Matthew 5

Jesus ꞌubulhni, “Dawhuldzooꞌ-un ꞌet bughá whultsꞌut”

1ꞋIlhunaoosdilne Jesus ꞌubunilhꞌen whe ndo dzulh enun tsꞌe ndo whinya ꞌinkꞌez ꞌet nátlꞌa didaꞌ whe yugha hódulꞌehne hitsꞌoozdil. 2ꞋEt whe whubondunilhꞌeꞌ, ꞌet njan ndúbulhni,

3“Lubeshi ꞌulhꞌenne, budzi telꞌen unline,

ꞌenne yakꞌuz kꞌuneꞌ whulꞌen-un oochꞌeꞌ huzdliꞌ,

ꞌet huwa ꞌukꞌenus hoonzoo-un bugha whultsꞌut.

4Dulubeshi ghu ni unline, ꞌenne ꞌukꞌenus kꞌenánitꞌane hutileh.

ꞋEnne ꞌuhuja ꞌukꞌenus hoonzoo-un bugha whultsꞌut.

5Yo údudildzunne,

ꞌenne ndi yun kꞌut buchꞌeꞌ whutaleh ꞌet huwa ꞌukꞌenus hoonzoo-un bugha whultsꞌut.

6Mbe la Yakꞌusda ye tsꞌihꞌun ꞌuntꞌoh-i yukaꞌ ninzunne, hukwaꞌhuninzun-un, ꞌet bugha óotaltsꞌulh.

ꞋEnne ꞌukꞌenus hoonzoo-un bughá whultsꞌut.

7ꞋUyoonne gha tꞌeninzunne, ꞌenne Yakꞌusda cha bugha teꞌuntazeh,

ꞌenne ꞌukꞌenus hoonzoo-un bughá whultsꞌut.

8Mbene la oodzi dutsun lhilohne,

ꞌenne kꞌat le Yakꞌusda hutiꞌelh ꞌet huwa ꞌenne ꞌukꞌenus hoonzoo-un bughá whultsꞌut.

9Mbe la tsꞌihꞌun lhtsꞌun ꞌuhootꞌeꞌne, ꞌenne Yakꞌusda buzkeh ubodutánelh.

ꞋEnne ꞌukꞌenus hoonzoo-un bughá whultsꞌut.

10Tsꞌihꞌun ꞌuhintꞌoh huwa dzoh nubuhulhdehne, ꞌenne yakꞌuz kꞌuneꞌ whulꞌen-un, ꞌet buchꞌeꞌ hinli.

ꞋEnne ꞌukꞌenus hoonzoo-un bughá whultsꞌut.

11Nkede suba dune nohchꞌaz yahutilhduk ꞌinkꞌez dzoh nunohotilhdzut, ꞌinkꞌez tsꞌiyaitsuk whutsꞌit khuni dutsun-i be nohchꞌa ꞌutsꞌun unꞌa yahutilhduk, si sgha whuz unꞌa dune dzoh nunohulhdzut de, ꞌet ꞌukꞌenus hoonzoo-un nohghá whultsꞌut. 12Kꞌudada whunúlhni ꞌinkꞌez ꞌukꞌenus hoonáhtꞌiꞌ! Yakꞌuz hooncha whe nohba kꞌelha whutaleh. Nohtso nus hooꞌen inleꞌne, whuz unꞌa za bube huzula inleꞌ.

Ndi yun kꞌut lubeshi ꞌulhꞌenne buba be hootꞌen-i ꞌinkꞌez lisel cha léꞌahtꞌoh

13Nohni ndi yun kꞌut lubeshi ꞌulhꞌenne buba lisel leꞌ ꞌahtꞌoh. ꞋEt hoontsꞌi lisel ꞌaw oonalhuwhúlhni ꞌulhih te, ntsꞌenꞌa suba doo cha lisel oonawhúlniꞌ naoodleꞌ? ꞋAw hoonli ba lheꞌízooꞌ whe ꞌuntꞌoh. ꞋAntsꞌi dune tehúyulhkuk ꞌinkꞌez hikꞌu núdilh wheꞌ hoontꞌoh.

