MATEWU 8

Ta Yesu loko a hanyisa munhu wa nhlokonho.

1Kuteloko a ngirimela entshaveni, mitshungu leyikulu yi n'wi landzelela. 2Kutani ku fika eka yena munhu wa nhlokonho, a n'wi khinsamela, a ku: “Hosi, loko u swi rhandza, u nga swi kota ku ndzi basisa.” 3Kutani Yesu a tshambuluta voko, a n'wi khumba, a ku: “Ndza swi rhandza, basisiwa.” Sweswo nhlokonho wa yena wu basisiwa hi nomu wolowo. 4Kutani Yesu a ku eka yena: “U nga tshuki u byela munhu; kambe u ya tikomba eka muprista, kutani u humesa mhamba leyi nga lerisiwa hi Muxe, byi ta va vumbhoni eka vona.”

Ta ndhuna ya dzana ya Kapernawume.

5Kakuloko Yesu a nghena eKapernawume, ndhuna ya dzana yi ta eka yena, yi n'wi khongela, 6yi ku: “Hosi nandza wa mina u lo lakahla, endlwini, u ome swirho, u vaviseka ngopfu.” 7Yesu a ku eka yena: “Ndzi ta ya ndzi ya n'wi hanyisa.” 8Kambe ndhuna ya dzana yi angula, yi ku: “Hosi, a swi ku fanelanga ku ta nghena endlwini ya mina, kambe vula rito rin'we ntsena nandza wa mina u ta hanya. 9Hikuva, na mina, ndzi nga munhu la fumiwaka hi van'wana, ndzi ni masocha lama nga ehansi ka mina; loko ndzi ku eka un'wana: ‘Famba!’ wa famba; eka un'wana: ‘Tana!’ wa ta; ni ka nandza wa mina: ‘Endla swo karhi,’ wa swi endla.” 10Kuteloko Yesu a swi twa, a hlamala, a byela lava n'wi landzaka, a ku: “Kunene ndza mi byela, ndzi ku: A ndzi si vona ku pfumela loko tano, ni le Israeleni. 11Hikwalaho-ke ndza mi byela, ndzi ri: Lavo tala va ta huma evuxeni ni le vupeladyambu, va ta tshama eswakudyeni eku fumeni ka matilo, na Abrahama, na Isaka, na Yakobo. 12Kambe vana va ku fuma va ta cukumetiwa ehandle emunyameni, laha mikosi yi nga ta va kona ni ku getsela ka meno.” 13Kwalaho Yesu a ku eka ndhuna ya dzana: “Muka, u endleriwile hilaha u pfumeleke hakona.” Kutani nandza wa yena a hanya enkarhini wolowo.

Ta mukon'wana wa Petro.

14Kutani loko Yesu a ta endlwini ya Petro, a kuma mukon'wana wa yena a lo lakahla, a vabya hi nhloko. 15Kuteloko a n'wi khumbile hi voko, nhloko yi miyela; kutani a pfuka a va tirhela.

16Kute nimadyambu, va n'wi tisela van'wanyana lava nga ni mademona; kutani a hlongola mimoya eka vona hi rito ntsena; kutani a hanyisa hinkwavo lava nga tsakangiki, 17 leswaku ku endleka leswi nga vuriwa hi muprofeta Esaya loko a te: “U titekele mikarhalo ya hina, u tibyarhele ni mavabyi ya hina.”

Ku landza Yesu.

18Kuteloko Yesu a vone mitshungu leyikulu yi n'wi rhendzele, a lerisa vadyondzisiwa va yena leswaku va n'wi perisela entsungeni. 19Kutani mutsari un'wana a n'wi tshinelela a ku eka yena: “Mufundhisi, laha u yaka kona, hambi ku ri kwihi ni kwihi, ndzi ta ku landza.” 20Kutani Yesu a ku eka yena: “Timhungubye ti ni micele, ni tinyanyana ta le tilweni ti ni swisaka, kambe N'wana wa Munhu a nga na laha a nga seketelaka nhloko ya yena kona.” 21Kutani un'wana wa vadyondzisiwa va yena a ku eka yena: “Hosi, ndzi pfumelele ndzi rhanga ndzi ya lahla tatana.” 22Kambe Yesu a ku eka yena: “Ndzi landze, u tshika va ku fa, va lahla va ku fakulobye.”

Ta Yesu loko a miyeta lwandle.

23Kuteloko a nghene ebyatsweni, vadyondzisiwa va yena na vona, va nghena. 24Kutani maswivo, ku pfuka moya wa xihuhuri lexikulu elwandle, byatso byi va byi khubumetiwa hi magandlati; Yesu, yena, a etlele. 25Kavaloko vadyondzisiwa va yena va n'wi tshinelela; va n'wi pfuxa, va ku: “Hosi, hi ponise, ha lova.” 26Kutani a ku eka vona: “Vanhu va ku pfumela lokutsongo, mi ni vutoya ha yini-ke?” Kutani a yima, a tshinya xihuhuri ni lwandle, ku rhula lokukulu ku va kona. 27Kutani vanhu valavo va hlamala ngopfu, va ku: “Yeloyi hi lowo yini, loko a yingisiwa hi mheho ni lwandle?”

Ta Vagadara lava nga ni mademona.

28Kuteloko a fikile entsungeni wa hase, etikweni ra Vagadara, a hlanganisiwa hi vanhu vambirhi lava ngi va ri ni rihuhu va huma emasirheni, va ri lava chavisaka ngopfu; ku nga ri na munhu la nga tiyaka mbilu ku hundza hi ndlela yoleyo. 29Kutani va sungula ku huwelela, va ku: “Hi ni mhaka yihi na wena, Yesu, N'wana wa Xikwembu? Xana u te laha ku hi xanisa, wu nga si va nkarhi wa kona-ke?” 30Kutani kulenyana a ku vonaka ntlhambi lowukulu wa tinguluve, ti ri karhi ti dya. 31Kutani mademona ma n'wi khongela, ma ku: “Kungakuloko u hi hlongola, hi pfumelele hi tiyela entlhambini wa tinguluve.” 32Kutani a ku eka wona: “Yanani.” Kwalaho ma huma ma ya entlhambini wa tinguluve; kutani hi nomu wolowo, ntlhambi hinkwawo wa tinguluve wu tsutsumela eribuwini hi matimba lamakulu, wu tihoxa elwandle, wu ya lova ematini. 33Kutani varisi va tsutsuma va ya emutini; va ya byela hinkwaswo leswi humeleleke varihuhe. 34Kutani hinkwavo va muti va huma ku ya hlangana na Yesu, kuteloko va n'wi vona, va n'wi khongela ngopfu leswaku a suka etikweni ra vona.

Currently Selected:

MATEWU 8: TSO29

Highlight

Copy