MATEWU 9

Ta munhu la omeke swirho.

1Kutani Yesu a nghena ebyatsweni, a tlhela a pela lwandle, a ya emutini wa rikwavo. 2Kutani a tiseriwa munhu la omeke swirho, a lo lakahla, emasangwini. Yesu, kuteloko a vonile ku pfumela ka vona, a ku eka munhu la omeke swirho: “Tiyisa mbilu, n'wananga, swidyoho swa wena u rivaleriwile swona.” 3Kutani van'wanyana va vatsari va ku etimbilwini ta vona: “Loyi, wa sandza.” 4Kavaloko Yesu a tiva ku anakanya ka vona, a ku: “Mi anakanyela yini swo biha etimbilwini ta n'wina? 5Hikuva hi xihi lexi olovaka xana, ku vula leswaku ‘U rivaleriwile swidyoho’, kumbe ku vula leswaku: ‘Yima u tifambela’? 6Kutani sweswi, hileswaku mi tiva leswaku N'wana wa Munhu u ni matimba laha emisaveni ya ku rivalela vanhu swidyoho,” a ku eka lowa ku oma swirho: “Pfuka, u teka masangu ya wena, u ya endlwini ya wena.” 7Kutani yeloyi a pfuka, a ya endlwini ya yena. 8Vunyingi loko byi vona sweswo, va hlamala, va chava, va dzunisa Xikwembu, hikuva xi nyike vanhu matimba layonghasi.

Ta ku vitaniwa ka Matewu.

9Kuteloko Yesu a suke kwalaho, a vona munhu loyi va nge i Matewu, a tshamisile endlwini ya ndzuvo, a ku eka yena: “Ndzi landze!” 10Kutani Matewu a suka a n'wi landza. Kuteloko a tshamile eswakudyeni, endlwini ya yena, valuvisi lavo tala ni vadyohi va nghena va tshama eswakudyeni na Yesu ni vadyondzisiwa va yena. 11Kutani Vafarisi loko va swi vona, va byela vadyondzisiwa, va ku: “Mufundhisi wa n'wina u dyela yini ni valuvisi ni vadyohi xana?” 12Kuteloko Yesu a swi twa, a ku eka vona: “Lava tsakeke a va pfumari n'anga, kambe yi laviwa hi lava vabyaka. 13 Kambe yanani mi ya dyondza rito leri nge: ‘Ndzi rhandza tintswalo, ma nga ri magandzelo!’ Hikuva a ndzi telanga ku vitina lava lulameke eku tshikeni, kambe vadyohi.”

Ta nkarhi wo titsona swakudya.

14Enkarhini wolowo vadyondzisiwa va Yohane va ta eka yena, va ku: “Hina ni Vafarisi hi titsonela yini swakudya, kasi vadyondzisiwa va wena a va titsoni swona xana?” 15Yesu a ku eka vona: “Xana tinxangwana ta muteki ti nga rila, loko muteki a ha ri ka tona xana? Kambe wa ta nkarhi lowu muteki a nga ta susiwa eka vona, hi kona va nga ta titsona swakudya. 16A ku na munhu la nga babelaka xitiva lexintshwa engubyeni; a khale, hikuva xitiva lexi baberiwaka xi nga handzula nguvu, kutani nguvu yi engetelaka ku handzuka. 17Kambe vanhu a va cheri vhinyo leyintshwa emikwameni ya khale, hikuva mikwama yi nga handzuka, kutani vhinyo yi halaka, mikwama, yona, yi onhaka; vhinyo leyintshwa yi cheriwa mikwameni leyintshwa, yi hlayisana swin'we na yona.”

Ta n'wana Yayiro.

18A ku a ha vulavula timhaka teto hi nomu lowu ku fika hosanyana, yi n'wi khinsamela, yi ku: “N'wana wa mina wa wanhwanyana wa ha ku fa sweswi, kambe a hi fambe swin'we u ya n'wi tlhandleka mavoko henhla, a ta tlhela a hanya.” 19Kutani Yesu a suka kun'we ni vadyondzisiwa va yena a n'wi landza.

Ta nsati la nga ni switlhandla.

20Kutani maswivo, wansati un'wana loyi a a ri karhi a karhatiwa hi switlhandla hi malembe ya khume na mambirhi, a n'wi tshinelela hi le ndzhaku, a khumba madziva ya nguvu ya yena, 21hikuva a ku embilwini ya yena: “Hambi ndzi nga khumba nguvu ya yena ntsena, ndzi ta hanya,” 22kutani Yesu a rhendzeleka, a n'wi vona, a ku eka yena:

“Tiyisa mbilu, n'wananga, ku pfumela ka wena ku ku ponisile.” Kutani hi nkarhi wolowo wansati loyi a hanya.

23Yesu, kuteloko a fikile endlwini ya hosanyana, a vona lava ririsaka tinanga, ni vanhu lavo tala va endlaka pongo lerikulu, 24a ku eka vona: “Sukani, hikuva wanhwanyana a nga fanga, u lo etlela,” kambe va n'wi hleka. 25Kuteloko va humesile ntshungu ehandle, a nghena, a khoma wanhwanyana hi voko, kutani wanhwanyana a pfuka. 26Mhaka leyi yi tshama yi twakala etikweni lero hinkwaro.

Nsovo wa Yesu.

27Kakuloko Yesu a suka kwalaho lavo fa mahlo vambirhi va n'wi landza va huwelela, va ku: “N'wana Davhida, hi twele vusiwana.” 28Kuteloko a nghene endlwini, lavo fa mahlo volavo va ta eka yena, kutani Yesu a ku eka vona: “Xana ma pfumela leswaku ndzi nga swi kota ku tirha ntirho lowo-ke?” Va ku eka yena: “Ina, Hosi!” 29Hilaha a khumbaka mahlo ya vona, a ku: “A ku endliwe ka n'wina hi ku pfumela ka n'wina.” 30Kutani mahlo ya vona ma hanyanya; kutani Yesu a va laya ngopfu, a ku: “Tilanguteleni leswaku mhaka leyi yi nga tiviwi hi munhu!” 31Kambe loko va humile va hangalasa ntwalo wa yena etikweni rolero hinkwaro.

32Va ku va huma, Yesu a tiseriwa munhu wa mbheveve, a katsane ni rihuhu. 33Kuteloko ku hlongoriwile demona, lowa mbheveve a vulavula. Kutani mitshungu yi hlamala va ku: “Mhaka leyonghasi a yi si vonaka eIsraeleni.” 34Kambe Vafarisi va ku: “U hlongola mademona hi hosi ya mademona.”

35Kutani Yesu a tsendzeleka hi miti hinkwayo ni swimitana, a dyondzisa emasinagogeni ya kona, a vula Evhangeli ya ku fuma, a hanyisa mavabyi ni mikarhalo ya tinxakaxaka. 36Kuteloko a vone mitshungu, a yi twela vusiwana hikuva a va karhele, a va hangalakile va kota tinyimpfu leti nga riki na murisi. 37Hilaha a nge ka vadyondzisiwa va yena: “Ku tshovela kukulu, kambe vatirhi a hi vangani. 38Khongelani hakona hosi ya ku tshovela, leswaku yi rhuma vatirhi eku tshoveleni ka yona.”

Currently Selected:

MATEWU 9: TSO29

Highlight

Copy