14Yun ka buba be hootꞌen ꞌahli. Keyoh whuti dzulh kꞌut whuzꞌai de, ꞌaw whuntoolhtih ꞌaitꞌoh. 15Dune too dizkꞌun naidulhkꞌan ꞌinkꞌez ꞌaw chalhyal yunedóoꞌalh ꞌaitꞌoh, kꞌus lutab kꞌeyítaꞌalh ꞌinkꞌez kwun ꞌi gha yoh dilhtsꞌine huwhuntilhꞌelh. 16Dune ba be hootꞌen-i ꞌahli. ꞋI be nohꞌeꞌutꞌen unzoo-i dune huyuntilhꞌelh ꞌinkꞌez nohBá yakꞌuz usda-un hidutálhtiꞌ.”

Jesus ꞌubulhni, “Moses be ꞌudustlꞌus ꞌinkꞌez nus hooꞌenne bubeꞌ ꞌudustlꞌus tsꞌiyawh lhadútisdleh”

17“Moses be ꞌudustlꞌus ꞌinkꞌez nus hooꞌenne bubeꞌ ꞌudustlꞌus ꞌi gak tiselh ha whusásya noohzin junih. ꞋI tsꞌiyawh lhadútisdleh ꞌet wheni whusásya. 18ꞋAlhaꞌ dusni, Moses be ꞌudustlꞌus Hebrew bughuni kꞌunꞌa hoontꞌum-unyaz whe ꞌukꞌeguz-un ꞌinkꞌez hoontꞌum-unyaz usgus-un, ndet ꞌuwhulhni, ꞌet tsꞌiyawh ꞌet ndúhooja de, ꞌet whutsꞌun ꞌaw ndi yun ꞌinkꞌez yakꞌuz cha ꞌetsul ꞌuhóneh ꞌaitꞌoh. 19ꞋEt huwa ndai khuni neghaltsꞌut-i, ꞌi hoontsool-unyaz hoontsꞌi dune kꞌuhinínyuz de, ꞌinkꞌez ꞌuyoonne whuz unꞌa whubodutilhꞌeh dune ndutꞌen de, ꞌet yakꞌuz kꞌúneꞌ whulꞌen-un, ꞌen ꞌaw hoonli lhiloh-un yidutánelh. ꞋEt ndi khuni netlꞌa diltsꞌut-i, dune hikꞌuneꞌ ꞌutꞌen de, ꞌinkꞌez ꞌuyoonne whuz unꞌa ꞌaz whubodutilhꞌeh, yakꞌuz kꞌúneꞌ whulꞌen-un, be ncha-un ꞌuntꞌoh hidutánelh. 20ꞋAlha nohdusni ndunne Moses be ꞌudustlꞌus ꞌukꞌu nunáguzne ꞌinkꞌez Phariseene cha, ꞌenne hiye tsꞌihꞌun unꞌa ꞌuntꞌoh-i ꞌinkꞌez nohni be tsꞌihꞌun unꞌa ꞌahtꞌoh-i, ꞌi buba nus ahzoo de, ꞌet de za ntsꞌe la yakꞌuz kꞌuneꞌ whulꞌen-un tsꞌe tíhdulh.”

Nyulh dune hoonli-unyaz whe nchꞌaz ditni tꞌewhunínzun de, ooghu ninya ꞌinkꞌez kꞌeke naooltselh

21“ꞋEt whulh ꞌudahtsꞌo njan duhutni, ‘Dune solhghelh junih,’ ꞌinkꞌez mbe la dune silhghi-un, ꞌet hukwꞌunꞌa buba nahutideh wheꞌ hoontꞌoh. 22ꞋEt hoontsꞌi sichꞌoh ꞌunohdusni, mbe la ꞌantsꞌet dulh dune bulh hunilchꞌe de, ꞌenne buba nahutideh wheꞌ hoontꞌoh. ꞋEt mbe la dudulh dunene ‘Raca!’ ꞌulhníne de, ꞌet ndi khuni dakelh kꞌunꞌa ‘Ntsiꞌ’, ni whe ꞌutni, ꞌi gha nahiyilh-un but hutiyin. ꞋInkꞌez cha za mbe la dune, ‘Whuzini dune inli!’ yulhni de, mbe la ndutnine, ꞌenne tube whe whúnujut-un kwuncho yo tsꞌe buhutinoh.

23ꞋEt huwa hoonliyaz loodel kꞌut howaꞌ tánꞌalh-i, ꞌinkꞌez nyulh dune hoonli whe nchꞌaz ditni whunailni de, 24ꞌet whutso nyulh dune bulh kꞌeke nalhoolhtselh. ꞋEt hukwꞌelhꞌaz ꞌandit za loodel kꞌut huwaꞌ tanꞌalh-i, ꞌet huwa ónꞌalh.

