YOHANE 19

Ta Yesu loko a xanisiwa, a va a nyiketiwa Vayuda.

1Kavaloko Pilato a teka Yesu, a n'wi ba. 2Kutani tinhenha ti luka harhi ya mitwa, ti n'wi tlhandleka yona enhlokweni; ti n'wi funengeta hi nguvu ya xivunguvungu, 3ti ku: “Xewani, Hosi ya Vayuda!” Kambe ti n'wi ba hi swihahati.

4Pilato a engeta a humela ehandle, a ku eka vona: “Vonani, ndzi n'wi humesile ehandle eka n'wina, mi ta tiva leswaku a ndzi kumi nandzu eka yena hambi wu ri wun'we.” 5Yesu a humela ehandle, a tlhandlekiwile harhi ya mitwa enhlokweni, a funengele xivunguvungu. Kutani Pilato a ku eka vona: Hi yeloye munhu.

6Kambe vaprista lavakulu ni malandza kakuloko va n'wi vona, va huwelela, va ku: “N'wi vambe, n'wi vambe!” Pilato a ku eka vona: “N'wi tekeni, mi ri n'wina, mi ya n'wi vamba; hikuva mina a ndzi voni nandzu eka yena.” 7Vayuda va n'wi hlamula va ku: “Hi ni nawu, kutani hi nawu wa hina u fanele hi ku fa, hikuva u tiendle N'wana wa Xikwembu”.

8Pilato, kakuloko a twa ku vulavula koloko, a engeta a chava. 9Kutani a tlhela a nghena ehubyeni, a ku eka Yesu: “U wa kwihi xana?” Kambe Yesu a nga n'wi hlamulanga. 10Pilato a ku eka yena: “Xana a ku vulavuri na mina ha yini-ke? Xana a ku tivi leswaku ndzi ni matimba ya ku ku vamba, ni matimba ya ku ku tshunxa?” 11Yesu a hlamula, a ku: “A wu nga ti va na matimba ehenhla ka mina ni switsongo, loko u nga ma nyikiwanga hi tilo; hikwalaho, la ndzi nyiketeke wena u ni nandzu lowu tlurisaka.”

12Ku sungula enkarhini lowo, Pilato a lava hilaha a nga ta n'wi tshunxa ha kona; kambe Vayuda va huwelela, va ku: “Loko u tshunxa loyi, a ku rhandzi Khezari.” 13Kuteloko Pilato a twa mhaka yoleyo, a humesela Yesu ehandle, a tshamisa exitshan'weni xa ku avanyisa exivandleni lexi va nge i Ribye; hi Xiheveru, i Gavata. 14A ri ri siku ra ku lunghisa Paseka; nkarhi, wona, a wu lava ku va wa ntlhanu na wun'we. Kutani Pilato a ku eka Vayuda: “Vonani, hosi ya n'wina.” 15Kambe va huwelela, va ku: “N'wi suse, n'wi suse, u n'wi vambe!” Pilato a ku eka vona: “Ndzi ta vamba hosi ya n'wina xana?” Vaprista lavakulu va hlamula, va ku: “A hi na hosi yimbe loko a nga ri Khezari.” 16Kavaloko a va nyiketa yena, leswaku va n'wi vamba. Kutani va khoma Yesu, va famba na yena.

Ta ku vambiwa ka Yesu.

17Kutani Yesu a huma a rhwele xihambano xa yena, a ya exivandleni lexi va nge i Ripala; hi Xiheveru va te i Gologota. 18Va n'wi vamba kona, a ri ni van'wana vambirhi, un'wana hitlhelo rin'wana, un'wana hitlhelo rin'wana, Yesu a ri exikarhi.

19Pilato a tsala ni papila, a ri nameka ehenhla ka xihambano; a ku tsariwile leswaku: “Yesu wa Nazareta, Hosi ya Vayuda.” 20Vayuda lavo tala a va hlaya papila rero, hikuva xivandla lexi Yesu a nga vambiwa ka xona, a xi ri ekusuhi ni muti; kambe a ri tsariwile hi Xiheveru, ni Xigriki, ni Xirhoma. 21Kutani vaprista lavakulu va Vayuda va ku eka Pilato: “U nga tsari: ‘Hosi ya Vayuda,’ kambe tsala leswaku ‘Hi yena la nga te: Hi mina hosi ya Vayuda.’ ” 22Pilato a hlamula, a ku: “Lexi ndzi xi tsaleke, ndzi tsarile.”

