Luke 14
14
Natsꞌulyis dzin, ꞌet Jesus unduda-un soo náꞌyinla
1ꞋEt ꞌuhooja, ꞌilhoghun Pharisee bumoodih ooyoh, natsꞌulyis dzin, Jesus lhes naꞌtitꞌulh ha danínya. ꞋEt soo cho highunli. 2ꞋInkꞌez ꞌilhoghun dune ooyustꞌe toh too whudizbun suliꞌ, ꞌet hukwꞌé unduda, Jesus but neninya. 3ꞋInkꞌez Jesus Moses be ꞌudustlꞌus kꞌut, soo beni hoonli be yalhdukne, ꞌinkꞌez Phariseene cha ndubulhni, “ꞋEt neba tsꞌihꞌun ꞌuhoontꞌoh eh natsꞌulyis dzin dune soo naꞌtsꞌoolhꞌen?” 4ꞋEt tꞌehudusnih. ꞋEt dune yílhchoot ꞌinkꞌez soo naꞌyinla, ꞌinkꞌez yula naditni.
5ꞋEt ꞌubulhni, “Mbe nohtoh muyool ꞌutꞌi-un kꞌus oomusdoos dune tsa kꞌet ꞌaltsꞌut de, ꞌaw natsꞌulyis dzin huwa eh ꞌaho ꞌaw ha nálhuhitilhtelh nahzun eh?” 6ꞋEt huwun uboodulhkut-un, ꞌaw daja hudooniꞌ ꞌaitꞌoh.
Dune ꞌuntꞌohne tihleh-un hukwa oohtꞌen junih
7ꞋEt ooghu nusjane kꞌus hoonzoo-un ꞌutahahóditꞌai ꞌubunilhꞌen wheꞌ hutꞌen. ꞋInka huwa whutsꞌodulꞌeh-i be bubulh yalhduk whe njan ndutni, 8“Dune lhghu tikelh tsꞌe nohghu nusja de, kꞌus hoonzoo-un te natlꞌa doohdalh junih. Doo ka la nohando ꞌuntꞌoh-un tilah highu nóyaꞌ. 9ꞋInkꞌez nohghu nususya-un la ꞌunyudóniꞌ, ‘Sinda-un ootlꞌa hóonꞌaih, ndun ꞌet oodaꞌ.’ ꞋInkꞌez la yooya sinliꞌ whe ꞌukꞌenus ꞌudeyo ꞌet la nanátlꞌadondalh. 10ꞋEt hoontsꞌi nohghu nuhúzya-un whuz toohyaꞌ ꞌinkꞌez dati whenghoh nátlꞌa dondalh. ꞋEt de nohghu nusiya-un ꞌen tilah ꞌunohdóniꞌ, ‘Skꞌeke ꞌuhoontꞌoh-un sinda.’ ꞋEt lutab kꞌut nyulh dilhtsꞌine nyodólhtiꞌ. 11ꞋEt mbe la ncha naꞌdudilꞌi-un, ꞌen yooya tileh. ꞋInkꞌez mbe la teꞌ dudilꞌen-un, ꞌuntꞌoh-un huyoolhtselh.”
12Mbe la yughu nusiya-un, ꞌen Jesus ꞌuyulhni, “Ndet la dzetniz kꞌus hulhgha huwaꞌ tanꞌalh de, khun te nkꞌeke, kꞌus nyulhutsinke, kꞌus nyunatneke, kꞌus nye nghoh whutꞌine mbene la hoonzooꞌ ꞌuntꞌohne bughu nónyaꞌ junih. ꞋEt bughu nusinya de, ꞌenne tilah nghu nunáhoodaꞌ whe mba ꞌukꞌelha holeꞌ. 13ꞋEt hoontsꞌi huwa ꞌutanꞌalh de, ꞌet telꞌenne, ꞌinkꞌez dzoh nudilhne, ooyustꞌe bodinꞌaine, ꞌinkꞌez hoos̱ꞌenne cha, nduntꞌohne, ꞌenne bughu nonyaꞌ. 14ꞋEt nyun ꞌukꞌenus hoonzoo-un nyulh ꞌúhoneh, ꞌaw mba kꞌelha hoohoolhtselh ꞌaitꞌoh. ꞋInkꞌez nyun tsꞌihꞌun ꞌuntꞌohne dunahudidil de, ꞌet de mba kꞌelha whutaleh.”
