Mark 10
10
Dune Lhghudilhtsꞌíne lhchꞌá nahusdilh ꞌet huwun Jesus hubodulhꞌeh
1ꞋEt Jesus whuchꞌa nasja ꞌinkꞌez Judea ꞌoho nenínya ꞌukoh Jordan whanchꞌaz tsꞌe. ꞋEt lhane dune yugha óozdil. ꞋInkꞌez whutsodaꞌ datni la whuz unꞌa doo cha za hubodulhꞌeh.
2Whulohne Phariseene highu nindil ꞌinkꞌez huyóolhdzih whe huyoodulhkut, “Nedíni dune, bughá whuntꞌai duꞌat lahudootnih ha?”
3ꞋEt Jesus ꞌutni, “Daja ni whe Moses khuni nohtlꞌa ídanꞌai inleꞌ?”
4ꞋEt ꞌuhuyúlhni, “Moses bugha óoninꞌai dune ꞌudustlꞌus ꞌukꞌu néyuzguz-i be duꞌat duchꞌa nayólhtelh.”
5ꞋEt Jesus ubúlhni, “Stabe nohdzih dutsꞌun ꞌet huwa ndi khuni Moses nohba ꞌukꞌeyánguz. 6ꞋEt hoontsꞌi ꞌudechoo Yakꞌusda tsꞌiyaitsuk ꞌinla whe dune ꞌinkꞌez tsꞌeke cha ꞌubinla. 7ꞋEt huwa dune dubá ꞌinkꞌez duloo bulh buchꞌa óoyaꞌ, ꞌinkꞌez duꞌat zih oodaꞌ. 8ꞋEt nuhultꞌoh ꞌilho hutileh, ꞌon ꞌun whe nane lhuhíloh, ꞌilho huzliꞌ. 9ꞋEt huwa mbe la Yakꞌusda lhghá buninlane, dune lhchꞌa nabohólelh junih.”
10Yoh danáhandil whe yugha hodulꞌehne Jesus dáhoontꞌoh la doo cha hukwa huyoodulhkut. 11ꞋEt ubúlhni, “Dune mbe la duꞌat ꞌún tizno ꞌinkꞌez ꞌuyoon tsꞌeke ghu nasda de, ꞌuyoon tsꞌeke bulh nintaꞌtitꞌelh whe ꞌuntꞌoh. 12ꞋEt tsꞌeke duki ꞌún tizno ꞌinkꞌez ꞌuyoon dune ghu nasda de, ꞌuyoon dune bulh nintaꞌuntih.”
Jesus tsꞌoodunne bukꞌudílhni ꞌinkꞌez buba tenadudli
13ꞋEt tsꞌoodunne Jesus tsꞌun ubúhoozdla bukꞌudólni ha, yugha hodulꞌehne tsꞌoodunne whusaínlane hukwaꞌ bodániꞌ. 14ꞋEt Jesus whunalhꞌen whe whutsꞌu dutni ꞌinkꞌez yugha hodulꞌehne ubúlhni, “Whute tsꞌoodunne stsꞌó toodilh. Khun te dah budóhniꞌ junih. Yakꞌusda whe lerwe unli-un whuz dilhtsꞌine, tsꞌoodunneyaz duhúltꞌoh wheꞌ hintꞌoh. 15Soo tsꞌihꞌun ꞌalhaꞌ nohdúsni, Yakꞌusda whulerwe unli tsꞌe, Yakꞌusda bulerwe unli-un ꞌaw tsꞌoodunneyaz kꞌunꞌa lhuhuhóolhchulh de, ꞌaw whuz dahóoyaꞌ ꞌaitꞌoh.” 16ꞋEt tsꞌoodunne tsꞌiyawh bunasuni ꞌinkꞌez ꞌilhoghun hinli whe bukꞌudálni ꞌinkꞌez buba tenadidli.
Dune hoonzooꞌ ꞌuntꞌoh-un
17ꞋEt Jesus ti tizya whe ꞌilhoghun dune yutsꞌu tílhgai ꞌinkꞌez yubut dugwutsi be nenínya ꞌinkꞌez yoodalhkut, “Dune hodulhꞌeh-un unzoo-un, dastꞌen whe ꞌilhiz khutisnalh-un whuchꞌa ootásdoh?”
18ꞋEt Jesus uyúlhni, “Di ha sudíni, unzóo-un sudíni? ꞋAw ꞌilhoghun unzoo-un hooloh. Yakꞌusda ꞌen za unzoo whe ꞌuntꞌoh. 19Khuni Yakꞌusda nohtlꞌa ídanꞌai-i tꞌeninzun: nezolhghelh junih, dune kꞌus tsꞌeke bulh nintaꞌontꞌen junih, ꞌundunontꞌih junih, hontsꞌit junih, ꞌeꞌ holhtsꞌit junih, ꞌinkꞌez mbá cha nloo cha hubudólhtiꞌ.”
20ꞋEt dune ꞌutni, “Nehodulhꞌeh-un chilh usdli whutsꞌun, ndi khuni tsꞌiyawh ookꞌúneꞌ zustꞌen.”
