GENESA 27
27
Ta Isaka loko a katekisa Yakobo.
1Kuteloko Isaka a dyuhele, ni mahlo ya yena ma hele matimba, a nga ha voni nchumu, a vitana Esawu, n'wana wa yena lowa mativula, a ku eka yena: “N'wananga!”
Yena a ku: “Hi mina loyi.”
2Isaka a ku: “Waswivo, ndzi dyuhele, kambe a ndzi tivi siku leri ndzi nga ta fa ha rona. 3Sweswi, wa nga teka matlhari ya wena ni miseve ni vurha bya wena, u ya enhoveni, u ndzi dlayela nyama. 4U ta ndzi lunghisela murhu lowu ndzi wu rhandzaka, u ndzi nehela wona, ndzi dya, kutani moya wa mina wu ku katekisa ndzi nga si fa.”
5Kasi Rhaveka a a ri karhi a swi twa, loko Isaka a vulavula na Esawu, n'wana wa yena. Esawu a ya enhoveni ku ya hlota nyama, a ta vuya na yona. 6Kavaloko Rhaveka a vulavula sweswo eka Yakobo, n'wanakwe, a ku: “Yingisa, ndzi twe tata wa wena a ri karhi a vulavula sweswo eka Esawu makwenu, a ku: 7‘Ndzi nehele nyama, u ndzi lunghisela murhu wunene, ndzi dya, ndzi ku katekisa emahlweni ka Yehovha ndzi nga si fa.’ 8Sweswo-ke, n'wananga, yingisa leswi ndzi nga ta ku lerisa swona. 9Yana entlhambini, u ndzi tekela swimbutana swimbirhi leswinene, ndzi ta lunghisela tata wa wena murhu wunene lowu a wu rhandzaka. 10Kutani u ta wu nehela tata wa wena, a dya, a ku katekisa a nga si fa.”
11Kambe Yakobo a byela Rhaveka, mana wakwe, a ku: “Waswivo, Esawu makwerhu, i munhu wa ringhala, kasi mina a ndzi na rona. 12Kumbe xana tatana u ta ndzi ambamba, kutani ndzi ta va eka yena munhu wa mudyeleri, ndzi tikokela hakona ndzhukano, ku nga ri ku katekisiwa.”
13Mana wa yena a ku eka yena: “Ndzhukano wu ta va eka mina, n'wananga; wena yingisa ntsena, famba u ya ndzi tekela swona.” 14Kavaloko a ya swi teka, a swi neha ka mana wa yena, kutani mana wa yena a endla murhu wunene hilaha tata wa yena a wu rhandzeke hakona. 15Kutani Rhaveka a teka tinguvu ta Esawu, mativula ya yena, leta nkoka leti ngi a ri na tona endlwini, a ambexa Yakobo, n'wana wa yena wa ndzisana. 16Kutani a funengeta hi dzovo ra swimbutana mavoko ya yena, ni nhamu leyi nga riki na ringhala; 17kutani a nyika Yakobo, n'wanakwe, murhu ni vuswa lebyi a nga byi lunghisa.
18Kavaloko a ta eka tata wa yena, a ku: “Tatana!” Yeloyi a ku: “Hi mina loyi! U mani, n'wananga?”
19Yakobo a ku eka tata wa yena: “Hi mina Esawu, mativula ya wena, ndzi endlile hilaha u nga ndzi byela hakona. Wa nga pfuka, u tshamisa, u dya vuhloti bya mina, kutani moya wa wena wu ta ndzi katekisa.”
20Isaka a ku eka n'wana wa yena: “U hatlisise ku yini ku swi kuma, n'wananga?”
Yakobo a ku: “Hi leswi Yehovha, Xikwembu xa wena, a nga ndzi hlanganisela swona.”
21Kutani Isaka a byela Yakobo, a ku: “Wa nga tshinela ekusuhi, n'wananga, ndzi ku ambamba, ndzi tiva xana u n'wananga Esawu, kumbe u nga ri yena.” 22Yakobo a tshinelela ekusuhi na Isaka, tata wa yena, kutani Isaka a n'wi ambamba, a ku: “Rito, i ra Yakobo; kambe mavoko i mavoko ya Esawu.” 23Sweswo a nga n'wi tivanga hikuva mavoko ya yena a ma ri ni ringhala, ma fana ni mavoko ya Esawu makwavo, kutani a n'wi katekisa. 24Kambe a ku: “Kunene hi wena u nga n'wananga Esawu, xana?”
Yakobo a ku: “Hi mina!”
