Mark 15

Jesus Pilate but nenínya

1ꞋOm bun bundadaꞌ ꞌahoh Lizwif lubret moodihne, dune tso whudilhdzulhne, Moses be ꞌudustlꞌus ꞌukꞌu nunáguzne cha, ꞌinkꞌez dune ba nahiyilhne cha, tsꞌiyawh yahalhduk. ꞋEt Jesus hiyulhghel ꞌinkꞌez Pilate tlꞌa húyalhti.

2ꞋEt Pilate yoodulhkut, “Nyun eh Lizwif bulerwe inli?” ꞋEt Jesus ꞌutni, “ꞋAlhaꞌ dini wheꞌ dini.”

3Lizwif lubret moodihne lhat-un Jesus hichꞌaz yalhduk, ꞌinkꞌez hiba hontsꞌit, ꞌet hoontsꞌi Jesus ꞌaw tꞌedusnih. 4ꞋInka Pilate doo cha za Jesus yoodulhkut, “Dáwhultsuk-un nkꞌehúhoonꞌai, ꞌaw eh dája lhdutuzanel?”

5ꞋEt doo cha za Jesus ꞌaw yalhtílhdih. ꞋEt Pilate ooba hooncha.

Pilate Jesus datítsah-un whutsꞌu yúlha

6Nawhúdizulh totsuk Lizwifne butus lhuséya whunahulníh-un, ꞌet ꞌilhoghun dune ꞌadinꞌaí-un Lizwif ꞌutahahúyulhtih, ꞌen Pilate yula nadutnih. 7ꞋInkꞌez ꞌilhoghun, Barabbas hiyulhni-un, lhuzti tlꞌool be yulh keyoh humoodih chꞌaz nidindilne bubuyulhꞌoo. Dune cha huzilhghi. 8Tsꞌiyanne ꞌilhozdilne Pilate ꞌuhuyúlhni, “Nawhudizulh totsuk ꞌilhoghun dune ꞌadinꞌaí-un, ꞌen oola nadintnih. Doo cha za ꞌet ndineh.”

9ꞋEt ꞌubulhni, “Lizwif bulerwe, ꞌen oola nadutistnih hukwaꞌ nahzun?” 10Didutchꞌoh tꞌeoonínzun Lizwif lubret bumoodihne ꞌoonih gha Jesus hitlꞌa háyalhti ꞌet huwa. 11ꞋEt hoontsꞌi Lizwif lubret bumoodihne dune buba nus hónilhtꞌi, Barabbas ꞌen Pilate yula nadootnih hidóniꞌ ha.

12ꞋEt Pilate doo cha za dune ꞌilhozdílne ubúlhni, “Ndun Lizwif bulerwe dáhni-un datísdlelh hukwaꞌ nahzun?”

13ꞋEt tube cho ꞌuhuyúlhni, “Tulalhgus undunilhtꞌah!”

14ꞋEt Pilate ꞌubulhni, “Ndet whe tankꞌus ꞌúja?” ꞋEt hoontsꞌi ꞌon nus ꞌuhutni, “Tulalhgus undunilhtꞌah!” hutni.

15ꞋEt ꞌilhozdílne hohótꞌeꞌ ha Barabbas ꞌen Pilate buba yula naditni. Jesus yayalhtsus, ꞌinkꞌez tulalhgus kꞌehíyolhtelh ha butlꞌa yálhti.

