Mark 16

Jesus dunadija

1Lizwif nahulyis dzin hukwꞌelhꞌaz hulhgha tsꞌe Mary Magdalene, ꞌinkꞌez Salome cha, ꞌinkꞌez Mary James ooloo te, yoo sooltsun-i honket, Jesus ooyustꞌe hiye hítilho huba. 2ꞋOm bun bundadaꞌ ꞌudaꞌ lisman ꞌudechoo dzin, sa haínꞌai whe tsꞌun kꞌuz hutizdil. 3Whuz hidulh whe ꞌulhodútni, “Tse cho tsꞌun kꞌut whudánduninꞌai-i mbe suba neba whusaídooꞌalh?”

4Tse ꞌudaꞌ whusandunilgai whe hotilhꞌen. Tse tube ndunincha. 5ꞋInkꞌez tseꞌan ꞌuhandil whe chilh ꞌulhyul-i be dune unli, ꞌen naílhni tsꞌunkꞌus usda whe hitilhꞌen. ꞋEt bugha ꞌánjaz.

6ꞋEt ubúlhni, “Nulhjut iloh! Tꞌeoonúszun Jesus Nazareth whutꞌen-un, tulalhgus kꞌehíyilhti-un ookunáhta whe ꞌahtꞌen. Hooloh! Dunadija whe ꞌuntꞌoh! Njan whunulhꞌen ilhtéꞌ-un. 7ꞋAwet nahdulh, Peter ꞌinkꞌez ꞌonghunne Jesus yugha hodulꞌehne cha ubudúhni, Jesus dája nohúlhni daꞌ nohtso Galilee tsꞌe tíyalh ꞌet la oohꞌen,” ubúlhni.

8ꞋEt ꞌawet tseꞌan tenáhalghaz ꞌinkꞌez nahutílhghaz tube bughá neꞌusjaz ꞌinkꞌez ꞌaw dune lhodínel hunuljut ꞌet huwa.

Jesus Mary Magdalene yunalhtsꞌet haínya

9ꞋEt Jesus dunadija hukwꞌelhꞌaz, Lizwif nahulyis dzin ꞌom bun bundadaꞌ ꞌudaꞌ ꞌet Jesus Mary Magdalene, ꞌen cho yunalhtsꞌet hainya. ꞋEn la lhtakꞌántꞌi ntsiꞌ-i nudúdeh-i ye yáhanananyoot ínleꞌ. 10Jesus yulh ꞌútꞌen inleꞌne híkꞌenudle, ꞌinkꞌez hutso whe bughu ninya ꞌinkꞌez ubudániꞌ, 11Jesus khuna whe yanꞌen, ꞌet hoontsꞌi ꞌaw buba ꞌalhaꞌ lheꞌdusnih.

Jesus nane yugha hodulꞌehne bunalhtsꞌet hainya

12ꞋEt hukwꞌelhꞌaz Jesus ꞌutsꞌun unꞌa be hóodatꞌen whe nane ꞌutsꞌun keyoh tsꞌe hiꞌus whe bunalhtsꞌet hainya. 13Whusanáhitꞌaz whe, ꞌonghunne bubulh náwhuhulnuk whe ꞌaw ꞌenne cha buba ꞌalhaꞌ lheꞌhudusnih.

Jesus whunizyane ꞌon ꞌat ꞌilhoghun bunalhtsꞌet hainya

14ꞋEt hukwꞌelhꞌaz Jesus yugha hodulꞌehne whunizyane ꞌon ꞌat ꞌilhoghun naꞌhutꞌalh whe bunalhtsꞌet hainya. ꞋEt ꞌaw be ꞌalha ꞌuhoontꞌoh-i lhuhítꞌiꞌ ꞌinkꞌez ꞌutsꞌun ꞌoninzun. ꞋEt huwa yanꞌenne ꞌaw buba ꞌalhaꞌ lheꞌhudusnih, ꞌet Jesus hukwaꞌ budániꞌ 15ꞌinkꞌez ꞌubulhni, “Yinka ndulcho whe náhdilh, ꞌinkꞌez khuni unzoo-i yinka duneꞌne whubunulhtun. 16Mbe ooba ꞌalha ꞌuhoontꞌoh-un, ꞌinkꞌez too be ꞌúlya de, ꞌen dutijih. Mbe la ooba ꞌalhaꞌ lheꞌhootꞌoh-un, ꞌen hoontsiꞌ hukwꞌunꞌa ooba nahutideh. 17Mbene la ooba ꞌalhaꞌ ꞌustꞌohne, ꞌenne la be úlhtus-un bugha óotasꞌalh. Si sooziꞌ gha ntsiꞌ-i nududeh-i dune tsꞌu ha náhuyuntiyulh. ꞋUyoo khuni be cha yahatilhduk. 18Nahunitꞌa whe tlꞌughus ntsiꞌ-i hílhchoot, kꞌus lubezo whe hítnaiꞌ de, ꞌet hoontsꞌi ꞌaw dalhótisnel. ꞋInkꞌez undudáne butsi kꞌehudilnih, ꞌenne cha soo náꞌhutitnelh.”

Jesus yakꞌuz whe naja

19ꞋEt hukwꞌelhꞌaz Jesus neMoodihti dune bubulh yálhduk ꞌetsul ꞌudíja whe, ꞌet yakꞌuz whenája ꞌinkꞌez Yakꞌusda ooghu naílhni tsꞌunkꞌus nátlꞌa didaꞌ. 20Yugha hodulꞌehne ndulcho nahúdilh, ꞌinkꞌez dune bulh yáhalhduk. NeMoodihti bubulh ꞌútꞌen ꞌinkꞌez be úlhtus-i butlꞌa dánꞌai, ꞌet huwa ooghuni be yahulhduk-un, ꞌalhaꞌ hutni wheꞌ hutni. ꞋEt ndo honeh.

Currently Selected:

Mark 16: crx

Highlight

Copy