Matthew 6

ꞋUtꞌen unzoo-i ꞌulhꞌen de, tsꞌiyanne nalh tube cho wheꞌ ꞌududolhtiꞌ junih

1“Huwahli! Khun telꞌenne ghaꞌ tihꞌalh de, tsꞌet whucho ndóhtꞌen junih. Ndahtꞌen de, nohBá yakꞌuz usda-un, ꞌaw nohba; ꞌukꞌelha hoolhtselh ꞌaitꞌoh.

2ꞋEt huwa telꞌenne ghaꞌ tihꞌalh de, khun tsꞌiyanne nalh ꞌududolhtiꞌ junih. Duba naꞌudzooꞌne, ꞌenne whuz unꞌa ꞌet nduhútꞌen. Lizwif bulugliz kꞌus ti whulheguz-un ꞌet tsꞌiyanne ubunoolhꞌen ha, ꞌet nduhutꞌen. ꞋAlhaꞌ dusni, ooba kꞌelha whutalehne, ꞌudaꞌ buba nkꞌelha whuzdliꞌ whe ꞌuhintꞌoh. 3ꞋEt huwa telꞌenne ghaꞌ tihꞌalh de, nohla ꞌintlꞌus tse datꞌen, nohla nailhnih tsꞌunkꞌus tꞌeoonoohzeh junih. 4ꞋEt whuz unꞌa ꞌuyoonne tꞌehonúszun ꞌet dahtꞌen whe telꞌenne gha ꞌáhꞌaih. NohBá yakꞌuz usda-un, whuꞌiz hooꞌen, tsꞌiyawh nohnilhꞌen whe ꞌuntꞌoh. ꞋEt huwa didutchꞌoh tsꞌiyanne but nohba ꞌukꞌelha whutilhtselh.”

Ndiz unꞌa tenadoohdli hubaꞌ hoontꞌoh

5“Tenadahdli de, khun duba naꞌudzooꞌne kꞌoh tsꞌe tenadoohdli junih. Whuz unꞌa lizwif bulugliz cha nódilhya, kꞌus ti whulheto huhóontꞌiꞌ whe whuz unꞌa tenahududli tsꞌiyanne ubunoolhꞌen ha. Nohdúsni, ꞌudaꞌ buba ꞌukꞌelha whuzdliꞌ wheꞌ hintꞌoh. 6Tenadutihdli de, nohnichꞌoh whahtꞌi-un, dati dánadihtan whe tenadoohdli. NohBá lhistꞌen-un, tsꞌiyawh nohnilhꞌen, didutchꞌoh tsꞌiyanne nalh nohba ꞌukꞌelha whutilhtselh. 7ꞋEt tenadahdli de, lhat cho ꞌoh lhunahoohdeh junih. Whuz unꞌa lhendun keyoh whutꞌenne kꞌunꞌa tenahududli. ꞋEnne lhai khuni be tenahududli de, ꞌi be Yakꞌusda budutátsꞌo huninzun ꞌet huwa. 8ꞋEt huwa ꞌenne bukꞌunꞌa ꞌudoohniꞌ junih. NohBá ndet hukwa oodutalhkut-un, nohtso daꞌ tꞌewhunínzun whe ꞌuntꞌoh.

9ꞋInka ndiz unꞌa tenadoohdli,

‘NeBá yakꞌuz sinda.

Nyooziꞌ dótiꞌ.

10Whe lerwe inli-un,

whusahooltsꞌit.

Hukwaꞌ ninzun te, ndo honeh.

Ndi yun kꞌut ꞌinkꞌez yakꞌuz cha,

ndúhoneh.

11ꞋAndit dzin ꞌuztiꞌulh-i,

negha nínꞌaih.

12ꞋInkꞌez ꞌuyoonne bulh dulhyoh tsꞌuwhulhꞌai de,

buba whunatsꞌodoolnoh.

13ꞋInkꞌez ntsiꞌ-un, ꞌen chꞌa neghinli.

ꞋEt yakꞌuz kꞌuneꞌ ꞌintꞌen-un ꞌintꞌoh, ꞌinkꞌez be ilhtus-i cha,

bé dintiꞌ-i cha, ꞌi ꞌilhiz wheni ꞌi tsꞌiyawh nchꞌeꞌ ꞌuntꞌoh.

