GENESA 28

Ta Yakobo loko a balekela eMesopotamiya.

1Kavaloko Isaka a vitana Yakobo, a n'wi katekisa, a n'wi lerisisa sweswo, a ku: “U nga tshuki u teka nsati exikarhi ka vanhwana va Kanana. 2Pfuka u ya Padani-Aramu, eka Betuwele, tata wa mana wa wena, u titekela kona nsati exikarhi ka vanhwana va Labani, makwavo wa mana wa wena. 3Xikwembu lexi nga ni matimba, xi ta ku katekisa, xi ku andzisa, xi ku kurisa, u endla vunyingi bya matiko; 4xi ta ku nyika ku katekisiwa ka Abrahama, ni vatukulu va wena, u va u fuma tiko leri u luvelaka eka rona, leri Xikwembu xi ri nyikeke Abrahama.” 5Isaka a nyika Yakobo endlela; a suka a ya ePadani-Aramu, eka Labani, n'wana Betuwele, wa Muaramu, makwavo wa Rhaveka, mana wa Yakobo na Esawu.

6Esawu u tivile leswaku Isaka u katekisile Yakobo, a n'wi rhumela ePadani-Aramu, ku ya teka nsati kona, ni leswaku, loko a n'wi katekisile, u n'wi layile, a ku: “U nga tshuki u teka nsati exikarhi ka vanhwana va Kanana,” 7ni leswaku Yakobo u yingisile tata wa yena ni mana wa yena, a ya ePadani-Aramu; 8kutani Esawu, loko a vona leswaku vanhwana va Kanana va bihile emahlweni ka Isaka, tata wa yena, 9a ya eka Iximaele, a teka Mahalata, n'wana Iximaele, n'wana Abrahama, makwavo wa Nebayoto, a va nsati wa yena, ehandle ka vasati lava ingi a ri na vona.

Ta ku lorha ka Yakobo eBetele.

10Yakobo a suka eBerexeba a kongoma eHarana. 11Kuteloko a fikile exivandleni lexi a nga etlela eka xona, hikuva dyambu a ri perile, a teka ribye rin'wana ra xivandla lexi, a seketela eka rona, a etlela kona. 12Kutani a lorha norho; a vona phandze ri yimile, ri ya fika etilweni; a vona ni tintsumi ta Xikwembu, ti ri karhi ti tlhandluka, ti tlhela ti xika ha rona. 13A vona na Yehovha, a yimile ehenhla ka rona, a ku: “Hi mina Yehovha Xikwembu xa Abrahama, tata wa wena, ni Xikwembu xa Isaka; tiko leri u etleleke eka rona, ndzi ta ri nyika wena ni vatukulu va wena. 14Vatukulu va wena va ta kotisa ntshuri wa misava, u ta nava evupeladyambu, ni le vuxeni, ni le n'walungwini, ni le dzongeni; mindyangu hinkwayo ya misava yi ta katekisiwa ha wena ni vatukulu va wena. 15Kutani waswivo, ndzi na wena, ndzi ta ku hlayisa hinkwako laha u yaka kona, ndzi va ndzi ku tlherisela etikweni leri; hikuva ndzi nga ka ndzi nga ku tshiki ndzi nga si endlisisa leswi ndzi ku byeleke swona.”

16Kavaloko Yakobo a sisimuka evurhongweni bya yena, a ku: “Kunene Yehovha u kona exivandleni xexi, kasi a ndzi nga swi tivi!” 17A khomiwa hi ku chava, a ku: “Xivandla lexi, xa chavisa swonghasi! Kwala, i yindlu ya Xikwembu; i nyangwa ya matilo!”

18Kuteloko ri xa, Yakobo a teka ribye leri ngi a seketerile eka rona, a ri yimisa xi va xitsundzuxo, kutani a chela mafurha ehenhla ka rona. 19Kutani a thya xivandla lexi vito ra Betele (yindlu ya Xikwembu); kasi eku sunguleni, vito ra muti a ri ri Luzi. 20Yakobo a hlambanya, a ku: “Kungakuloko Xikwembu xi va na mina, xi ndzi hlayisa endleleni leyi ndzi yi khomeke, xi ndzi nyika vuswa ndzi dya, ni tinguvu ndzi funengela, 21ndzi ko ndzi tlhela hi ku tsaka endlwini ya tatana, Yehovha u ta va Xikwembu xa mina. 22Kutani ribye leri ndzi ri yimiseke ndzi ri endla xitsundzuxo, yi ta va yindlu ya Xikwembu; kutani eka hinkwaswo leswi u nga ta ndzi nyika swona, ndzi ta ku humesela hakunene ku avanyisa ka vukhume.”

Currently Selected:

GENESA 28: TSO29

Highlight

Copy