MATEWU 2
2
Ta tintlhari ta le vuxeni.
1Yesu, kuteloko a tswariwile Betlehema wa Yudiya, enkarhini wa hosi Heroda, vonani, tintlhari ta le vuxeni ti fika eYerusalema, ti ku: 2“Yi kwihi hosi ya Vayuda leyi tswariweke, hikuva hi vonile nyeleti ya yona hi le vuxeni, kutani hi tile ku ta yi gandzela.” 3Kuteloko hosi Heroda a swi twa, a tshuka, ni va Yerusalema hinkwavo va tshuka na yena. 4Kutani a hlengeleta vaprista lavakulu hinkwavo, ni vatsari va tiko, a va vutisa leswaku: “Kriste a fanela ku tswariwa kwihi xana?” 5Kutani va n'wi byela, va ku: “EBetlehema wa Yudiya, hikuva ku tsariwile sweswo hi muprofeta, u te: 6 ‘Na wena Betlehema, tiko ra Yuda, a ku ntsongo exikarhi ka tihosi ta Yuda, hikuva ku ta huma eka wena mufambisi la nga ta risa tiko ra mina ra Israele.’ ”
7Kwalaho Heroda a vita tintlhari exihundleni, a va vutisa nkarhi lowu nyeleti yi nga vonaka ha wona. 8Kutani a va rhuma eBetlehema, a ku: “Yanani, mi ya vutisa swinene timhaka ta n'wana; kutakuloko mi n'wi kumile, mi ta ndzi tivisa, ndzi ta ya n'wi gandzela, na mina.” 9Kuteloko va twile hosi va suka; nyeleti yoleyo va nga yi vona evuxeni, yi ri karhi yi va rhangela emahlweni, yi fika yi yima ehenhla, laha n'wana ingi a ri kona. 10Kuteloko va vona nyeleti, va tsaka hi ku tsaka lokukulu ngopfu. 11Kutani loko va nghena endlwini, va kuma n'wana ni mana wa yena, Mariya; kutani va khinsama hi matsolo, va n'wi gandzela. Kuteloko va tshunxile mirhwalo ya vona, va n'wi nyika nsuku, ni mirhi ya risuna, ni murhi wa mirha. 12Kutani loko va kombisiwile hi Xikwembu hi norho leswaku va nga ha hundzi hi le ka Heroda, va tlhelela eka rikwavo hi ndlela yin'wanyana.
13Kuteloko va sukile, ntsumi ya Hosi, yi ta eka Yosefa hi norho, yi ku: “Pfuka, u teka xihlangi, ni mana wa xona, u balekela eEgipta, u tshama kona ndzi ko ndzi ku byela, hikuva Heroda u ta lava xihlangi ku xi dlaya.” 14Kwalaho Yosefa a pfuka a teka xihlangi ni mana wa xona nivusiku, a ya chavela eEgipta, 15 a tshama kona, Heroda a kondza a fa, leswaku ku endleka leswi nga vuriwa hi Hosi, hi muprofeta la nga te: “Ndzi vitanile n'wana wa mina a huma eEgipta.”
16Kuteloko Heroda a vone leswaku u kanganyisiwile hi tintlhari, a kariha ngopfu, kutani a rhuma vanhu va ya dlaya vana hinkwavo va Betlehema, ni va tiko hinkwaro ra kona, va malembe mambirhi ni lava va tlhandlamaka, a anakanya nkarhi lowu a nga vutisisa tintlhari. 17Enkarhini wolowo ku endleka leswi nga vuriwa hi muprofeta Yeremiya, loko a te:
18 “Huwa yi twakele eRhama, ya mikosi, ni nhlomulo lowukulu, a nga Rahele a rilelaka vana va yena kutani wa ala ku chaveleriwa, hikuva a va ha ri kona.”
19Kambe, kuteloko Heroda a file, ntsumi ya Hosi yi humelela eka Yosefa eEgipta hi norho, yi ku: 20“Pfuka, u teka xihlangi ni mana wa xona, u tlhelela etikweni ra Israele, hikuva lava ngi va lava ku dlaya n'wana, va file.” 21Kuteloko Yosefa a pfukile, a teka n'wana ni mana wa yena, a tlhelela etikweni ra Israele. 22Kambe loko a twa leswaku Arkelawusi u fuma Yudiya ematshan'weni ya Heroda tata wa yena, a chava ku ya kona; kuteloko a kombisiwile hi Xikwembu enorhweni, a hambukela etikweni ra Galeliya. 23Kuteloko a fike kona, a aka emutini lowu vuriwaka Nazareta; leswaku ku endleka leswi nga vula hi vaprofeta, va ku: “U ta vuriwa Munazarene.”
Currently Selected:
MATEWU 2: TSO29
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.