MATEWU 3

Ta Yohane Mukhuvuri loko a dyondzisa.

1Enkarhini wolowo ku humelela Yohane Mukhuvuri, a dyondzisa emananga ya Yudiya, a ku: 2“Hundzukani, hikuva ku fuma ka matilo ku tshinele.” 3 Hikuva hi yena loyi a nga vuriwa hi muprofeta Esaya loko a ku: “Rito ra loyi a huwelelaka emananga, ri ri: ‘Khulelani gondzo ra Hosi, mi lunghisa tindlela ta yena.’ ”

4Yohane yeloyi a funengele nguvu ya voya bya kamela, a tikhame xisuti hi xifungha xa dzovo: swakudya swa yena a ti ri tinjiya ni vulombe bya nhova. 5Kutani va Yerusalema, ni va Yudiya hinkwavo, ni va tiko hinkwaro leri nga ekusuhi na Yordani, va humelela eka yena; 6kutani a va khuvuriwa hi yena eYordani, va ri karhi va tivula swidyoho swa vona.

7Kambe loko a vona Vafarisi ni Vasaduki lavo tala va ta eka yena eku khuvuriweni, a va byela, a ku: “Rixaka ra timhiri, i mani a nga mi kombisa ku balekela ku kariha loku taka? 8Loko swi ri tano, vekani mihandzu leyi fanelaka ku hundzuka. 9Kutani mi nga tshuki mi tianakanyela mi ku: ‘Hi na Abrahama, a nga tata wa hina’; hikuva ndza mi byela leswaku Xikwembu xi nga pfuxela Abrahama vana hi maribye lawa. 10Kambe xihloka xi vekiwile etimitswini ta mirhi; murhi wun'wana ni wun'wana lowu nga tswariki mihandzu leyo saseka, wu ta tsemiwa, wu hoxiwa endzilweni. 11Loko ndzi ri mina, ndzi mi khuvula hi mati ntsena leswaku mi tshika swo biha, kambe loyi a taka endzhaku ka mina, wa ndzi tlula hi matimba, kutani a swi ndzi faneri ku n'wi rhwalela tintanghu; hi yena la nga ta mi khuvula hi moya lowo kwetsima ni ndzilo. 12Rihlelo ra yena ri le vokweni ra yena, kutani u ta kukula swinenenene xivuya xa yena, u ta hlengeleta mavele ya yena enguleni, mungu, wona, u ta wu hisa endzilweni lowu nga timekiki.”

Ta Yesu loko a khuvuriwa hi Yohane.

13Enkarhini wolowo Yesu a huma eGaleliya a ta eYordani eka Yohane ku ta khuvuriwa hi yena. 14Kambe Yohane a ala, a ku: “Hi mina ndzi fanelaka ku khuvuriwa hi wena, kasi wena u tela yini eka mina xana?” 15Yesu a n'wi hlamula, a ku: “Ndzi pfumelele sweswi, hikuva hi fanele ku heta leswo lulama hinkwaswo.” Kutani Yohane a n'wi pfumelela.

16Kuteloko Yesu u khuvuriwile, a hatlisa a huma ematini; kutani hi nomu lowu, matilo ma pfuleka, a vona Moya wa Xikwembu wu xika, wo ngi i tuva, wu ta ehenhla ka yena. 17Kutani ku twakala rito leri humaka ematilweni, ri ku: “Loyi, i n'wana wa mina, loyi ndzi n'wi rhandzaka, loyi ndzi n'wi tsakelaka.”

Currently Selected:

MATEWU 3: TSO29

Highlight

Copy