MARKA 10

Ta ku tshika nsati.

1Yesu, kuteloko a sukile kwalaho, a ya etikweni ra Yudiya, entsungeni wa Yordani. Vunyingi byi vuya, byi hlengeletana eka yena, kutani a engeta a va dyondzisa, hilaha ingi a toloverile hakona.

2Kutani Vafarisi va ta eka yena, va n'wi vutisa hi ku n'wi ringa, va ku: “Xana wanuna a nga pfumeleriwa ku tshika nsati wa yena-ke?” 3A va hlamula, a ku: “Muxe u mi lerisile yini xana?” 4Va ku: “Muxe u hi pfumelerile ku tsala papila ra ku tshika nsati, kutani hi n'wi hlongola.” 5Yesu a va hlamula, a ku: “U mi tsalele ku lerisa loku hikwalaho ka ku nonon'hwa ka timbilu ta n'wina. 6Kambe eku sunguleni, Xikwembu xi endlile wanuna ni wansati. 7Hikwalaho munhu u ta sukela tata wa yena ni mana wa yena, a namarhela nsati wa yena, 8kutani lavambirhi, vi ta va nyama yi ri yin'we. Loko swi ri tano, a va ha ri vambirhi kambe i nyama yin'we. 9Hikwalaho, leswi Xikwembu xi swi hlanganiseke, swi nga ka swi nga avanyisiwi hi munhu.”

10Kutani loko va ri endlwini, vadyondzisiwa va yena va tlhela va n'wi vutisa mhaka yoleyo. 11A ku eka vona: “Un'wana ni un'wana la tshikaka nsati wa yena, kutani a teka un'wana, wa n'wi oswa. 12Ni wansati, loko a tshika nuna wa yena, kutani a tekiwa hi un'wana, wa oswa.”

Ta Yesu loko a katekisa vana.

13Kutani a tiseriwa vana leswaku a va khumba; kambe vadyondzisiwa va tshinya lava va tisaka. 14Yesu, loko a swi vona, a kariha, a ku eka vona: “Tshikani vana va ta eka mina, mi nga tshuki mi va sivela, hikuva ku fuma ka Xikwembu i ka lava fanaka na vona. 15Ndzi tiyisile, ndzi ri eka n'wina: Un'wana ni un'wana la nga amukeriki ku fuma ka Xikwembu tanihi n'wana, a nga ka a nga ngheni kona.” 16Kuteloko a va vukarhile, a va tlhandleka mavoko ehenhla, a va katekisa.

Ta jaha ra mufuwi.

17Kuteloko a humele endleleni, un'wana a tsutsuma, a khinsama emahlweni ka yena, a n'wi vutisa, a ku: “Mufundhisi lonene, ndzi ta endla yini ku dya ndzhaka ya vutomi le byi nga heriki?” 18Yesu a ku eka yena: “U ndzi vulela yini lonene? A ku na lonene loko a nga ri un'we, xi nga Xikwembu. 19 Wa yi tiva milawu leyi nge: ‘U nga tshuki u endla vuoswi, u nga dlayi, u ngi yivi, u nga lumbeti, u nga dyi swa un'wana, u va ni xichavo eka tata wa wena ni mana wa wena.’ ”

20A hlamula, a ku eka yena: “Mufundhisi, hinkwaswo leswo ndzi swi hlayisile ku sukela evuhlangini bya mina.” 21Kuteloko Yesu a n'wi langutile, a n'wi rhandza, kutani a ku eka yena: “U pfumala xilo xin'we: Famba, u ya xavisa hinkwaswo leswi u nga na swona, u nyika swisiwana, kutani u ta va ni xuma etilweni; kutani u ta, u ndzi landza.” 22Kambe a tlhaviwa hi rito leri, a famba a hlunamile, hikuva a a ri munhu wa rifuwo lerikulu.

23Kutani Yesu a rhalarhala, a ku eka vadyondzisiwa va yena: “Swi nonon'hwa ngopfu eka lava nga ni rifuwo ku nghena eku fumeni ka Xikwembu.” 24Vadyondzisiwa va hlamala ngopfu hi marito lawa. Kambe Yesu a engeta a va byela, a ku: “Vana, swa nonon'hwa ngopfungopfu eka lava tshembaka rifuwo ku nghena eku fumeni ka Xikwembu. 25Swi nga olova loko kamela yi nghena hi xuva ra neleta, ku tlula mufuwi ku nghena eku fumeni ka Xikwembu.” 26Kutani ku hlamala ka vona ku engeteleleka, va vutisana, va ku: “Ku ta hlayiseka mani xana?” 27Kutani Yesu a va languta, a ku: “Vona vanhu swi ngi va tsandza, kambe a swi tsandzi Xikwembu, hikuva Xikwembu a xi hluriwi hi nchumu.”

