1 VATESALONIKA 2

Mitirho ya Pawulo eka Vatesalonika.

1Hikuva, na n'wina vamakwerhu, ma swi tiva leswaku ku nghena ka hina eka rikwenu a ku hundzukanga swahava, 2kambe, hambi hi rhangile hi twisiwa ku vaviseka, hi xanisiwa eFilipiya, hilaha mi swi tivaka, hi vuya hi tiyisa matimba hi ku tshemba Xikwembu xa hina, ku mi byela Evhangeli exikarhi ka ku lwa lokukulu. 3Hikuva ku dyondzisa ka hina a ku nga ri ku hemba; hambi ku ri ka thyaka, hambi ma ri mano, 4kambe tanihi leswi Xikwembu xi hi voneke hi ri lava fanelaka ku averiwa ntirho wa Evhangeli, hi vurisa sweswo, swi nga ri leswaku hi tsakisa vanhu, kambe swi ri leswaku hi tsakisa Xikwembu lexi ringaka timbilu ta hina.

5Hikuva a hi vanga na rito ra ku kanganyisa hi ku sasela ni siku ni rin'we, na n'wina ma swi tiva, ni loko ma ri mano lama fihlaka ku navela ku fuwa; Xikwembu i mbhoni ya hina. 6Na kona, a hi lavanga ku dzunisiwa loku humaka eka vanhu hambi ku ri ka n'wina, hambi ku ri ka van'wana; hambi leswi hi nga vaapostola va Yesu Kriste, a hi ta swi kota ku endla hi vukulukumba, 7kambe hi tshamile hi ri ni tintswalo exikarhi ka n'wina, kukotisa muan'wisi la hlayisaka hi rirhandzu lerikulu vana va yena, 8hi mukhuva wolowo wa ku mi rhandza ngopfu, hi anakanyile leswaku hi nga ka hi nga mi nyiki Evhangeli ya Xikwembu ntsena, kambe hi nga mi nyika ni vutomi bya hina, hikuva mi ri varhandziwa va hina swinene.

9Na n'wina, vamakwerhu, ma anakanya mikarhalo ni nyuku wa hina hilaha hi mi leteleke hakona Evhangeli ya Xikwembu, hi ri karhi hi tirha vusiku ni nhlikanhi, hi nga ti tikerisa munhu exikarhi ka n'wina. 10Mi timbhoni, swin'we na Xikwembu, ta mukhuva lowu hlawuriweke, lowo lulama lowu nga riki na nandzu, lowu hi mi endleleke ha wona, n'wina lava pfumeleke. 11Kutani ma swi tiva leswaku hi endlerile un'wana ni un'wana wa n'wina, tanihi tatana a endlelaka vana va yena; 12ha mi khongotela leswaku mi famba hi mukhuva lowu dzunisaka Xikwembu lexi mi vitaneleke eku fumeni ka xona, ni le ku vonakaleni ka xona.

Mukhuva lowu Vatesalonika va amukeleke Evhangeli ha wona.

13Hikwalaho, a hi rhuteri ku khensa Xikwembu, hikuva siku mi amukeleke rito ra xona, leri mi ri yingiseke eka hina, mi ri amukerile ku nga ri kukotisa leswo nge i rito ra vanhu, kambe tanihi loko ri ri rito ra Xikwembu (hilaha kunene ri nga rona), leri tirhaka hi matimba eka n'wina lava pfumeleke. 14Hikuva, vamakwerhu, mi hundzukile vaetisi va tikereke ta Xikwembu ta Yudiya leti nga eka Yesu Kriste, hikuva na n'wina, mi twisiwile hi va tiko ra rikwenu ku vaviseka ku ri kun'we ni loku va ku twisiweke hi Vayuda, 15va nga vona lava dlayeke Hosi Yesu, ni vaprofeta va vona, kutani va hi xanisile; a va tsakisi Xikwembu, kambe i valala eka vanhu hinkwavo; 16va hi arisile ku dyondzisa vamatiko leswaku va nga kumi ku hlayiseka, va ri karhi va engetela hi masiku swidyoho swa vona, kambe eku heteleleni, ku kariha ka Xikwembu ku va wela ehenhla.

17Loko hi ri hina vamakwerhu, hi avene na n'wina nkarhinyana, hi mombo ku nga ri hi mbilu, hi naverile ngopfu ku ta vona mombo wa n'wina hi ku navela lokukulu. 18Hikwalaho, hi rhandzile ku ta eka n'wina, ngopfu mina Pawulo, ndzi ringetile kan'we na kambirhi, kambe Satana u hi siverile. 19Hikuva ku tshemba ka hina, kumbe ku tsaka ka hina, kumbe harhi ya hina ya vuhosi, i yini-ke? Xana a hi n'wina mi nga ta va yona emahlweni ka Hosi Yesu Kriste, eku vuyeni ka yena? 20Ina, hi n'wina mi nga ku twakala ka hina ni ku tsaka ka hina.

Currently Selected:

1 VATESALONIKA 2: TSO29

Highlight

Copy