YOHANE 20

Ta ku pfuka ka Yesu.

1Hi siku ro sungula ra vhiki, Mariya wa Magadala a vindzuka a ya esirheni, bya ha ri vusiku, kutani a vona leswaku ribye a ri susiwile esirheni. 2Kavaloko a tsutsuma, a ta eka Simoni Petro, ni ka mudyondzisiwa la nga rhandziwa hi Yesu, a ku eka vona: “Va susile Hosi esirheni, kambe a hi tivi laha va n'wi vekeke kona.”

3Kutani Petro a suka ni mudyondzisiwa lowun'wana, va ya esirheni. 4Va tsutsuma swin'we havambirhi; kambe mudyondzisiwa lowun'wana a siya Petro, a rhanga a ya fika esirheni. 5Kuteloko a korhamile ku hlometela, a vona mikumba yi vekiwile ehansi; kambe a nga nghenanga. 6Kutani Simoni Petro la nga n'wi landza, a fika, a nghena esirheni, kutani a vona mikumba vi vekiwile ehansi; 7kambe nguvu leyi tsondzeleke nhloko ya yena a yi nga vekiwanga ni tin'wana, kambe a yi petsiwile, yi vekiwile hitlhelo yi ri yoxe. 8Mudyondzisiwa lowun'wana, la nga rhanga a fika esirheni, na yena a nghena a swi vona, a va a pfumela. 9Hikuva a va nga si twisisa Tsalwa leri vulaka leswaku Kriste u fanele ku pfuka eku feni. 10Kavaloko vadyondzisiwa va tlhelela ekaya.

11Loko a ri Mariya, a a yimile ehandle, ekusuhi ni sirha, a ri karhi a rila. A ku a ha rila, a korhama ehansi ku hlometela esirheni; 12a vona tintsumi timbirhi leti ambaleke swo basa, ti tshamile, yin'wana yi ri enhlokweni, yin'wana yi ri emilengeni, laha ntsumbu wa Yesu ingi wu latiwile kona. 13Ti ku eka yena: “Wansati, u rilela yini?” Yena a ku eka tona: “Hikuva va susile Hosi yanga, kambe a ndzi tivi laha va n'wi vekeke kona.” 14Kuteloko a vurile sweswo, a hundzuluka, a vona Yesu a yimile; kambe a nga n'wi tivanga leswaku i Yesu. 15Yesu a ku eka yena: “Wansati, u rilela yini? U lava mani xana?” Yena, hi ku ehleketa leswaku i murimi wa ntanga, a ku eka yena: “Hosi, loko u n'wi susile, ndzi byele laha u n'wi vekeke kona, ndzi ta ya ndzi ya n'wi teka.” 16Yesu a ku eka yena: “Mariya!” Yena a rhendzeleka, a ku eka yena: “Rabuni!” hileswaku “Mufundhisi,” hi Xiheveru. 17Yesu a ku eka yena: “U nga ndzi khumbi, hikuva a ndzi si tlhandlukela eka Tatana; kambe yana eka vamakwerhu u ya va byela u ku, ndzi tlhandlukela eka Tatana a nga Tata wa n'wina, ni ka Xikwembu xa mina xi nga Xikwembu xa n'wina”. 18Mariya wa Magadala a ya byela vadyondzisiwa leswaku u vone Hosi, ni leswaku u n'wi byerile timhaka teto.

Ta Yesu loko a tikomba eka vadyondzisiwa.

19Nimadyambu ya siku rero leri sungulaka vhiki, tinyangwa ti pfariwile laha vadyondzisiwa va hlengeletaneke kona hikwalaho ka ku chava Vayuda, Yesu a ta, a yima exikarhi ka vona, a ku eka vona: “Ku rhula a ku ve na n'wina!” 20Kuteloko a vulavurile sweswo, a va komba swandla ni tsheve ra yena. Kutani vadyondzisiwa va tsaka ngopfu loko va vona Hosi. 21Yesu a engeta a ku eka vona: “Ku rhula a ku ve na n'wina! Kukotisa leswi Tatana a ndzi rhumeke, na mina ndzi mi rhumisa sweswo.” 22Kuteloko a vurise sweswo, a huhutela eka vona, a ku: “Amukelani Moya lowo Kwetsima. 23Lava mi nga ta va khomela swidyoho, va ta khomeriwa swona; lava mi nga ta va hlayela swona, va ta hlayeriwa swona.”

24Kambe Tomasi, loyi va nge i Didima, un'wana wa lava khume na vambirhi, a a nga ri na vona loko Yesu a ta. 25Kutani vadyondzisiwa van'wana va ku eka yena: “Hi vonile Hosi.” Kambe a ku eka vona: “Kungakuloko ndzi nga voni timbanga ta timhingu emavokweni ya yena, ni loko ndzi nga nghenisi ritiho ranga etimbangeni ta timhingu, ndzi nghenisa ni voko etsheveni ra yena, ndzi nga ka ndzi nga pfumeri.”

26Kuteloko ku hundzile masiku ya ntlhanu na manharhu, vadyondzisiwa a va ri kona endlwini, na yena Tomasi a a ri na vona. Yesu a ta, tinyangwa ti pfariwile, a yima exikarhi ka vona a ku: “Ku rhula a ku ve na n'wina!” 27Kutani a ku eka Tomasi: “Tisa ritiho ra wena la, languta ni swandla swa mina; tshambuluta ni voko ra wena u ri nghenisa etsheveni ra mina, kutani u nga kanakani, kambe u pfumela.” 28Tomasi a hlamula, a ku eka yena: “Hosi yanga ni Xikwembu xanga!” 29Yesu a ku eka yena: “Leswi u ndzi voneke, Tomasi, u pfumerile; va katekile lava pfumelaka, hambi va nga vonanga.”

30Mahlori man'wana layo tala ma kona lama endliweke hi Yesu emahlweni ka vadyondzisiwa va yena, lama nga tsariwangiki ebukwini leyi. 31Kambe timhaka leti, ti tsariwile leswaku mi pfumela leswaku Yesu i Kriste, N'wana wa Xikwembu, ni leswaku, hi ku pfumela, mi va ni vutomi evitweni ra yena.

Currently Selected:

YOHANE 20: TSO29

Highlight

Copy