25Kutani Isaka a ku: “Ndzi phamele ndzi dya vuhloti bya n'wananga, leswaku moya wa mina wu ku katekisa.” Kutani a n'wi phamela, a dya; a n'wi nehela ni vhinyo, a nwa. 26Kavaloko Isaka, tata wa yena, a ku eka yena: “Wa nga tshinelela, u ndzi ntswontswa n'wananga.” 27Kutani a tshinela, a n'wi ntswontswa. Kutani Isaka a twa ku nun'hwela ka tinguvu ta yena, a n'wi katekisa, a ku: “Kunene, ku nun'hwela ka n'wananga ku ni ku nun'hwela ka nsimu leyi nga katekisiwa hi Yehovha. 28Xikwembu a xi ku nyike swa mberha ya tilo, ni swa mafurha ya misava, ni ndzalo ya vuswa, ni vhinyo. 29Matiko a ma ku tirhele, tinxaka ti ku khinsamela. U va hosi ya vamakwenu, ni vana va mana wa wena a va ku khinsamele! A ku rhuketeriwe loyi a nga ta ku rhuketela! Ku katekisiwa loyi a nga ta ku katekisa!”
30Kuteloko Isaka a hetile ku katekisa Yakobo, ni loko Yakobo a ha ku huma emahlweni ka Isaka, tata wakwe, Esawu, makwavo, a vuya eku hloteni. 31Na yena a lunghisa murhu wo xawula, a wu tisa eka tata wakwe, a ku eka tata wa yena: “Wa nga pfuka tatana, u dya vuhloti bya n'wanaku, moya wa wena wu ta tiva ku ndzi katekisa.”
32Kutani Isaka, tata wa yena, a ku: “U mani?”
Yena a ku: “Hi mina, n'wana wa wena wa mativula, Esawu.”
33Kavaloko Isaka a khomiwa hi ku tshuka lokukulu, a ku: “I mani-ke yeloyi a nga ndzi hlotela nyama a ndzi nehela yona? Ndzi dye hinkwaswo u nga si vuya, ndzi va ndzi n'wi katekisa; hakunene ku katekisiwa ku na yena.”
34Kuteloko Esawu a twa marito ya tata wa yena, a huwelela hi rito lerikulu, leri tlhavekaka, a ku eka tata wa yena: “Oho! Tatana, ndzi katekise na mina!”
35Kutani Isaka a ku: “Makwenu u tile hi mano, u tekile ku kateka ka wena.”
36Esawu a ku: “Xana hi leswi a nga churiwa vito ra Yakobo, kutani u ndzi dyelele kambirhi? U ndzi tekele vukulukumba, kutani waswivo, sweswi u ndzi tekele ku kateka ka mina.” A engeta, a ku: “Xana a ku ndzi hlayiselanga ku kateka kun'wana?”
37Kutani Isaka a hlamula a ku eka Esawu: “Waswivo, ndzi n'wi endlile hosi ya wena, ndzi n'wi nyikile vamakwavo hinkwavo va yena, va ve malandza ya yena, ndzi vuya ndzi n'wi tatisela vuswa ni vhinyo; loko u ri wena-ke, ndzi nga ku endlela yini xana, n'wananga.”
38Esawu a ku eka tata wa yena: “Xana u ni ku katekisa koloko ntsena xana, tatana? Oho! Tatana, ndzi katekise na mina!” Kutani Esawu a tlakusa rito, a rila.
39Kavaloko Isaka, tata wa yena, a hlamula, a ku: “Waswivo, muti wa wena wu ta pfumala mafurha ya misava, ni mberha leyi humaka etilweni, ehenhla. 40U ta hanya hi fumu ra wena, u va nandza wa makwenu. Kutakuloko u phonyokile, u ta tshova mpingu wa yena enhan'wini ya wena.”
41Kutani Esawu a venga Yakobo hikwalaho ka ku katekisiwa loku tata wa yena a nga n'wi katekisa hakona. Esawu a ku embilwini ya yena: “Masiku ya nkosi wa tatana ma kusuhi, kutani ndzi ta dlaya Yakobo, makwerhu.”
42Kambe va ya ambela Rhaveka marito ya Esawu, mativula ya yena, kutani a rhuma ku ya vitana Yakobo, n'wana wa yena wa ndzisana, a ku eka yena: “Waswivo, Esawu, makwenu, u lava ku tirihisela eka wena hi ku ku dlaya. 43Sweswi, n'wananga, ndzi yingise: Pfuka u balekela eka Labani, makwerhu, eHarana, 44u tshama na yena nkarhinyana, vukari bya makwenu byi ko byi hola, 45vukari bya makwenu byi ko byi suka eka wena, a rivala leswi u n'wi endliseke swona; kutani ndzi ta rhumela rito ndzi ku vitana kona. Xana ndzi nga pfumarisiwa n'wina vambirhi hi siku rin'we?”
46Kutani Rhaveka a ku eka Isaka: “Ndzi nyenya vutomi hikwalaho ka vana va Vahiti; kungakuloko Yakobo a teka exikarhi ka vanhwana va Vahiti nsati la kotisaka volavo, exikarhi ka vanhwana va tiko leri, vutomi byi nga ndzi pfuna yini xana?”
Currently Selected:
GENESA 27: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
