani yi ya tshamisa evokweni ra xinene ra Xikwembu.
20Loko va ri vona, va suka, va ya dyondzisa hinkwako, Hosi yi ri karhi yi tirha na vona, yi tiyisa rito hi masingita lawa ingi ma heleketa rona.
Currently Selected:
MARKA 16: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