ꞋEt ndo honeh.’

14ꞋEt dune nohdulhyoh néꞌhutꞌen de, ꞌinkꞌez buba whunaoodúlhnoh de, ꞌet de nohBá yakꞌuz usda-un, ꞌen cha nohba whunaoodutilnoh. 15ꞋEt hoontsꞌi dune nohdulhyoh néꞌhutꞌen de, buba whunalhoduzulhnoh de, ꞌaw nohBá yakꞌuz usda-un, nohBá whunaoodoolnoh ꞌaitꞌoh.”

Soo hootahni de, ꞌonghohne buchꞌa nonahꞌiꞌ

16“ꞋEt ndet soo hóotahnih de, duba naꞌudzooꞌne bukꞌunꞌa oohtꞌeꞌ junih. Ndutꞌenne dudzi yo ꞌuhilhdzun naꞌhududilꞌi wheꞌ hintꞌoh. ꞋInkꞌez dunin be teꞌhududilꞌen ꞌinkꞌez dzoh nuhuzut naꞌhududilꞌi. ꞋEt whuz unꞌa ꞌuyoonne whúbonulhtun ntsꞌenꞌa la soo huhooni hukwꞌunꞌa. ꞋAlhaꞌ whe nohdusni, mbe la ndutꞌenne buba ꞌukꞌelha yutaleh-i, ꞌudaꞌ buba kꞌelha whuzdliꞌ wheꞌ hintꞌoh. 17ꞋEt hoontsꞌi nohni soo hóotahni de, soo cho nenaꞌnoolhdeh ꞌinkꞌez nohtsegha cha naoolhtlo. 18ꞋEt whuz unꞌa soo hóotahni de, ꞌonghohne buchꞌa nonahꞌiꞌ. ꞋEt hoontsꞌi nohBá lhuhoostꞌen tsꞌe hoontsꞌi whunilhꞌen, ꞌen tsꞌiyanne nalh nohba ꞌukꞌelha whutilhtselh wheꞌ hoontꞌoh.”

Ndai la yakꞌuz be hoonzooꞌ hoontꞌoh-i, yakꞌuz tsꞌe ꞌet whuz ꞌilhoozóhlelh

19“Ndi yun kꞌut uhtꞌiꞌ-i ꞌilhoozáhle iloh. ꞋUkꞌenaditsih ꞌinkꞌez musdziyaz cha gak yutilhtselh. ꞋUndunutꞌihne nohghu dáꞌ hutiyus ꞌinkꞌez hiduntitꞌih. 20ꞋEt kꞌus ndai la yakꞌuz be hoonzooꞌ hoontꞌoh-i, ꞌi yakꞌuz ꞌilhoozáhle. ꞋEt whuz unꞌa ꞌaw kꞌenádotsih ꞌaitꞌoh. Musdziyaz cha ꞌaw gak yoolhtselh ꞌaitꞌoh. ꞋAw nohghu daꞌ hooyis ꞌinkꞌez nohgheꞌ hundunootꞌih ꞌaitꞌoh. 21ꞋEt huwa ndet la uhtꞌiꞌ-i ꞌilhoozáhla, ndet ꞌusdla-un, nohdzi cha ꞌet dutáꞌalh.”

Dune na ꞌantsꞌi too dizkꞌun leꞌ ꞌuntꞌoh

22“ꞋEt nena neyustꞌe ba too dizkꞌun leꞌ ꞌuntꞌoh. ꞋEt nohna soo ꞌuntꞌoh de, ꞌet nohyustꞌe be hootꞌen-i dizbun. 23ꞋEt hoontsꞌi dune na lubeshi be untsiꞌ de, ꞌet ooyustꞌe ndulcho whe tsalhgus be dutabun. ꞋEt huwa ndi be hootꞌen nohbulh ꞌuntꞌoh tsalhgus kꞌunꞌa be hoodatꞌen de, ꞌet dálcho-i be suba tsahólhgus ooleꞌ?”