Dune ghu nusja-un whucho huwu yalhduk
15ꞋEt ꞌilhoghun dune lutab kꞌut yulh usda-un, whudantsꞌo, ꞌen ꞌuyulhni, “Yakꞌusda whe lerwe unli-un, mbe la ꞌet ꞌaꞌalhne, ꞌukꞌenus hoonzoo-un bugha whutaltsꞌulh!”
16ꞋInkꞌez Jesus ꞌuyulhni, “ꞋIlhoghun dune hulhgha hooncha whe huwaꞌ ninꞌai. ꞋInkꞌez lhane ghu nusiya. 17ꞋEt hulhgha naꞌhutitꞌulh-un dude ꞌulhna-un whe yálhꞌaꞌ ꞌinkꞌez mbene la bughu nusjane ubudóniꞌ, ‘ꞋAwet tsꞌiyai lhadúja, diz ꞌahdulh!’
18Tsꞌiyawh ꞌonilha ꞌaw ꞌuhooneh ꞌaitꞌoh hutni. ꞋEt ꞌudechoo ꞌen ꞌudutni, ‘Si yun osket ꞌinkꞌez whuz tisyalh whuntisꞌelh ha, ꞌet huwa ꞌaw oosneh ꞌaitꞌoh sba dóniꞌ.’
19ꞋEt ꞌuyoon ndutni, ‘Kwulaiꞌ musdoos dune osket. ꞋOotásdzih ꞌinkꞌez naduntizꞌelh daóotꞌeꞌ suba, ꞌet huwa ꞌaw oosneh ꞌaitꞌoh sba doniꞌ.’
20ꞋUyoon cha njan ndutni, ‘ꞋAndit ꞌat ꞌustꞌi ꞌet huwa ꞌaw whuz toosyaꞌ ꞌaitꞌoh.’
21ꞋEt be ꞌulhna-un yughu nanja ꞌinkꞌez dumoodih yudániꞌ. ꞋEt yoh whumoodih hunilchꞌe ꞌinkꞌez dude ꞌulhna-un ꞌuyulhni, ‘Soo ꞌa cho! Keyoh whuti tsꞌínyalh ꞌinkꞌez tiyaz ndulcho whe ninya ꞌinkꞌez telꞌenne, dzoh nudilhne, ꞌinkꞌez hoos̱ꞌenne cha ꞌinkꞌez ooyustꞌe bodinlane cha, tsꞌiyawh whusabinle!’ ꞋInkꞌez whe yálhꞌaꞌ.
22Dude ꞌulhna-un whusanája ꞌinkꞌez ꞌutni, ‘Smoodih ntsꞌenꞌa ꞌudini-un, hukwꞌunꞌa ꞌusja, ꞌet hoontsꞌi ꞌawhuz hooncha-un whuzꞌai.’
23ꞋEt moodih dude ꞌulhna-un ꞌulhni, ‘Ti whucho tsꞌe inyalh ꞌinkꞌez ti whuyaz cha tsꞌe inyalh ꞌinkꞌez diz hutoodilh hukwa bilhꞌen, ꞌet de la syoh whudoobun. 24Nohdusni ndunne ꞌudechoo bughu nusúsyane, ꞌaw ꞌilhoghun hoontsꞌi ndi titꞌulh-i ꞌaw hinalhuhootásdli.’”
