MARKA 15
15
Ta Yesu emahlweni ka Pilato.
1Nimpundzu, vaprista lavakulu va endla makungu ni vakulukumba, ni vatsari, ni va huvo hinkwayo. Kuteloko va bohile Yesu, va famba na yena, va ya n'wi nyiketa Pilato.
2Yena Pilato a n'wi vutisa, a ku: “Xana u hosi ya Vayuda xana?” A hlamula, a ku eka yena: “U vula swona.” 3Kavaloko vaprista lavakulu va n'wi hehla hi timhaka leto tala. 4Pilato a engeta a n'wi vutisa, a ku: “Xana a ku hlamuri nchumu-ke? Vona, va ku hehla hi timhaka leto tala!” 5Kambe Yesu a nga hlamulanga nchumu, Pilato a ko a hlamala.
6Hi siku ra nkhuvo, a a tolovele ku va tshunxela mubohiwa un'wana, loyi va n'wi kombelaka. 7Kambe a ku ri ni un'wana la vuriwaka Barabasi la bohiweke ni van'wana lava pfuxeke dzolonga, va dlele munhu edzolongeni. 8Vunyingi byi huwelela, byi sungula ku kombela leswaku a endla kukota leswi a va endlelaka hi masiku. 9Kutani Pilato a va hlamula, a ku: “Xana mi rhandza leswaku ndzi mi tshunxela hosi ya Vayuda xana?” 10Hikuva a tiva leswaku vaprista va n'wi nyiketile yena hi mona. 11Kambe vaprista lavakulu va hlohlotela vunyingi leswaku a va tshunxela Barabasi. 12Pilato a engeta a vulavula, a ku eka vona: “Loko swi ri tano mi rhandza leswaku ndzi endla yini hi loyi mi n'wi vulaka hosi ya Vayuda-ke?” 13Kambe va engeta va huwelela, va ku: “N'wi vambe!” 14Pilato a ku eka vona: “Xana u dyohe yini-ke?” Vona va huwelela hi ku tlurisa, va ku: “N'wi vambe!” 15Kambe leswi Pilato a a rhandza ku tsakisa vunyingi, a va tshunxela Barabasi; loko a ri Yesu kuteloko a n'wi bile, a va nyiketa yena leswaku a vambiwa.
16Kutani masocha ma n'wi yisa exivaveni, hileswaku ehubyeni leyikulu, kutani va hlengeleta ntlawa hinkwawo. 17Kuteloko va n'wi funengetile hi nguvu ya xivunguvungu, va luka harhi ya mitwa, va n'wi rhwexa enhlokweni. 18Kutani va sungula ku n'wi xeweta, va ku: “Xewani, hosi ya Vayuda!” 19Kutani va n'wi ba nhloko hi rihlanga, va n'wi tshwutela hi marhi, kutani va wa hi matsolo, va n'wi khinsamela. 20Kuteloko va n'wi tseketserile, va n'wi funungula nguvu ya xivunguvungu, va n'wi ambexa tinguvu ta yena, kutani va famba na yena ku ya n'wi vamba.
Ta ku vambiwa ka Yesu.
21Kutani va sindzisa un'wana la hundzaka a huma emasin'wini, va ku a rhwala xihambano xa Yesu, a a ri Simoni wa Kirene, tata wa Aleksandro na Rhufasi; 22kutani va n'wi yisa entsungeni wa Gologota; loko ku hundzuriwa hileswaku ntsunga wa ripala. 23Va n'wi nyika vhinyo leyi nga hlanganisiwa ni mirha, leswaku a nwa; kambe a nga yi nwanga. 24Kuteloko va n'wi vambile va avelana tinguvu ta yena, va ti hlahluva hi vuhlolotwana, ku tiva leyi un'wana ni un'wana a nga ta yi kuma. 25Kambe a wu ri nkarhi wa vunharhu loko va n'wi vamba. 26Ku tsariwile papila ra nandzu wa yena leri nge: “Hosi ya Vayuda.”