21ꞋEt Jesus yukꞌensiꞌ whe yunalhꞌen ꞌinkꞌez uyúlhni, “ꞋIlhoghun za whuyit ꞌintꞌoh, naindalh ꞌinkꞌez ꞌintꞌi-i tsꞌiyawh be ꞌóonket ꞌinkꞌez sooniya telꞌenne gha níndzaih, tulalhgus ilhchoot ꞌinkꞌez ꞌanih, seꞌ ꞌutꞌen kꞌoh tuneꞌ óntꞌen ha sunanyalh. ꞋEt de yakꞌuz hoonzoo-un, ꞌet whuchꞌa ootálhdoh.”
22ꞋEt dune ndi khuni yudántsꞌo whe ni suliꞌ, ꞌinkꞌez tsꞌodi unli whe natisja tube hoonzooꞌ ꞌuntꞌoh ꞌet huwa.
23Jesus yugha hodulꞌehne bunilhꞌen ꞌinkꞌez ꞌubulhni, “Dáhoontꞌoh huwa whúlnaꞌ whe hoonzooꞌ ꞌuntꞌohne, Yakꞌusda whe lerwe unli-un dahútidulh.”
24ꞋEt yugha hodulꞌehne ndi khuni hudántsꞌo whe buba hooncha. ꞋEt hoontsꞌi Jesus whuz hiyilh whe ndutni, “Suzkehke dahoontꞌoh la huwa whúlnaꞌ whe duzooneya ꞌi za hitꞌaz ꞌuntꞌohne Yakꞌusda whe lerwe unli-un, ꞌet dahútidulh. 25Khuna-i cho, camel huyúlhni-i, ꞌaw ꞌughabátsulh yukaóolget ꞌaitꞌoh. ꞋEt whuz unꞌa dune hoonzooꞌ ꞌuntꞌoh-un, ꞌon nus ooba huwa whúlna Yakꞌusda whe lerwe unli-un datíyalh huba.”
26ꞋEt yugha hodulꞌehne tube buba hooncha ꞌinkꞌez lhoohoodulkut, “Mbe suba doojih?”
27ꞋEt Jesus ꞌubunilhꞌen ꞌinkꞌez ubúlhni, “ꞋEt dune ba ꞌuhóneh ꞌaítꞌoh, ꞌet hoontsꞌi Yakꞌusda ba tsꞌiyantsuk huwa lhúhoonlnaꞌ wheꞌ hoontꞌoh.”
28ꞋEt Peter yatílhduk, “Whunilhꞌen, tsꞌiyaitsuk oolazditni ꞌinkꞌez nyutsꞌun tizdil.”
29ꞋEt Jesus ubúlhni, “A, tsꞌihꞌun nohdúsni, mbe la duyoh huwu tizya-un ꞌinkꞌez dulhutsinke, kꞌus dulhtuske, duloo, dubá, duꞌat, duzkehke, kꞌus duyun kꞌut te, si sgha ꞌinkꞌez khuni unzoo-i kꞌuz tsꞌiyantsuk whula ditni de, ꞌinkꞌez suntizya de, nus de ꞌon nus 30lhai ootlꞌa naítikulh: yoh ꞌinkꞌez bulhutsinke, bulhtuske, ooloo, buzkehke, ꞌinkꞌez ooyun kꞌut cha ꞌinkꞌez dune huye túzilalh cha nus de ꞌilhiz hutinalh. 31ꞋEt hoontsꞌi lhane ꞌudechoo ꞌuntꞌohne ꞌudekꞌez hutileh, ꞌinkꞌez ꞌudekꞌez unline, ꞌenne ꞌudechoo hutileh.”
Jesus datitsah-un whulh tat huwu yatilhduk
32ꞋAwet Jerusalem tsꞌu ti hidulh Jesus ꞌen yugha hodulꞌehne butso uyalh whe bugha ꞌúnjaz, ꞌinkꞌez hidulh whe hunílhjoot. ꞋEt Jesus yugha hodulꞌehne whunizyane ꞌon ꞌat nane ꞌudun nébuninla ꞌinkꞌez nus de bulh daóotanelh-un, ꞌet huwun bubulh yálhduk. 33“Soo zúlhtsꞌai, Jerusalem tsꞌuztidil ꞌinkꞌez Yinka Dune Yeꞌ, Lizwif lubret moodihne ꞌinkꞌez Moses be ꞌudustlꞌus ꞌukꞌu nunáguzne butlꞌa ihítilhtelh. Datítsah wheni hiba nahutiyeh ꞌinkꞌez ꞌudun yun kꞌut whutꞌenne butlꞌa ihítilhtelh. 34Highu tidloh, highu dútazoh, huyootálhtsus ꞌinkꞌez hituzilhghelh. ꞋEt tat dzin inleꞌ de, dunadutádalh,” ubúlhni.
James ꞌinkꞌez John bulh Jesus huyoodulhkut
35ꞋEt James ꞌinkꞌez John bulh Zebedee ooyeꞌke Jesus highu ninꞌaz ꞌinkꞌez huyoodulhkut, “Nehodulꞌéh-un ndai ntsꞌo ookwaꞌ tsꞌutni-i neba whutanlelh hukwa ꞌuzninzun.”
