Luke 15
15
ꞋUsbai ninta nilhtí-un
1ꞋEt sooniya nalhdzoohne ꞌinkꞌez lubeshi ꞌulhꞌenne cha tsꞌiyawh Jesus huyootuzálhtsꞌilh ha highu nindil. 2ꞋInkꞌez Phariseene ꞌinkꞌez Moses be ꞌudustlꞌus ꞌukꞌu nunáguzne cha highu yawhenilhduk whe njan nduhutni, “Ndun dune ꞌen lubeshi ꞌulhꞌenne, ꞌenne bubulh neꞌutꞌen ꞌinkꞌez bubulh ꞌáꞌalh cha ꞌutꞌen.”
3ꞋEt huwa oogha whutsꞌodulꞌeh-i be bubulh yalhduk whe njan ndutni, 4“Mbe ꞌuntꞌoh nohtoh dune ꞌen ꞌusbai 100 ꞌutꞌi whe ꞌilho ninta nilhti. ꞋAw 99 ꞌenne chuntoh ꞌawet nébuninla ꞌinkꞌez ꞌilhoghun ninta inilhti-un nayitálhtelh whutsꞌun yukunúta? 5ꞋInkꞌez nayilhti de duwus kꞌeyilhti ꞌinkꞌez hootátꞌeꞌ. 6ꞋEt duyoh tsꞌu naóosja dukꞌekene ꞌinkꞌez ye nghoh whutꞌine tsꞌiyawh ꞌanih budaniꞌ ꞌinkꞌez ꞌubulhni, ‘Sulh hoonahtꞌiꞌ. Seꞌusbaiyaz nintanusti inleꞌ, ꞌen nasti!’ 7ꞋEt nohdusni, whuz unꞌa za ꞌilhoghun dune dudeni nahundunizꞌai, ꞌen 99 tsꞌihꞌun ꞌuntꞌohne ꞌudaꞌ dulubeshi chꞌa dudeni nahundunizdla. ꞋEt hoontsꞌi ndun ꞌilhoghun dune ꞌen gha ndo yakꞌuz dilhtsꞌine buba nus ꞌon nus howun tálhni.”
8“Kꞌus ꞌilhoghun tsꞌeke whunizyai silver ꞌutꞌi ꞌinkꞌez ꞌilho ninta ninꞌai. ꞋAw eh too dizkꞌun nadulhkꞌan ꞌinkꞌez yoh tenáwhulhtsas, ꞌinkꞌez nayitáꞌalh whutsꞌun yukunúta? 9ꞋInkꞌez nayinꞌai de dukꞌekene ꞌinkꞌez ye nghoh whutꞌine ꞌalhgoh ꞌanih budaniꞌ ꞌinkꞌez ꞌubudútanelh, ‘Sulh hoonahtꞌiꞌ! Ndi sooniya ꞌilho ninta nusꞌai-i nasꞌai!’ 10Whuz unꞌa za nohdusni, ꞌilhoghun dudeni nahundunizꞌai de, Yakꞌusda oolizasne tsꞌiyawh howun tálhni.”
ꞋIlhoghun nintaltsꞌut inleꞌ ꞌawet nasti
11Jesus ꞌet ꞌutni, “ꞋIlhoghun dune, nane ooyeꞌ unli. 12ꞋUdekꞌoh-un ꞌet dubá ndúyulhni, ‘ꞋUbá ndai la sba naootándzilh-i ꞌandit stlainle.’ ꞋInka oobá nayootádzilh-i, buba lhkꞌé yanla.
13ꞋEt hukwꞌelhꞌaz ꞌaw lhat dzin lhiloh, ꞌet ꞌudekꞌoh-un yugha ininlai-i, tsꞌiyawh soo neninla. ꞋInkꞌez keyoh nilhdzaꞌ tsꞌe tsꞌu whinya. ꞋEt whuz oozya whe yutꞌi-i, ꞌi tsꞌiyawh ye nzóodalꞌeꞌ ꞌinkꞌez gak yulhtsi. 14ꞋOh daꞌ yutsꞌu yoozi-i tsꞌiyawh gak yulhtsi whe nyo yun kꞌut dai cho whúzdliꞌ. ꞋInkꞌez chilh tsꞌiyai ye ndunidzit suliꞌ. 15ꞋInka ꞌilhoghun dune ꞌet yun utꞌí-un, ꞌen ꞌutꞌen yugha nínꞌai. ꞋInkꞌez ha nulhyeh tsꞌe whe yálhꞌaꞌ, ꞌet gugoos ghá tiꞌaih ha. 16ꞋInkꞌez ooyeꞌíltsꞌul kꞌet ꞌet ndunínzun, nyoo gugoos yuꞌalh-i, ꞌi uncha usꞌalh, ninzun. ꞋEt hoontsꞌi ꞌaw dune yugha lhéꞌusꞌai.