23Kuteloko tinhenha ti vambile Yesu, ti teka tinguvu ta yena ti avelana ha vumune, leswaku nhenha yin'wana ni yin'wana yi va ni swa yona: va teka ni nkhancu, kambe nkhancu a wu nga rhungiwanga, wu lukiwile wu hlangene ku suka ehenhla ku fika ehansi. 24 Kutani va byelana, va ku: “Hi nga ka hi nga wu handzuri, kambe a hi wu hlahluveni hi nhlolo hi ta tiva leswaku wu ta va wa mani.” A swi ri leswaku ku hetiseka Tsalwa leri nga te: “Va avelane tinguvu ta mina, va ti hlahluve hi nhlolo.” Tinhenha ti endlisa sweswo.

25Kambe mana wa Yesu ni makwa wa mana wa yena, Mariya, nsati wa Klopasi, na Mariya wa Magadala, a va yimile ekusuhi ni xihambano. 26Yesu loko a vona mana wa yena, ni mudyondzisiwa la n'wi rhandzaka a xaxamele na yena, a ku eka mana wa yena: “Wansati, n'wanaku, hi loyi.” 27Kutani a ku eka mudyondzisiwa: “Mana wa wena, hi loyi.” Ku sukela nkarhi wolowo, mudyondzisiwa yeloyi, a n'wi rhurhela endyangweni wa yena.

28 Endzhaku ka sweswo, Yesu, hi ku tiva leswaku timhaka hinkwato ti hetisekile, a ku: “Ndzi ni torha”; swi ri leswaku Tsalwa ri hetiseka. 29Mbita leyi teleke hi ntsuvi a yi ri kwalaho, kutani va tata xikhuvi hi ntsuvi, va xi tlhoma enhongeni ya hisopa, va xi yisa enon'wini wa yena. 30Kuteloko Yesu a tekile ntsuvi, a ku: “Swi hetisekile.” Kutani a jovota nhloko, a nyiketa moya.

31Vayuda va khongela Pilato, leswaku lava nga vambiwa va tshoviwa mahlapfana, va hawuriwa, leswaku mitsumbu yi nga sari swihambanweni hi siku ra Savata, hikuva a ku lunghiseriwa rona, kutani siku rero ra Savata a ri ri lerikulu. 32Kutani tinhenha ti ta, ti tshova mahlapfana ya lowo rhanga, ni ya un'wana la nga vambiwa na yena. 33Kuteloko va ta eka Yesu, a va n'wi tshovanga mahlapfana, hikuva a va vona leswaku u file. 34Kambe un'wana wa tinhenha a n'wi tlhava tsheve hi fumu kutani kan'we ku huma ngati ni mati. 35Kutani la nga swi vona, u vurile vumbhoni, kutani vumbhoni bya yena byi tiyile; u tiva leswaku u vula ntiyiso, leswaku mi pfumela. 36 Hikuva timhaka teto ti humelerile leswaku Tsalwa ri hetiseka leri nge: “A ku na rhambu ra yena leri nga ta tshoviwa.” 37 Kambe rin'wana Tsalwa ri te: “Va ta Vona loyi va n'wi tlhaveke.”

Ta ku lahliwa ka Yesu.

38Endzhaku ka sweswo, Yosefa wa Arimatiya, loyi ngi a ri mudyondzisiwa wa Yesu, kambe a tifihlile hi ku chava Vayuda, a kombela eka Pilato leswaku a pfumeleriwa ku ya hawula ntsumbu wa Yesu; kutani Pilato a n'wi pfumelela. Kutani a ya susa ntsumbu wa Yesu. 39Na yena Nikodema, loyi a nga ta nivusiku eka Yesu, a ta, a rhwele mirha ni mhangana leswi nga pfanganisiwa; ku tika ka swona ku lava ku endla dzana ra mimpimo. 40Kutani va teka ntsumbu wa Yesu, va wu phutsela hi mikumba ni mirhi, hi mukhuva lowu Vayuda va lahlaka ha wona. 41Kambe exivandleni xexo, laha a nga vambiwa kona, entanga a wu ri kona, ni sirha lerintshwa a ri ri kona entangeni, laha ku nga siki lahliwaka munhu kona. 42Va lahla Yesu eka rona, hikwalaho ka ku lunghisela ka Vayuda, hikuva sirha a ri ri ekusuhi.

Currently Selected:

YOHANE 19: TSO29

Highlight

Copy