28Kutani Petro a n'wi byela, a ku: “Vona, hina hi tshikile hinkwaswo, hi ku landza.” 29Yesu a hlamula, a ku: “Ndzi tiyisile ndzi ri eka n'wina: Un'wana ni un'wana la tshikeke yindlu, kumbe vamakwavo, kumbe tata wa yena, hambi a ri mana wa yena, hambi nsati, kumbe vana, hambi ma ri masimu, hikwalaho ka mina ni ka Evhangeli, 30emikarhini leyi, u ta nyikiwa ka dzana, tindlu, ni vamakwavo, ni vamanana, ni vana, ni masimu, swin'we ni ku xaniseka, kutani emikarhini leyi nga ta ta, u ta nyikiwa vutomi le byi nga heriki. 31Kambe lavo tala va le ndzhaku va ta va lavo rhanga, kutani lavo rhanga, va ta va va le ndzhaku.”

Ta Yesu loko a engeta a vula ta rifu ra yena.

32Kakuloko va ha ri endleleni, va tlhandlukela eYerusalema, yena Yesu a ri karhi a va rhangela emahlweni; vona a va hlamala; na vona lava n'wi landzaka, a va chava; kutani a engeta a ya etlhelweni ni lava khume na vambirhi, a sungula ku va byela leswi nga ta n'wi humelela, 33a ku: “Vonani, hi tlhandlukela eYerusalema, kutani N'wana wa Munhu u ta nyiketiwa vaprista lavakulu ni vatsari, va ta n'wi avanyisela rifu, va n'wi nyiketa vamatiko; 34va n'wi sola, va n'wi ba, va n'wi tshwutela hi marhi, va n'wi dlaya; kambe u ta pfuka hi siku ra vunharhu.”

Ta ku kombela ka vana va Zebediya.

35Kutani Yakobo na Yohane, vana va Zebediya, va ta eka yena, va ku: “Mufundhisi, hi rhandza leswaku u hi endlela leswi hi nga ta swi kombela.” 36A ku eka vona: “Mi rhandza leswaku ndzi mi endlela yini xana?” 37Va ku eka yena: “Hi nyike leswaku hi tshama eku kwetsimeni ka wena, un'wana evokweni ra wena ra xinene, un'wana eka le ra ximatsi.” 38Kambe Yesu a ku eka vona: “A mi tivi lexi mi xi kombelaka. Xana mi nga swi kota ku nwa exinwelweni lexi ndzi nga ta nwa eka xona, ni ku khuvuriwa hi ku khuvula loku ndzi nga ta khuvuriwa hakona xana?” 39Va ku eka yena: “Hi nga swi kota.” Kambe Yesu a ku eka vona: “Kunene mi ta nwa exinwelweni lexi ndzi nga ta nwa eka xona, mi ta khuvuriwa hi ku khuvula loku ndzi nga ta khuvuriwa hakona; 40kambe loko ku ri ku tshama evokweni ra mina ra xinene, hambi ku ri eka le ra ximatsi, a hi mina ndzi nga nyikaka, kambe swi ta va swa lava lunghiseriweke swona.”

41Kutani lava khume loko va twa mhaka leyi, va sungula ku hlunamela Yakobo na Yohane. 42Kambe Yesu, kuteloko a va vitanele eka yena, a ku eka vona: “Ma tiva leswaku lava vuriwaka tihosi ta matiko va ma fuma, kutani vakulukumba va vona va va fuma hi ku nonon'hwa. 43Swi nga tshuki swi va tano eka n'wina; kambe mani na mani la rhandzaka ku va lonkulu eka n'wina, u ta va nandza wa n'wina; 44kutani mani na mani eka n'wana la rhandzaka ku va lowo rhanga, u ta va nandza wa hinkwavo; 45hikuva, na yena N'wana wa Munhu, a nga telanga ku tirheriwa, kambe ku tirhela, ni ku nyiketa vutomi bya yena ku kutsula lavo tala.”

Ta Bartimiya.

46Kutani va fika eYeriko. Kakuloko Yesu a huma eYeriko ni vadyondzisiwa va yena, a ri ni vunyingi lebyikulu, Bartimiya, lowo fa mahlo, n'wana Timiya, a a tshamile endleleni, a kombela. 47Kuteloko a twa leswaku i Yesu wa Nazareta, a sungula ku huwelela, a ku: “N'wana Davhida Yesu, ndzi twele vusiwana!” 48Lavo tala va n'wi tshinya, va ku a miyela; kambe a engeta a huwelela, a ku: “N'wana Davhida, ndzi twele vusiwana!” 49Kutani Yesu a yima, a ku: “N'wi viteni.” Kutani va vita lowo fa mahlo, va ku eka yena: “Tiyisa mbilu, suka u yima, wa ku vita.” 50Kavaloko a cukumeta nguvu ya yena, a suka, a ta eka Yesu. 51Kutani Yesu a n'wi hlamula, a ku: “U lava ndzi ku endlela yini xana?” Lowo fa mahlo a ku eka yena: “Rabuni, a ndzi tlhele ndzi vona.” 52Yesu a ku eka yena: “Suka, u famba, ku pfumela ka wena ku ku hanyisile.” Kutani a vona kan'we, a vuya a landza Yesu endleleni.

Currently Selected:

MARKA 10: TSO29

Highlight

Copy