1 PETRO 5
5
Eka vakulukumba va kereke.
1Ndzi khongotela vakulukumba lava nga eka n'wina, mina ndzi nga nkulu na vona, ni mbhoni ya ku vaviseka ka Kriste, ni la nga ni ku averiwa eku kwetsimeni loku nga ta humelela; ndzi ri: 2Risani ntlhambi wa Xikwembu lowu nga na n'wina mi wu langutela, ku nga ri hi ku sindzisiwa, kambe ku va hi ku swi rhandza; ku nga ri hikwalaho ka bindzu lero biha, kambe ku va hi ku chivirika; 3mi nga ri lava fumaka ndzhaka ya Hosi, kambe mi va swikombiso swa ntlhambi. 4Kutani loko murisi lonkulu a ta humelela, mi ta amukela harhi leyi nga boriki ya ku kwetsima.
Eka lavantshwa ni ka hinkwavo.
5 Na n'wina lavantshwa, tivekeni ehansi ka lavakulu, mi ambala ku titsongahata, mi ri karhi mi tiveka ehansi ka van'wana, hikuva “Xikwembu xi alela lava tikurisaka, kambe xi tsetselela lava titsongahataka.” 6Hikwalaho titsongahateni ehansi ka voko ra matimba ra Xikwembu, leswaku xi ta mi tlakusa hi nkarhi lowu faneleke; 7mi ri karhi mi rhula ku vilela hinkwako ka n'wina ehenhla ka yena, hikuva timhaka ta n'wina ti na yena.
8Tikhomeni, mi hiteka; hikuva nala wa n'wina, a nga Diyavulosi wa mi wonga kukota nghala leyi vombaka, yi lava loyi yi nga n'wi dyaka. 9N'wi ariseni hi ku tiya eku pfumeleni, mi ri karhi mi tiva leswaku maxangu ya n'wina, i man'we ni lama humelelaka vamakwenu lava nga emisaveni.
10Kambe Xikwembu xa tintswalo hinkwato, lexi hi vitaneleke eku kwetsimeni ka xona loku nga heriki ha Yesu Kriste, kutakuloko mi twile ku vaviseka hi mikarhinyana, xi ta mi endla lava hetisekeke, xi mi tiyisa, xi mi nyika matimba, mi nga tsekatseki; 11eka xona a ku ve ku kwetsima ni matimba hi masiku lama nga heriki. Amen!
Marungulo.
12Ndzi mi tsalele marito ma nga ri mangani ha Silvano loyi ndzi n'wi ringanisaka leswaku i makwerhu la tshembekeke, ndzi ri karhi ndzi mi khongotela, ni ku tiyisa vumbhoni leswaku tintswalo ta xiviri ta Xikwembu, hi toleto mi yimeke eka tona.
13Nhlengeletano ya lava hlawuriweke leyi nga eBabilona, na Marka, n'wananga, va mi rungula.
14Xewetanani hi ku ntswontswana ka rirhandzu. Ku rhula a ku ve na n'wina hinkwenu, lava nga eka Yesu Kriste! Amen!
Currently Selected:
1 PETRO 5: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