25ꞋEt khun dune hoonli whe nchꞌaz ditni de, ꞌaho ootsꞌun tsꞌihꞌun naꞌhonleh. ꞋEt nahiyilh-un but nényutalhtelh whutso ndóneh. ꞋEt ꞌaw ndúlhinel de, nchꞌaz ditni-un, ꞌen nahiyilh-un but nényutalhtelh. ꞋEt nahiyilh, ꞌen neilhchuk-un tlꞌa nyutilhtelh ꞌinkꞌez nchꞌaz dánaꞌ dutaꞌalh. 26Tsꞌihꞌun unꞌa nohdusni, ndai la tsꞌiyaitsuk ookꞌelha whutilhtselh ꞌet whutsꞌun, ntsꞌenꞌa suba whuchꞌa naoohjaꞌ?”

Mbe la tsꞌeke yunilhꞌen whe dudzi yo whe njan duninzun, “Bulh níntaꞌ tistꞌelh hukwaꞌ nuszun,” ꞌudaꞌ yulh nintaꞌantꞌen whe ꞌuntꞌoh

27“Whutsodaꞌ whulh ꞌudahtsꞌo njan dúhutni, ‘ꞋUyoon tsꞌeke bulh nintaꞌontꞌen junih.’ 28ꞋEt hoontsꞌi nohdusni mbe la tsꞌeke yunilhꞌen whe dudzi yo whe nduninzun, ‘Bulh níntaꞌ tistꞌelh hukwaꞌ nuszun,’ ꞌudaꞌ yulh nintaꞌantꞌen whe ꞌuntꞌoh. 29ꞋEt nailhni tsꞌe nyuna ꞌi be lubeshi ꞌinla de, ha nónꞌalh ꞌinkꞌez ꞌun ntolhꞌis. ꞋEt ꞌon nus sooꞌ hoontꞌoh nohyustꞌe ndulcho dutákꞌun-un whanus sooꞌ hoontꞌoh. 30ꞋInkꞌez nailhni tsꞌe nla be níntaꞌ nintꞌen de, kꞌontꞌas ꞌinkꞌez ꞌun tolhꞌis. ꞋOn nus sooꞌ hoontꞌoh nohyustꞌe ndulcho dutákꞌun-un whanus sooꞌ hoontꞌoh.”

Dune tsꞌeke bulh lhgho dilhtsꞌi-un, ꞌet ꞌilhiz wheni ꞌotátꞌelh

31“ꞋOn ꞌun nduwhutni ‘Mbe la duꞌat ꞌetsul ꞌutilelh-un, ꞌudustlꞌus ye ꞌetsul itilelh-i yutlꞌa yóolhchoos hubaꞌ hoontꞌoh.’ 32ꞋEt hoontsꞌi ꞌunohdusni ooꞌat ꞌuyoon dune bulh nintaꞌantꞌen de, ꞌet huwa za ꞌudustlꞌus ndai la ye ꞌetsul itilelh-i yutlꞌa yóolhchoos hubaꞌ hoontꞌoh. Ndúlhinel whe duꞌat ꞌetsul ꞌuyinla de, dichꞌoh duꞌat nintaꞌantꞌen-un yulhtsi. ꞋInkꞌez tsꞌeke ꞌuyoon dune ghu nasda de, dune ꞌen cha nintaꞌutꞌih-un unli whe ꞌuntꞌoh.”

Khun nghuni kꞌónyis junih

33“Doo cha za niz de whudizulh daꞌ tsꞌiyawh tꞌeoonáhzun ꞌudaꞌ dune daja hutni whe njan nduhutni, ‘Khun nyunchꞌoh nghuni kꞌónyis junih. NeMoodihti whe ootsꞌu nahizinya ꞌet whunilhchoh hukwꞌunꞌa ꞌontꞌen hubaꞌ hoontꞌoh.’ 34ꞋEt hoontsꞌi ꞌunohdusni, khun whuz unꞌa te ndudóohni junih. Khun ‘Yakꞌuz nalh ꞌudusni,’ doohniꞌ junih. Yakꞌusda ookwꞌutsꞌuzda cho diztiꞌ-i, ꞌi ꞌet ꞌusꞌai ꞌet huwa. 35Kꞌus ‘Ndi yun kꞌut whunalh ꞌudusni,’ doohniꞌ junih. Yakꞌusda yukꞌudílhꞌez-i ꞌuntꞌoh ꞌet huwa. Kꞌus khun te ‘Keyoh Jerusalem whunalh ꞌudusni,’ doohniꞌ junih. Lerwe kꞌus diztiꞌ-un ookeyoh whucho ꞌuhoontꞌoh ꞌet huwa. 36Kꞌus khun te ‘Whe khasna-un whe nahooyeh,’ junih. ꞋAw nohtsigha, ꞌilho hoontsꞌi ꞌulhyul kꞌus dulhgus naoolhtselh ꞌaítꞌoh ꞌet huwa. 37ꞋEt kꞌus ndiz unꞌa njan dúdoohtni, ꞌet ꞌawet ‘A,’ dahni, ‘A,’ ꞌuntꞌoh. ꞋInkꞌez ‘ꞋAwúndooh,’ dahni de cha, ‘ꞋAwúndooh,’ ꞌuhoontꞌoh. ꞋEt ꞌutsꞌun unꞌa ꞌudahni de, ꞌet ntsiꞌ-un tsꞌu ha dutídoh whe ꞌuntꞌoh.”