Yakꞌusda ookꞌuneꞌ ꞌintꞌen de, sooniya cha kꞌuneꞌ ꞌontꞌen ꞌaitꞌoh

24“ꞋAw ꞌilhoghun dune nane moodih ba ootꞌen ꞌaitꞌoh. ꞋIlhoghun ꞌen yutsꞌu dutitni ꞌinkꞌez ꞌilhoghun yukꞌetisiꞌ. Kꞌus ꞌilhoghun yukꞌúneꞌtitꞌen ꞌinkꞌez ꞌilhoghun yuchꞌaz dútatni. ꞋAw Yakꞌusda kꞌuneꞌ ꞌintꞌen ꞌinkꞌez sooniya cha kꞌuneꞌ ꞌontꞌen ꞌaitꞌoh.”

Yinka dúlhtsꞌi-un huwu ni oohleꞌ junih

25“ꞋEt huwa njan ndunóhdusni, yinka dúlhtsꞌi-un huwu ni oohleꞌ junih. Tihꞌulh-i ꞌinkꞌez tihnelh-i cha, ꞌinkꞌez nohyustꞌe soo naidutihleh, ꞌi cha, ꞌi tsꞌiyawh ooghuni oohleꞌ junih. Tihꞌulh-i be háhna-i anus diztiꞌ nahzun eh? Kꞌus naih ꞌi nohuyustꞌe anus diztiꞌ nahzun eh? 26Ndo dutꞌai núdilh-i nulhꞌen! ꞋAw ꞌalheꞌ nusdloh ꞌinkꞌez ꞌaw khit huba ilheꞌosdle iloh. ꞋEt hoontsꞌi nohBá yakꞌuz usda-un, ꞌen bugha ꞌáꞌaih. ꞋI iloh lakw ba nus dáhtiꞌ? 27Nohni nohtoh mbe ꞌuntꞌoh dalcho tileh howu ni unli? ꞋAw ꞌet huwa ꞌon nus ꞌulyiz ooleꞌ ꞌaitꞌoh!

28ꞋInka di ha be dune tihleh ooghuni ꞌahli? ꞋIndaiyaz ntsꞌenꞌa ha niyeh, howu nuni nahzut. ꞋAw lheꞌustꞌen ꞌinkꞌez ꞌaw naih cha lheꞌhulhꞌen ye dune tileh ha. 29ꞋEt nohdusni Solomon ꞌen hoontsꞌi soo nadutꞌih te, ꞌaw ꞌindaiyaz anus lheꞌildzooꞌ. 30ꞋEt Yakꞌusda tlꞌo unzoo-i yilhꞌi. ꞋI ꞌandit dzin tlꞌo kꞌut ha niyeh ꞌinkꞌez bunde ꞌi tsehidutilhkulh ꞌinkꞌez dutákꞌun. ꞋEt dáhoolcho-i be nohni ꞌon nus soo nanohdutileh? Nohni ntsool-iyaz be ꞌalha lheꞌhootꞌohne ꞌunohdúsni! 31ꞋEt huwa khun lhoodolhkut junih, di suba tsꞌooꞌalh, kꞌus di suba tsꞌootnaiꞌ, kꞌus di suba be dune tsꞌooleꞌ, noohzin junih. 32ꞋAlhaꞌ ꞌudun yun kꞌut whutꞌenne hukwa hitísꞌen. ꞋInkꞌez ꞌalha ꞌi be nohBá yakꞌuz usda-un, ndai hoonli be tsꞌuwhulhdoh-i, tsꞌiyawh tꞌeooninzun. 33ꞋEt hoontsꞌi ntsꞌenꞌa Yakꞌusda nohba lerwe tileh ꞌinkꞌez be tsꞌihꞌun unꞌa ꞌuhoontꞌoh-i nohchꞌeꞌ tileh, ꞌet za hukwaꞌ nahzun, ꞌinkꞌez ꞌon ꞌun cha tsꞌiyawh nohgha tíkulh wheꞌ hoontꞌoh. 34ꞋEt huwa bunde dawhútanelh, ꞌet howu ni oohleꞌ junih. Bunde daootanelh la, ꞌet la ndo honeh. Dzin totsuk sooꞌ hoolcho whe huwu ni hooli ꞌet huwa.”

Currently Selected:

Matthew 6: crx

Highlight

Copy