Mark 9

1ꞋEt ꞌubulhni, “ꞋAlhaꞌ nohdusni, tsꞌiyanne Yakꞌusda ye úlhtus-i be hikꞌúneꞌ ꞌutꞌen-i whusáwhutiltsꞌulh, whulohne njan dilhtsꞌine hotiꞌelh dahútitsa whutso.”

Jesus ꞌutsꞌun unꞌa be hóodiltsai

2Lhkꞌu tat dzin inleꞌ whe Jesus, Peter, James ꞌinkꞌez John dulh húbutilhdil ndo dzulh kꞌuz dulh ubílya. ꞋEt hinilhꞌen whe ꞌutsꞌun unꞌa be hóodiltsai. 3Oonaih be hóodiltsai ꞌulhyul kꞌet yus ꞌet nduja ndi yun kꞌut soo tunasguz-i ba nus ꞌulhyul suliꞌ. 4ꞋInkꞌez khuntsul Elijah ꞌinkꞌez Moses bulh Jesus hizih usyin ꞌinkꞌez huyulh yálhduk whe hubotilhꞌen.

5ꞋEt Peter Jesus bulh yátilhduk, “Nehodulhꞌeh-un hoonzoo wheꞌ hoontꞌoh njan uzdilhtsꞌi. Ta nimbali nohba netsꞌoolelh, ꞌilho nyun mba, ꞌilho Moses ba, ꞌinkꞌez ꞌilho Elijah ba.” 6Peter daja dutinelh ꞌaw tꞌéwhunúszun tane hultꞌoh bugha ꞌúnjaz kꞌet ꞌet huwa ꞌutni.

7ꞋInkꞌez khuntsul kwꞌus bukꞌínde ꞌinkꞌez ndo kwꞌus toh tsꞌe yaztílhduk, “Ndun sichꞌoh sYeꞌ ꞌuntꞌoh, tube ookꞌesiꞌ, oozúlhtsꞌai,” whutni.

8ꞋEt ꞌahoh dunat nuhúyuzꞌen ꞌaw ꞌuyoonne lhuhíꞌelh, Jesus ꞌen za bubulh ꞌútꞌen.

9ꞋEt dzulh kꞌut nyo nanáhidil whe Jesus khuni ulhtus-i be ubúlhni, “Khun te ꞌuyoonne dóhniꞌ junih! Ndet hoohꞌén-un, Yinka Dune Yeꞌ dunadutádalh ꞌet whutsꞌun.” 10Hikꞌunꞌa ꞌuhuja ꞌinkꞌez dichꞌoh ꞌalhgoh howu yawhehúnilhduk, “Khuni ‘Dazsai ꞌinkꞌez dunadutádalh?’ dini whe ꞌutni?” hutni.

11ꞋInkꞌez Jesus huyoodulhkut, “ꞋEt Moses be ꞌudustlꞌus ꞌukꞌu nunáguzne di ha ꞌutni Elijah ꞌen ꞌudechoo whusatíyalh?”

12Jesus ꞌet ubúlhni, “Elijah ꞌalhaꞌ ꞌudechoo whusatíyalh tsꞌiyantsuk lhaóodutileh ha. ꞋEt hoontsꞌi di ha Yakꞌusda ooghuni ꞌukꞌu nusgúz-i ꞌet ndutni ‘Yinka Dune Yeꞌ dzoh nutízut ꞌinkꞌez hitsꞌo dilhꞌoh neꞌhutilhꞌen?’ 13ꞋEt hoontsꞌi nohdúsni Elijah ꞌudaꞌ whusaínya ꞌinkꞌez dune ntsꞌenꞌa hukwaꞌ huninzun te, néꞌhuyulhꞌen. ꞋEt Yakꞌusda be ꞌudustlꞌus kꞌut whuz unꞌa ꞌukꞌu núwhusguz ínleꞌ.”