Dune ntsiꞌ-un, ꞌen oochꞌaz nóntꞌi

38“ꞋEt whutsodaꞌ whulh ꞌudahtsꞌo ntsꞌenꞌa dune daja hutni inleꞌ whe njan duhutni, ‘Dune oona hoos̱ꞌen silhtsi de, nyunchꞌoh nyúna be hoos̱ꞌen tanleh. ꞋI be hukwꞌelha whutalhtselh. ꞋEt ooghu dádilhchus de, nyunchꞌoh nghoo be hukwꞌelha whutalhtselh,’ hutni inleꞌ. 39ꞋEt hoontsꞌi ꞌunohdusni, dune ntsiꞌ-un kꞌólꞌen junih. ꞋEt kꞌus mbe la nailhnih tsꞌe nohnizkuk de, ꞌintlꞌus tsꞌe ootsꞌun nándunontꞌah. 40Nzootꞌan nahiyilh-un but ntsꞌu yuka ꞌulhni de, ndzoot cha ooghá yolhchoos. 41Dune dawhuldzoh sulh tányalh nyulhni de, nat ꞌuwhuldzoh tsꞌe bulh ha óonyaꞌ. 42Mbe la hoonli ntsꞌu háꞌ ꞌutni de, ooghá yonꞌalh. Hoonli dughu sinla nyulhni de, oochꞌaz naoolꞌah junih.”

Nohchꞌaz ditnine bukꞌeoohtsiꞌ

43“Njan cha whulh ꞌúdahtsꞌo, ‘Nye nghoh whutꞌi-un ookꞌeoonsiꞌ ꞌinkꞌez nchꞌaz ditni-un, ootsꞌu doniꞌ.’ 44ꞋEt hoontsꞌi nohdusni, nohchꞌaz ditnine bukꞌeoohsiꞌ. Mbene la denóhdulene, ꞌenne khuni unzoo-i be bubulh yaóolhduk. Nohtsꞌu dutnine, butsꞌun oohzooꞌ. Hoontsiꞌ nohtsꞌun neꞌhutꞌen ꞌinkꞌez dzoh nunohulhdzutne, buba tenadoohdli. 45ꞋEt de la whunúlhtun nohBá yakꞌuz usda-un, buzkeh ꞌahli whe ꞌahtꞌoh. Yakꞌusda sa ntsiꞌne ꞌinkꞌez unzoone sa bukꞌidindi. Tsꞌihꞌun ꞌuntꞌohne ꞌinkꞌez tsꞌihꞌun lheꞌitꞌohne cha lhgha bukꞌut nawhúlhtih. 46Mbene nohkꞌensiꞌne, ꞌenne za bukꞌehtsiꞌ de, di suba nohgha óokat? Ndunne sooniya nalhdzoohne, ꞌenne cha whuz unꞌa za nduhutꞌen. 47ꞋInkꞌez nohulhutsinke, ꞌenne za hadih budahni de, ꞌet ꞌuyoonne anus ahzoo naꞌdunáhzun eh? Sooneya nalhdzoohne, ꞌenne cha whuz unꞌa za nduhutꞌen. 48ꞋEt huwa nohBá yakꞌuz usda-un, ꞌen dantꞌoh whe tsꞌihꞌun ꞌuntꞌoh, ꞌet nohni cha whuz unꞌa za oohtꞌeꞌ hubaꞌ hoontꞌoh.”

Currently Selected:

Matthew 5: crx

Highlight

Copy