36Jesus uboodulhkut, “Ndet nohba ꞌuwhutisdlelh hukwaꞌ nahzun?”
37ꞋEt ꞌuhutni, “Yakꞌuz ꞌukꞌenus díntiꞌ tsꞌe sinda de, nzih tákelh ꞌet hukwaꞌ nítzun, ꞌilhoghun ꞌen nailhni tsꞌe ꞌinkꞌez ꞌilhoghun ꞌintlꞌus tsꞌe.”
38ꞋEt Jesus ubúlhni, “Stsꞌu hukwaꞌ dahni ꞌaw tꞌéoonuzúhzun. Lubot be tísnelh-i soo tilah oohtnaiꞌ ꞌinkꞌez be too béꞌ uzya soo tilah too beꞌ óolhneh?”#10:38 “Ntsꞌenꞌa la dzoh nutíszut whuz unꞌa la dzoh nohzut eh?” ni whe ꞌutni.
39“Soo la ꞌutsꞌooneh,” huyúlhni. ꞋEt Jesus ubúlhni, “Lubot be tisnelh-i nohni cha tíhtnelh wheꞌ ꞌuntꞌoh. ꞋInkꞌez too béꞌ uzya whuz unꞌa too béꞌ tilhnelh. 40ꞋEt hoontsꞌi nailhni tsꞌe sghu tidalh, ꞌinkꞌez ꞌintlꞌus tsꞌe sghu tidalh, ꞌaw si huwá hosꞌalh ꞌaitꞌoh, buba lhawhúdulyane bubaꞌ hoontꞌoh.”
41ꞋEt ꞌon ꞌunne whunizyane yugha hodulꞌehne, James ꞌinkꞌez John bulh buba dzoh ꞌuhudija. 42ꞋInka Jesus tsꞌiyawh, “ꞋAnih,” hubudániꞌ ꞌinkꞌez ubúlhni, “Tꞌeoonáhzun ꞌudun yun kꞌut whutꞌenne butoh, dune tso whudilhdzulh unlíne, ꞌenne dune bukꞌut moodih hinli. ꞋInkꞌez bumoodih unline, cha bumoodih hinli. 43ꞋEt hoontsꞌi ꞌaw whuz unꞌa iloh nohni ꞌahtꞌoh. ꞋIlhoghun nohtoh dune uncha-un tileh hukwaꞌ ninzun de, nohba neꞌútꞌen-un cha ooleꞌ whubaꞌ hoontꞌoh. 44ꞋInkꞌez nohtoh ꞌilhoghun ꞌudetso tileh hukwaꞌ ninzun de tsꞌiyanne eꞌulhna ooleꞌ hubaꞌ hoontꞌoh. 45Yinka Dune Yeꞌ, ꞌen hoontsꞌi ꞌaw ooba néꞌwhutitꞌen huba whusálhiyal. ꞋEt hoontsꞌi dune ba néꞌtitꞌen ꞌinkꞌez buba datítsah ꞌet whe tsꞌiyawh nabootakulh.”
Dune hoos̱ꞌen-un Bartimaeus huyúlhni, Jesus hooꞌen nayulhtsi
46Jericho tsꞌe hoozdil whe Jesus yugha hodulꞌehne tubulh nahutisdil lhane ꞌilhozdílne cha ꞌutꞌen. Dune hoos̱ꞌen-un Bartimaeus huyúlhni-un, Timaeus ooyeꞌ, ti whuzih usda datso. 47Jesus Nazareth whutꞌen-un ꞌóh whuya uyalh ꞌet whundantsꞌo, ꞌahoh hazulh whe ꞌutni, “Jesus David ootsꞌuhainzut-un sgha téꞌninzeh!”
48Lhane tꞌedoosnih huyulhni. ꞋEt hoontsꞌi ꞌon nus ꞌaldzul whe ꞌutni, “Jesus David ootsꞌuhainzut-un sgha téꞌninzeh!”
49Jesus lhgha nenínya ꞌinkꞌez, “ꞋAnih dúhni,” ubúlhni. ꞋEt dune hoos̱ꞌen-un hika huyih, “Hooníntꞌiꞌ ꞌinkꞌez dudinyaih, ꞌanih nyúlhni,” huyúlhni. 50Duluglok tsꞌahayítꞌoh, dudinya ꞌinkꞌez Jesus yutsꞌóozya.
51Jesus yoodulhkut, “Ndet mbaꞌ whutisdlelh stsꞌu hukwaꞌ ninzun?” “Nehodulhꞌeh-un doo cha hoosꞌen naoosdleh,” yúlhni.
52“Naindalh, si stsꞌun be ꞌalha ꞌuhoontꞌoh-i be soo náꞌinja,” yúlhni. ꞋEt ꞌahoh dune hooꞌen nasdliꞌ ꞌinkꞌez Jesus ti yuntizya.
Currently Selected:
Mark 10: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