Tsꞌoodun ntsiꞌ-i nudúdeh-i ooyudinda-un, Jesus soo náꞌyinla

14ꞋEt Jesus yugha hodulꞌehne butananja whe, lhane dune bughu ꞌilhozdil ꞌubunilhꞌen ꞌinkꞌez Moses be ꞌudustlꞌus ꞌukꞌu nunáguzne yugha hodulꞌehne budulhyo ꞌuhutni. 15ꞋIlhozdílne Jesus hitilhꞌen ibulh buba hooncha whe hidudílhghaz ꞌinkꞌez, “Hadih,” huyúlhni.

16Jesus Moses be ꞌudustlꞌus ꞌukꞌu nunáguzne uboodulhkut, “Di ghun budulhyoh ꞌudahni?” ubúlhni.

17ꞋIlhozdílne ꞌilhoghun dune butahaínya, “Nehodulhꞌeh-un syeꞌ ntsiꞌ-i nudúdeh-i ooyudínda ꞌet huwa ꞌaw yaoolhduk ꞌaítꞌoh ꞌinka ntsꞌo whúsasti. 18ꞋEt ndet la ntsiꞌ-i ooyédinda ooba hoolhtus de, ꞌet yun nadúldus, huwus ooza ha núldoh, dughoo lhúdukꞌus, ꞌinkꞌez lhtsꞌedunukw. Ngha hodulꞌehne ntsiꞌ-i nudúdeh-i hiyáhanahinooyoot, ꞌubudúsni ꞌet hoontsꞌi ꞌaw ꞌuhuyooleh ꞌaítꞌoh.”

19ꞋInkꞌez Jesus uyúlhni, “ꞋAw nohni dune nohba ꞌalhaꞌ hotꞌeꞌ ꞌaítꞌoh! Dáwhuldzoh nohzih tisdalh? Dawhuldzoh nohtoh tisdalh sudutáhtsꞌo whutsꞌun ꞌinkꞌez nohba ꞌalhaꞌ tistꞌelh? Tsꞌoodun ndiz stsꞌun túlhtih!” ubúlhni.

20ꞋInka highu hinílhti. ꞋEt ntsiꞌ-i nududeh-i yuyudínda-un Jesus yutilhꞌen ibulh, ꞌahoh tsꞌoodun ookaootizut ꞌinkꞌez nadílduz, ꞌinkꞌez huwus ooza ha nuldoh whe núkallhoh.

21ꞋEt Jesus oobá yoodulhkut, “Dáwhuldzoh ndun tsꞌoodun ꞌet duntꞌoh?” yúlhni. “Ntsool daꞌ whutsꞌun,” ní oobá.

22“Lhat whe tsꞌoodun yuzoolhghelh hukwaꞌ yulhꞌen. Too be cha yuzoolhghelh hukwaꞌ yulhꞌen ꞌinkꞌez tsídunoh chaꞌ yulhꞌen. Sooꞌ tanlelh de, negha téꞌninzeh ꞌinkꞌez nela ꞌineh!”

23“A,” yúlhni, “Soo ꞌúlcho ꞌi be be ꞌalha ꞌuhoontꞌoh ꞌintꞌi de, mbene la ooba ꞌalha ꞌuhoontꞌoh utꞌíne tsꞌiyantsuk neꞌhutitꞌen-un buba huwa lhótilhnaꞌ.”

24ꞋAhoh oobá oonatsultooꞌ hoonli whe ꞌutni, “SMoodihti be ꞌalha ꞌuhoontꞌoh ꞌustꞌi. ꞋEt hoontsꞌi sla ꞌineh, ꞌon nus ꞌultus-i be ꞌalha ꞌuhoontꞌoh-i oostꞌeꞌ ha, ꞌet hukwaꞌ nuszun.”

25ꞋEt Jesus whutilhꞌen ꞌilhozdílne bughá holhghaz whe ꞌahoh khuni ulhtus-i be ntsiꞌ-i nudúdeh-i hukwaꞌ yudániꞌ, “Ntsiꞌ-i nudúdeh-i lheꞌhudústsꞌo ꞌinkꞌez yalhuhulhduk ilhꞌí-un, tsꞌoodun ooyáhanaindaih nyudúsni, ꞌinkꞌez doo cha ꞌon ꞌat ooyunádondzit junih!” yúlhni.