Lhugánne Jesus highu núwhulhya

16ꞋEt lhugánne moodih#15:16 Ndun moodih Pilate ꞌuntꞌoh. ooyoh whunanistlꞌoo-i bez tsꞌe Jesus dáhinilhti ꞌinkꞌez ꞌonghunne lhugánne tsꞌiyawh bukaꞌ hudániꞌ. 17Luglok dulkꞌún-i, Jesus hitꞌahúyalhbal. Whus nꞌawh nahínilhjaz, ꞌi hitsi nehídanꞌai. 18ꞋEt hidílhtiꞌ nahoohoolhꞌi, ꞌinkꞌez ꞌuhuyúlhni, “Adih, Lizwif bulerwe!” 19Duchun be hitsi tsꞌeꞌ nalhtꞌo, highá dizoh, hibut dugwútsi be nehúdulh, ꞌinkꞌez hibut teniꞌ hunilhdzun nahuhoolhꞌi. 20Jesus highu núwhulhya ꞌetsul ꞌuhayínla hukwꞌelhꞌaz luglok dulkꞌún-i highu nahuyílhchoot, ꞌinkꞌez dichꞌoh hinaih be náhayalhti. ꞋInkꞌez tulalhgus kꞌehuyitalhtelh tsꞌe hítilhti.

Jesus tulalhgus kꞌehíyilhti

21ꞋEt hidulh whe ꞌilhoghun dune, Simon huyúlhni-un, ꞌoh whuya uyalh. ꞋEn hidudizdil ꞌinkꞌez Jesus ootulalhgus yuba idutitelh ha huwa húyalhꞌa. Simon Cyrene whutꞌen-un, ꞌen Alexander ꞌinkꞌez Rufus bubá ꞌuntꞌoh. 22ꞋInkꞌez Jesus Golgotha huwhútni tsꞌe huyoolhti. Golgotha ꞌutsin tsꞌun nizꞌai hutni wheꞌ hutni. 23ꞋEt tsꞌekoo tooꞌ ꞌinkꞌez yoo, myrrh huyúlhni, hitadínla, ꞌi Jesus huyúhuyoolhnaiꞌ hukwaꞌ huyínla, ꞌet hoontsꞌi ꞌaw lheyílhchulh. 24ꞋEt tulalhgus kꞌehúyilhti ꞌinkꞌez hinaih ꞌi ꞌuhúntúlhdulh whe higha ꞌaínlih whe hinaih lhtáhayulya.

25Bundadaꞌ 9:00 ꞌuhunitꞌoh atꞌen Jesus tulalhgus kꞌehíyilhti. 26Ndet hukwaꞌ huyínla hutni-un, ꞌet ꞌukꞌehúhoonguz, ꞌi hiyando whahidinꞌai. Ndi khuni ꞌukꞌehúyinguz-i ndutni:

LIZWIF BULERWE

27Nane ꞌundunutꞌíhne cha huyulh tulalhgus kꞌébihilhti, ꞌilhoghun ooghu naílhni tsꞌunkꞌus ꞌinkꞌez ꞌilhoghun ooghe ꞌintlꞌus tsꞌe. 28ꞋUdaꞌ Yakꞌusda ooghuni ꞌukꞌu nusgúz-i whuz unꞌa ꞌuhóoja ndutni whe, “Dune ntsiꞌne bubulh olto.” 29Dune ꞌoh whúya ꞌoh nudilhne nóndunulꞌus ꞌinkꞌez Jesus highudloh, “Hee! Nyun lakw ꞌudini, ‘Lugliz whucho yanahootányus ꞌinkꞌez tat dzin naꞌwhutanlelh,’ dini? 30ꞋAndit ꞌahoh nanaíndaih, ꞌinkꞌez ꞌududílyih,” huyúlhni.

31Whuz unꞌa za Lizwif lubret bumoodihne ꞌinkꞌez Moses be ꞌudustlꞌus ꞌukꞌu nunáguzne cha, Jesus highudloh ꞌinkꞌez njan dúlhodutni, “ꞋUyoonne ilhyiz, ꞌet hoontsꞌi didutchꞌoh ꞌandit ꞌududoolyih ꞌaítꞌoh. 32ꞋAndit Christ, Lizwif bulerwe tsꞌunoolhꞌen nanaóojaꞌ, ꞌet la neba ꞌalhaꞌ hotꞌeꞌ.” Nane hizih tulalhgus kꞌut sulhtíne, ꞌenne hoontsꞌi highudloh.