Nohni nohtoh ꞌilhoghun ꞌahli whe tsꞌiyawh ahtꞌi-i, ꞌaw oolaꞌduzahni de, ꞌaw sgha hodulꞌehne oohleꞌ ꞌaitꞌoh
25ꞋEt lhane ꞌilhozdilne huyulh tizdil. Butsꞌu nálhꞌa ꞌinkꞌez ꞌubulhni, 26“Mbe la stsꞌu tiyalh seꞌ ꞌutꞌen kꞌoh ꞌuwhutilhꞌelh-un whe dubá ꞌinkꞌez duloo, duꞌat cha, ꞌinkꞌez duzkeh, dulhutsinke, ꞌinkꞌez dulhtuske, ꞌalhaꞌ dichꞌoh whe yinka usda-un cha, ndi njan tsꞌiyawh hukwa lheꞌhunizun de, ꞌen ꞌaw sgha hodilꞌeꞌ-un ooleꞌ ꞌaitꞌoh. 27ꞋInkꞌez mbe la dutulalhgus lhudistel-un suntiyal-un, ꞌaw sgha hodilꞌeꞌ-un ooleꞌ ꞌaitꞌoh.
28Mbe ꞌuntꞌoh nohtoh-un, whedinꞌai-i ꞌutilelh de, ꞌaw lawk ꞌudechoo nátlꞌa dida ꞌinkꞌez daltsuk tileh ꞌaw lhuyóolhtoh ndi wheninꞌai-i bé lhaoodutaneh-i? 29Doo ka la ꞌaw ndulhinel de, ꞌinkꞌez yoh ookꞌu whuzꞌai-i ꞌinla, ꞌaw soo ꞌultsuk ye lhaoodutileh-i lhitꞌiꞌ de, whunilhꞌenne, tsꞌiyawh highu tidloh. 30ꞋInkꞌez la ꞌuhudooniꞌ, ‘Ndun dune whedinꞌai-i wheꞌ yuninleꞌ ꞌinkꞌez ꞌaw lhai dooleh ꞌaitꞌoh!’
31Kꞌus mbe lerwe ꞌutinelh ꞌuyoon lerwe bulh lhutigan hukwa ntizilh, ꞌaw lawk ꞌudechoo nátlꞌa dida ꞌinkꞌez hukwꞌu nuni noolhdzut datinelh. ꞋEt soo tilah 10,000ne duduneꞌne, ꞌenne be ndun ꞌuyoon lerwe ꞌen 20,000ne lhuganne soo tilah ndunne 10,000ne be bududóyaꞌ? 32Kꞌus ndun ꞌuyoon lerwe ꞌen ꞌawhuz nilhdzaꞌ ꞌaz de hídulh whe, ꞌet khuni yuba naꞌane yutsꞌu whébalhꞌaꞌ, ntsꞌenꞌa suba tsꞌihꞌun nenáhohoꞌalh ꞌet huwa. 33ꞋEt huwa nohni nohtoh ꞌilhone ꞌahli whe, tsꞌiyawh ahtꞌi-i, ꞌaw oolalhduzahni de, ꞌaw sgha hodilꞌeꞌne oohleꞌ ꞌaitꞌoh.
Lisel oonalhuhóolni de, ꞌaw hoonli huba lheꞌízooꞌ whe ꞌuntꞌoh.
34Lisel ꞌi ꞌuzooꞌ whe ꞌuntꞌoh. ꞋEt hoontsꞌi ꞌaw oonalhuwhúlhnih suliꞌ de, ntsꞌenꞌa suba doo cha oonawhúlniꞌ naoodleꞌ? 35Lisel oonalhuhóolni de, ꞌaw hoonli huba lheꞌízooꞌ whe ꞌuntꞌoh. ꞋAw yun ꞌinkꞌez musdoos dáltsꞌiꞌ-un ꞌet hoontsꞌi huba lheꞌízooꞌ whe ꞌuntꞌoh. ꞋI Dune tehúyulhkuk, huba ꞌuntꞌoh. Mbe la oodzeh hoonline hohoozólhtsꞌaiꞌ!”
Currently Selected:
Luke 14: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
