1 PETRO 4

Ku twa ku vaviseka na Kriste i ku tshika ku dyoha.

1Leswi Kriste a tweke ku vaviseka enyameni, na n'wina, mi tlhoma ku anakanya kuloko, leswaku loyi a tweke ku vaviseka enyameni, u tshikile ku dyoha, 2leswaku a nga ha hanyeli ku navela ka vanhu, kambe a hanyela ku rhandza ka Xikwembu, emikarhini leyi seleke ya ku hanya enyameni.

3Hikuva swi ringene loko hi endlile leswi rhandziwaka hi vamatiko, emikarhini leyi hundzeke ya ku hanyaka hina loko ha ha tifambela hi vumbhisa ni ku navela, ni ku pyopyiwa, ni madyo, ni rinwo, ni ku gandzela hi mukhuva lowo biha swikwembu swahava. 4Hilaha va hlamalaka, loko mi nga yi swin'we na vona emakhukhumbeni ya vuoswi, kutani va mi sandza hakona. 5Va nga lava nga ta tihlamulela eka loyi a tilunghiseke ku ta avanyisa lava hanyaka ni lava feke. 6Hikuva hikwalaho ka mhaka leyi, lava feke, na vona, va dyondzisiwile Evhangeli, leswaku va ta avanyisiwa enyameni hi mukhuva wa vanhu kambe va ta hanya emoyeni hi mukhuva wa Xikwembu.

Ku avanyisa ku kusuhi; Vakriste va fanele ku hiteka, va va ni ku yingisela eku xanisekeni.

7Kambe ku hela ka hinkwaswo ku kusuhi; tlharihani hakona, mi hiteka eku khongeleni. 8 Ngopfungopfu mi tiyisela eku rhandzaneni, hikuva rirhandzu ri ta funengeta swidyoho leswo tala. 9Mi amukelana eku endzeni ka n'wina, mi nga dzumadzumi.

10Un'wana ni un'wana hilaha a averiweke ku nyika hakona, a a tirhele van'wana hakona, kukotisa swiaveri leswinene swa tintswalo leto tala ta Xikwembu. 11Loko un'wana a vulavula, a a landze marito ya Xikwembu; loko un'wana a tirha ekerekeni, a a tirhe hi matimba lawa Xikwembu xi n'wi nyikaka, leswaku Xikwembu xi dzunisiwa eka hinkwaswo ha Yesu Kriste, loyi a nga ni ku kwetsima ni matimba, hilaha ku nga heriki. Amen!

12Varhandziwa, mi nga hlamaleni loko ku ri ni ndzilo exikarhi ka n'wina ku ta mi ringa; kukota loko ngi mi humeleriwe hi timhaka leto hlamarisa; 13kambe mi titsakela hi leswi mi nga ni ku averiwa eku vavisekeni ka Kriste, leswaku mi ta engeta mi tsaka hi ku tsaka lokukulu, siku ku kwetsima ka yena ku taka eku vonakaleni. 14Loko mi xanisiwa hikwalaho ka vito ra Kriste, mi katekile; hikuva Moya wa ku kwetsima, lowu nga wa Xikwembu, wu tshame ehenhla ka n'wina, vona va wu sandza, kambe n'wina ma wu dzunisa. 15Ku nga tshuki ku va na un'wana exikarhi ka n'wina la biwaka hi leswi a nga mudlayi, kumbe khamba kumbe muonhi, kumbe la tinghenisaka etimhakeni ta van'wana. 16Kambe loko un'wana a biwa hi leswi a nga Mukriste, a nga tshuki a va ni tingana, kambe a dzunisa Xikwembu hi vito lero. 17Hikuva nkarhi wa ta, lowu ku avanyisa ku nga ta sungula hi yindlu ya Xikwembu; kutani loko ku ta sungula hi hina, makumu ya lava nga pfumeriki Evhangeli ya Xikwembu, ma ta va lawo yini-ke? 18Kutani, “swi tsandza ni la lulameke, loko a hanya hi ku nonon'hwa, loyi a nga musandzi ni mudyohi u ta ya kwihi-ke?” 19Hikwalaho, lava vavisekaka hi ku rhandza ka Xikwembu, a va veke mimoya ya vona emavokweni ya yena, a nga Muvumbi la tshembekaka, va ri karhi va endla swinene.

Currently Selected:

1 PETRO 4: TSO29

Highlight

Copy