Jesus dazsai

33Dzetniz ꞌet whutsꞌun nꞌun whe 3:00 atꞌen ꞌuhúnitꞌoh keyoh ndulcho whe tsalhgus naki. 34Whulh ꞌilho hooloh sadzi ookꞌoh ꞌuhoonistꞌoh, ꞌet Jesus tube cho haínzul whe, dughuni kꞌunꞌa ꞌutni, “Eloi, Eloi, lama sabachthani,” “SYakꞌusda, sYakꞌusda, di ha sla dantni?” ni whe ꞌutni.

35ꞋEt whulohne dune ꞌet núdilhyane hidántsꞌo, ꞌinkꞌez ꞌuhutni, “Hadih Elijah ka huyih.”

36ꞋIlhoghun whusálgai, ꞌinkꞌez duchun ooláꞌdulꞌoo-i tsꞌekoo tooꞌ duninkꞌoz-i ye tunayuzsi, ꞌinkꞌez ndo Jesus yuza bé yunintan, ꞌinkꞌez ꞌutni, “Kꞌat Elijah whusaínya ꞌinkꞌez tilah tulalhgus kꞌut nanáyoolhtelh.”

37ꞋEt Jesus tube cho haínzul ꞌinkꞌez ꞌudekꞌez ha naji.

38Lizwif bulugliz whucho chunkelh diztiꞌ-i ooꞌih yanintꞌi, ꞌi cha soo lhóohoolcho yo únꞌa lhtsꞌenchꞌul. 39Lhuganne moodih tulalhgus yubut usyin. Jesus ntsꞌenꞌa haínzul, ꞌinkꞌez dazsai ꞌet yunalhꞌen. “Ndun dune ꞌalhaꞌ ꞌazi Yakꞌusda ooYeꞌ ꞌuntꞌoh,” ni.

40Tsꞌekoo cha ꞌet núdilhya yoo ꞌaz de whutsꞌun huwhunilhꞌen. Butoh Mary Magdalene, ꞌinkꞌez Mary Jamesyaz, ꞌinkꞌez Joses bulh buloo, ꞌinkꞌez Salome cha. 41ꞋEnne Jesus Galilee ꞌutꞌen whe hiyunúnizdil ꞌinkꞌez hila ꞌítꞌen. ꞋUyoonne tsꞌekoo lhane cha ꞌet ꞌuhutꞌen. Jerusalem tsꞌe heyuha nándil.

Joseph Jesus ꞌayalhti

42-43ꞋEt ꞌawet hulhgha suliꞌ whe Joseph Arimathea whutꞌen-un whusaínya. ꞋEn nahíyilhne toh booziꞌ unzoo-un ꞌuntꞌoh. ꞋOh de Yakꞌusda ookꞌúneꞌ whutꞌen-un, ꞌet hukwa itísꞌen. ꞋEt dzin natsꞌulyis dzin huba lhahúdutneh-un ꞌóohoontꞌoh. Joseph oodzi hooni whe Pilate yubut nenínya, ꞌinkꞌez Jesus oozi yutsꞌu yúkaꞌ daniꞌ. 44ꞋEt Pilate ooba hooncha Jesus ꞌudaꞌ dazsai. Lhugan moodih, ꞌen yukaꞌ daniꞌ ꞌinkꞌez ꞌuyulhni, “Jesus ꞌudaꞌ tilah dazsai?” 45ꞋEt hukwꞌelhꞌaz lhugánne moodih, “ꞋAlhaꞌ dazsai,” ni. ꞋEt Pilate Joseph ꞌulhni, “Jesus oozi nayólhchoot,” yúlhni. 46Joseph naih diztiꞌ-i ꞌonket, ꞌinkꞌez yuzih nanáyalhti, ꞌinkꞌez nyoo naih diztiꞌ-i yughá yozduz. ꞋInkꞌez tseꞌan whuz ꞌayalhti, ꞌinkꞌez tse cho whudunaídanꞌai. 47Mary Magdalene ꞌinkꞌez Mary Joses ooloo bulh bunalh, Jesus ꞌet nehínilhti.

Currently Selected:

Mark 15: crx

Highlight

Copy