LUKA 10

Ta ku rhumiwa ka vadyondzisiwa va 70.

1Endzhaku ka sweswo, Hosi yi tlhela yi veka van'wana va ntlhanu wa makume na makume mambirhi, kutani yi va rhuma havambirhi leswaku va n'wi rhangela emahlweni, emitini hinkwayo ni matlhelo hinkwawo laha a nga ta famba kona. 2Hilaha a nga te eka vona: “Ku tshovela kukulu, kambe vatirhi, a hi vangani; khongelani-ke, Hosi ya ku tshovela, leswaku yi rhuma vatirhi eku tshoveleni ka yona. 3Fambani; ndza mi rhuma mi fana ni swinyimpfana exikarhi ka timhisi. 4Mi nga teki xinkwamana xa mali, ni loko wu ri nkwama, kumbe tintanghu; kutani mi nga xewetani na munhu endleleni. 5Loko yi ri yindlu yihi ni yihi leyi mi nghenaka eka yona, rhangani mi ku: ‘Ku rhula a ku ve ni yindlu leyi!’ 6Kutani loko n'wana wa ku rhula a ri kona, ku rhula ka n'wina ku ta tshama eka yena; kambe loko a nga ri kona, ku ta tlhelela eka n'wina. 7Mi tshamisa endlwini yoleyo, mi ri karhi mi dya, mi nwa leswi mi nga ta nyikiwa swona hikuva la tirhaka u lulameriwe hi hakelo ya yena. Mi nga suki endlwini yin'wana ku ya endlwini yin'wana.

8“Kutani loko wu ri muti wihi ni wihi lowu mi nghenaka eka wona, loko va mi amukela, dyanani leswi vekiwaka emahlweni ka n'wina. 9Mi horisa lava vabyaka va kona mi va byela, mi ku: ‘Ku fuma ka Xikwembu ku mi tshinelele.’ 10Kambe loko wu ri muti wihi ni wihi lowu mi nghenaka eka wona, kutani va nga mi amukeri, humelani emitsendzeleni, mi ku: 11‘Ntshuri wa muti wa n'wina lowu hi namarheleke, hi wu phumunhela eka n'wina, hambiswiritano, tivani leswaku ku fuma ka Xikwembu ku mi tshinelele.’ 12Ndza mi byela, leswaku hi siku lero, muti wolowo wu ta fikeriwa hi ku nonon'hwa loku tlurisaka ka Sodoma.

13“U ni khombo wena, Korazini! U ni khombo, wena, Betsayida! Hikuva masingita lama endliweke exikarhi ka n'wina, loko ngi ma endliwile eTiri na Sidoni, miti leyi, ingi yi tisorile khale hi tinguvu leti khwaxaka ni nkuma. 14Hikwalaho eku avanyisiweni, ku ta vevuka eka Tiri na Sidoni ku tlula eka n'wina. 15Na wena Kapernawume, la tlakusiweke ku fika etilweni, u ta tsongahatiwa ku fika etiheleni. 16La mi yingisaka, wa ndzi yingisa; la mi tshikaka, wa ndzi tshika: kutani la ndzi tshikaka, u tshika la ndzi rhumeke.”

Ta ku tlhela ka vadyondzisiwa.

17Lava ntlhanu wa makume na makume mambirhi va tlhela hi ku tsaka, va ku: “Hosi, na wona mademona ma hi yingisa hi vito ra wena.” 18Yena a ku eka vona: “A ndzi vona Satana a wa hi le tilweni tanihi rihati. 19Vonani, ndzi mi nyika matimba ya ku kandziya tinyoka ni swipame, ni le henhla ka matimba hinkwawo ya nala; kutani a ku na nchumu lowu nga ta mi endla swo biha. 20Hambiswiritano, mi nga tsaki hi leswi mademona ma mi yingisaka; kambe tsakani hikuva mavito ya n'wina ma tsariwile etilweni.”

21Enkarhini wolowo, Yesu a tshukatshuka hi ku tsaka emoyeni wa yena a ku: “Ndza ku dzunisa Tatana, Hosi ya le tilweni ni ya misava, hikuva timhaka leti, u ti fihlele lavo tlhariha ni va mano, kambe u ti pfuletele lavatsongo. Ina, Tatana, swi tano, hikuva u swi rhandzise sweswo. 22Kutani a hundzukela eka vadyondzisiwa va yena, a ku: Swilo hinkwaswo ndzi swi nyikiwile hi Tatana; kutani a ku na la tivaka leswaku Tatana i mani, loko a nga ri N'wana, ni loyi N'wana a nga swi rhandzaka ku n'wi pfuletela yena.”