27Va vamba swidyohi swimbirhi kun'we na yena; xin'wana evokweni ra yena ra xinene, xin'wana eka lera ximatsi. 28 Hi sweswo ku hetiseka tsalwa leri nge: U hlayiwile ni swidyohi.
29Lava hundzaka va n'wi rhuketela, va nikinika tinhloko ta vona, va ku: “Ha! Wena la hlanhlaka tempele, u ku u ta yi pfuxa hi masiku manharhu; 30tihanyise, u xika exihambanweni!” 31Hi mukhuva wolowo, na vona vaprista lavakulu swin'we ni vatsari, va n'wi tseketsela, va ku: “U hanyisile van'wana, kambe yena u tsandzeka ku tihanyisa! 32Kriste, hosi ya Israele, a a xike sweswi exihambanweni, hi ta n'wi vona, hi va hi pfumela.” Ni lava nga vambiwa na yena, a va n'wi rhuketela.
33Kuteloko ku fikile nkarhi wa ntlhanu na wun'we, munyama wu va kona emisaveni hinkwayo, ku fikela nkarhi wa ntlhanu na mune. 34Kutani hi nkarhi wa ntlhanu na mune, Yesu a huwelela hi rito lerikulu, a ku: “Eloyi, Eloyi, lama sabaktani?” hi leswaku: “Xikwembu xanga, Xikwembu xanga, u ndzi tshikele yini?” 35Van'wana lava ngi va ri kwalaho, loko va swi twa, va ku: “Yingisani, u vitana Eliya.” 36Un'wana a tsutsuma, kuteloko a tatile xikhuvi hi ntsuvi, a xi tlhoma erihlangeni, a n'wi nwisa, a ku: “Tshikani, hi ta vona loko kunene Eliya a ta ta n'wi hawula.”
37Kambe Yesu a huwelela hi rito lerikulu, a nyiketa moya.
38Kutani nguvu ya tempele yi handzuka hi le xikarhi, ku sungula ehenhla ku fika ehansi.
39Ndhuna ya dzana leyi yimeke kwalaho emahlweni ka yena, kuteloko yi vonile hilaha a nga nyiketa moya loko a huwelela, yi ku: “Kunene, munhu loyi, a a ri N'wana wa Xikwembu.”
40Kambe vavasati a va ri kona, va languta va ri ekule, exikarhi ka vona a ku ri na Mariya wa Magadala, na Mariya, mana wa Yakobo lontsongo na Yose, na Salome. 41Hi lava, loko a ha ri eGaleliya, va nga n'wi landza, va n'wi tirhela, va ri ni van'wana lavo tala, lava tlhandlukeleke na yena eYerusalema.
Ta ku lahliwa ka Yesu.
42Loko dyambu ri perile, hikuva a ri ri siku ra ku lunghisa, hileswaku leri tlhandlamiwaka hi Savata, 43ku ta Yosefa wa Arimatiya, wanuna wa huvo, la tlhariheke, loyi a languteleke ku fuma ka Xikwembu na yena; a kanya mbilu, a nghena eka Pilato, a kombela ntsumbu wa Yesu.
44Kutani Pilato a hlamala hi leswi a nga hatlisa ku fa; kavaloko a vitana ndhuna ya dzana, a yi vutisa leswaku i khale xana a file. 45Kuteloko a swi twile eka ndhuna ya dzana, a nyika Yosefa ntsumbu. 46Yena a ya xava nguvu ya sirha, a ya hawula ntsumbu wa Yesu, a wu phutsela engubyeni, a wu veka esirheni leri vatliweke eribyeni, kutani a vumbuluxa ribye enyangweni ya sirha.
47Kambe Mariya wa Magadala, na Mariya, mana wa Yose, a va languta laha wu vekiwaka kona.
Currently Selected:
MARKA 15: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