26ꞋEt ntsiꞌ-i nudúdeh-i ndun tsꞌoodun yuka ootilhdzut, ꞌinkꞌez tube cho yudalhtlut, ꞌalhdzul, ꞌinkꞌez yuyáhanadide. Tsꞌoodun ꞌantsꞌi dazsai ꞌet ndúja. ꞋEt huwa lhane, “Dazsai whe ꞌuntꞌoh,” hutni. 27ꞋEt hoontsꞌi Jesus tsꞌoodun yula ílhchoot ꞌinkꞌez ndo ꞌúyinla ꞌinkꞌez tsꞌoodun dunadija.

28ꞋEt hukwꞌelhꞌaz Jesus yoh danínya whe yugha hodulꞌehne whuꞌiz huyoodulhkut, “ꞋEt dáhoontꞌoh huwa wheni ntsiꞌ-i nudúdeh-i ꞌaw ootsꞌu ha nátsꞌinooyoot ꞌaitꞌoh?”

29ꞋEt Jesus ubúlhni, “Mbene la tenadudline, ꞌinkꞌez soo hóonihne, ꞌenne za ntsiꞌ-i nudúdeh-i ndi kꞌunꞌa ꞌuntꞌoh-i nahuyuntuyukw.”

Jesus datitsah-un doo cha huwu yalhduk

30ꞋEt keyoh whuchꞌa nahusdil ꞌinkꞌez keyoh Galilee ꞌoh whuya lhunáhusdil. Jesus ntsꞌe whénya tsꞌe dune tꞌéoonózin hukwa lheꞌnízun, 31yugha hodulꞌehne hubodulhꞌeh ꞌet huwa. ꞋInkꞌez ubúlhni, “Yinka Dune Yeꞌ, ꞌuyoonne dune tlꞌa hitilhtelh ꞌinkꞌez hituzilhghelh. Hizilhghi hukwꞌelhꞌaz whulh tat dzin ꞌet dunadutádalh.” 32ꞋAw daja ni whe ꞌutni tꞌehonuszun ꞌinkꞌez huyé nuljut ꞌaw huyoodolhkut ꞌaítꞌoh.

Mbe suba netoh ꞌukꞌenus dune uncha-un unli

33ꞋEt keyoh Capernaum huwhútni tsꞌe whuz nahóosdil. Yoh danáhandil whe Jesus yugha hodulꞌehne uboodulhkut, “Ndanit ti tsꞌidulh whe, di za ghu yalhduk whe dahni?” 34ꞋAw tꞌehudusnih, ti ꞌet lhdulhyo ꞌuhudutni, “Mbe suba netoh ꞌukꞌenus dune uncha-un unli?” ꞋEt huwa tꞌehudusni.

35Jesus nátlꞌa didaꞌ whe whunizyane ꞌon ꞌat nane yugha hodulꞌehne, “ꞋAnih,” ubudániꞌ ꞌinkꞌez ubúlhni, “Mbe la ꞌukꞌenus dune uncha-un tileh hukwaꞌ ninzun de, ꞌen ꞌudekꞌoh ooleꞌ hubaꞌ hoontꞌoh, ꞌinkꞌez tsꞌiyanne natnéꞌtitꞌen.”

36ꞋEt Jesus ꞌilhoghun tsꞌoodunyaz yílhchoot ꞌinkꞌez bubut nénilhya ꞌinkꞌez yunasúni whe ubúlhni, 37“Mbe la si sgha ndun tsꞌoodun danílhti de, si dasúnilhti wheꞌ hoontꞌoh, ꞌinkꞌez mbe dasúnilhti-un, si iloh dasútalhtelh. Sutílhꞌaꞌ-un, dahinilhti wheꞌ hoontꞌoh.”