17ꞋEt beni oogha nadiltsꞌut leꞌ ꞌuja ꞌinkꞌez ꞌutni, ‘Daltsukne ꞌubá ba ꞌutꞌenne huyaꞌalh-i buba nus-i niltsuk, ꞌinkꞌez si njan lheꞌustꞌoh! ꞋAwet dai súzulhghe! 18Dunadósjaꞌ ꞌinkꞌez ꞌubá ootsꞌu nátoosjaꞌ ꞌinkꞌez la ꞌudósniꞌ, ꞌubá yakꞌuz whudulhyoh cha lubeshi ꞌusdla ꞌinkꞌez nyun mbut cha. 19ꞋAw ꞌon ꞌat syeꞌ sudutanelh huba soo lheꞌuzdzooꞌ. ꞋEt huwa mba ꞌutꞌenne kꞌunꞌa ꞌusolhdzin.’ 20ꞋInka ꞌet ꞌawet dubá tsꞌu nátisja. ꞋAwhuz yoo ꞌaz de nádalh, oobá yutilhꞌen whe ꞌaho yugha teꞌninzin. Yududílhgaih ꞌinkꞌez duyeꞌ dushih beꞌ yilchoot ꞌinkꞌez naiditsꞌooz.
21ꞋInkꞌez ooyeꞌ uyúlhni, ‘ꞋUbá yakꞌuz whudulhyoh lubeshi ꞌusdla ꞌinkꞌez nyun mbut cha. ꞋAw ꞌon ꞌat nyeꞌ sodutánelh huba soo lhéꞌuzdzooꞌ.’
22ꞋEt hoontsꞌi oobá dude ꞌustlenne ꞌet ndubulhni, ‘Naih ꞌukꞌenus unzoo-i whusalhchoos ꞌinkꞌez be sóo naidulhleh, ꞌinkꞌez latultꞌo cha oola nedahꞌaih ꞌinkꞌez kegon cha belhꞌes. 23ꞋInkꞌez musdoosyaz nilhkꞌa-i ulhchoot ꞌinkꞌez nasulhghe! ꞋEt si ꞌutsꞌooꞌalh ꞌinkꞌez tsꞌonólhni. 24Syeꞌ dazsai inleꞌ ꞌinkꞌez ꞌandit nahítnaꞌ. Nintanusti inleꞌ, ꞌinkꞌez nasti.’ ꞋEt ꞌawet tsꞌiyanne hiyulh whúnilhni.
25ꞋEt ooyeꞌ, ꞌudetso whudilhdzulh-un ha níyeh tsꞌe ꞌutꞌen. ꞋEt yoh tsꞌu natisja whe whenghoh nadalh whe shun cha ꞌinkꞌez ha nudaih-un ꞌet whuduztsꞌai. 26ꞋInkꞌez ꞌilhoghun ye ꞌulhna-un ꞌanih yulhni ꞌinkꞌez yoodulhkut, ‘Dawhutni wheꞌ whutni?’ 27ꞋInkꞌez uyúlhni, ‘Nyulhutsin whusanája. Soo ꞌuntꞌoh ꞌinkꞌez dálhitꞌoh whe whusanája. ꞋEt huwa mbá musdoosyaz nilhkꞌa-i nasilhghi.’
28ꞋEt hoontsꞌi bulhutsin ꞌudetso-un hunilchꞌe. ꞋInkꞌez ꞌaw yoh tsꞌu nátoojaꞌ hukwa lheꞌnizun. ꞋEt oobá tenínya ꞌinkꞌez yughu tedudli. 29ꞋEt dubá uyúlhni, ‘Nilhꞌen lheꞌwhuldzoh mba ꞌustꞌen. ꞋInkꞌez ꞌaw nghuni ꞌilho hoontsꞌi kꞌulhúsyus. ꞋEt hoontsꞌi ꞌaw ꞌusbaiyaz hoontsꞌi sgha lhilhtel skꞌekene bubulh whúnosni ha. 30ꞋEt hoontsꞌi nyeꞌ, ndai oogha íninꞌai-i, ꞌi tsꞌekoo ꞌulꞌenne bukꞌuz tsꞌiyai yulhtsi ꞌinkꞌez musdoosyaz nilhkꞌa-i ooba nasílghi!’
31ꞋInkꞌez ꞌuyulhni, ‘Syeꞌ ꞌahoolhdzin sulh ꞌíntꞌoh. ꞋInkꞌez ndai la ꞌustꞌi-i, tsꞌiyawh nyun nchꞌeꞌ ꞌuntꞌoh. 32ꞋEt tsꞌihꞌun unꞌa ꞌuhoontꞌoh tsꞌonólhni ꞌinkꞌez tsꞌohótꞌeꞌ hubaꞌ hoontꞌoh. Nyulhutsin dazsai inleꞌ, ꞌen nakhitnaꞌ. Nintaltsꞌut inleꞌ, ꞌawet nasti.’”
Currently Selected:
Luke 15: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