23Kutani a hundzukela eka vadyondzisiwa va yena, a ku eka vona va ri swavo: “Ma katekile mahlo lama vonaka leswi mi swi vonaka! 24Hikuva ndzi ri eka n'wina: Vaprofeta lavo tala ni tihosi va rhandzile ku vona leswi mi swi vonaka, kambe a va swi vonanga; ni ku twa leswi mi swi twaka, kambe a va swi twanga.”

Xifaniso xa Musamariya wa musa.

25Kutani mufundhisi un'wana wa nawu a yima, a ku eka Yesu ku n'wi ringa: “Mufundhisi, ndzi ta endla yini ku va ni vutomi lebyi nga heriki?” 26Yesu a ku eka yena: “Ku tsariwile yini enawini; u hlaya yini kona?” 27 A hlamula, a ku: “Rhandza Hosi, Xikwembu xa wena, hi mbilu hinkwayo ya wena, ni moya hinkwawo wa wena, ni matimba hinkwawo ya wena, ni ku anakanya hinkwako ka wena; ni warikwenu, u n'wi rhandza tanihi loko u tirhandza.” 28Yesu a ku eka yena: “U hlamule swinene, endla swona, u ta hanya.” 29Kambe yena, hikuva a rhandza ku tiendla la lulameke, a ku eka Yesu: “Warikwerhu i mani xana?”

30Kutani Yesu a hlamula; a ku: “Munhu u sukile eYerusalema, a xikela eYeriko, kutani a wela emavokweni va swigevenga; swi n'wi tshunxisa swi n'wi boxa timbanga; kutani swi tifambela, swi n'wi siya a le kusuhi ni ku fa. 31Muprista a humelela, a rhelela hi ndlela yoleyo; kuteloko a n'wi vonile, a papalata. 32Swi tano ni Mulevhi; na yena, kuteloko a fike kwalaho, a n'wi vona, a papalata. 33Kambe Musamariya un'wana la endzaka, a ta kwalaho a nga kona, kuteloko a n'wi vonile, a n'wi twela vusiwana. 34Kavaloko a tshinela, a n'wi bohelela timbanga, a chela mafurha ni vhinyo; a n'wi khandziyisa exifuweni xa yena lexi a xi khandziyeke, a n'wi yisa endlwini ya vaendzi, kutani a n'wi ongola kona. 35Ni mixo, loko a suka, a humesa macheleni mambirhi, a nyika n'wini wa yindlu, a ku eka yena: ‘N'wi hlayise; hinkwaswo leswi u nga ta swi humesa ku tlurisa mali leyi, ndzi ta ku tlherisela swona siku ndzi vuyaka.’ 36I mani eka lavanharhu, la nga warikwavo wa munhu loyi a weleke exikarhi ka swigevenga xana?” 37Yena a ku: “Hi loyi a n'wi endleke hi tintswalo.” Yesu a ku eka yena: “Famba, u endlisa sweswo na wena.”

Ta Marta na Mariya.

38Kakuloko va famba, a nghena emutini, kutani wansati la vuriwaka Marta a n'wi amukela endlwini ya yena. 39A a ri ni makwavo loyi va nge i Mariya, la nga va a tshama emilengeni ya Yesu, a yingisa rito ra yena. 40Kambe Marta a khomiwile ngopfu hi mitirho leyo tala. Kutani a ta eka Yesu, a ku: “Hosi, xana a hi nchumu eka wena loko makwerhu a ndzi tshika ndzi tirha ndzi ri swanga; a ku n'wi byeri leswaku a ndzi pfuna xana?” 41Kambe Yesu a n'wi hlamula, a ku eka yena: “Marta, Marta, u vilela ni ku tikarhata hi leswo tala; 42kasi xilo lexi pfumariwaka i xin'we ntsena, kutani Mariya u tihlawulele ku averiwa loko saseka, loku a nga tiki tekeriwaka kona.”

Currently Selected:

LUKA 10: TSO29

Highlight

Copy