Jesus ubúlhni, “Mbe la nechꞌaz úlhditni ꞌen neba ꞌuntꞌoh”

38ꞋEt John uyúlhni, “Nehodulhꞌeh-un, ꞌilhoghun dune nyooziꞌ be ntsiꞌ-i nudúdeh-i dune butsꞌu ha naídulhdoh, ꞌen uznilhꞌen. ‘ꞋEtsul ooneh tsꞌutni,’ ꞌaw nebulh lheꞌustꞌen ꞌet huwa.”

39ꞋEt Jesus ubúlhni, “ꞋAw whuchꞌa nahyoot iloh, mbe la sooziꞌ gha huwa ꞌítꞌen ꞌuwhulhꞌen-un, ꞌaw hukwꞌelhꞌaz dzoh kꞌunꞌa sghu yaoolhduk ꞌaítꞌoh. 40Mbe nechꞌaz úlhditnine, wheni netsꞌó ditni wheꞌ ꞌuntꞌoh. 41Nohni Christ oochꞌeꞌne ꞌahli huwa dune too nohgha nílhdzo de, ꞌen Yakꞌusda ooba ꞌukꞌelha yutaleh-i ꞌaw nintayoꞌalh ꞌaitꞌoh.

42ꞋEt ꞌilhoghun tsꞌoodun ooba ꞌalhaꞌ ꞌustꞌoh-un ꞌinkꞌez dune lubeshi be schꞌa yulhti de, ndun dune tsꞌoodun tankꞌus unꞌa wheyúntilhtun ꞌet whutso huyúlh tatse oolhꞌis ꞌon nus sooꞌ hoontꞌoh. 43ꞋEt nla ꞌi gha lubeshi ꞌinla de, kꞌunintꞌas! Nla kꞌuz za ꞌintꞌi whe yakꞌuz whénya de whuz ꞌilhiz hutanalh, ꞌet mba hootázooꞌ. Lhchꞌaz nla bulh kwuncho yo tsꞌe whénya de ꞌukꞌenus mba hootátsiꞌ, whuz kwun nalhnusne whe ꞌuntꞌoh. 44Whuz whe usgo dalhusa, ꞌinkꞌez kwun nalhnusnoh. 45ꞋEt nke ꞌi gha lubeshi ꞌinla de, kꞌunintꞌas! Nke kꞌuz za ꞌintꞌi whe yakꞌuz whénya de whuz ꞌilhiz khutanalh, ꞌukꞌenus mba hootázooꞌ. Lhchꞌaz nke bulh kwuncho yo tsꞌe whénya de ꞌukꞌenus mba hootátsiꞌ, whuz kwun nalhnusne whe ꞌuntꞌoh. 46Whuz whe usgo dalhusa, ꞌinkꞌez kwun nalhnusnoh. 47ꞋInkꞌez nyuna ꞌi gha lubeshi ꞌinla de, ha nínꞌaih! Nyuna kꞌuz za ꞌintꞌi whe Yakꞌusda ookꞌúneꞌ whutꞌen-un whénya de, ꞌukꞌenus mba hootázooꞌ. Lhchꞌaz nyuna bulh kwuncho yo tsꞌe whényuhano de, ꞌukꞌenus mba hootátsiꞌ, whuz kwun nalhnusnoh whe ꞌuntꞌoh. 48Whuz whe usgo dalhusa, ꞌinkꞌez kwun nalhnusnoh. 49Tsꞌiyanne hudílhkꞌun whe ꞌudechoo lisel hikꞌu núdzih. ꞋEt whuz unꞌa tsꞌiyanne dzoh nutizut wheꞌ hoontꞌoh.

50Lisel unzoo whe ꞌuntꞌoh, ꞌet hoontsꞌi lisel oonalhuwhúlhni ꞌulhih te, ntsꞌenꞌa doo cha lisel oonawhúlnih uztílhtselh? Whuz unꞌa nohdzi ootsiꞌ junih ꞌinkꞌez nohbulh dune tsꞌun nohdzi dóghel.”

Currently Selected:

Mark 9: crx

Highlight

Copy