Luke 16
16
ꞋAw Yakꞌusda cha ꞌinkꞌez sooniya cha ba ꞌontꞌen ꞌaitꞌoh
1ꞋInkꞌez njan cha yugha hodulꞌehne, bubulhni, “ꞋIlhoghun dune hoonzooꞌ ꞌuntꞌoh-un, ꞌen yoh whumoodih ꞌutꞌi. ꞋEt ꞌuyoonne huyudaniꞌ, ‘Nyoh whumoodih ꞌintꞌi-i, ye únzoodilꞌi.’ 2ꞋInka ꞌanih yudaniꞌ ꞌinkꞌez ꞌuyulhni, ‘Daja hutni wheꞌ hutni njan nyulh udustsꞌo? Ntsꞌenꞌa syoh whumoodih inli-un tsꞌiyawh sba ꞌukꞌehóonges. Syoh whumoodih inli-un ꞌetsul ꞌinja ꞌet huwa!’
3ꞋEt nyoh whumoodih dichꞌoh naꞌdudutni, ‘Daoosneh cha há la? Smoodih ꞌawet seꞌ ꞌutꞌen sghu nahootalhchoot. ꞋAw yun hooskah ꞌaitꞌoh. ꞋInkꞌez datisó cha hukwayá usdli. 4Datísnelh-un howu nuni níszut. Seꞌ ꞌutꞌen ninta nusꞌai de, dunene duyoh la dasóholhtelh.’
5ꞋInka oomoodih ꞌilhone hinli whe butsꞌú whulhꞌaine, tsꞌiyawh ꞌanih budániꞌ. ꞋInkꞌez ꞌudechoo-un yoodulhkut, ‘Smoodih daltsuk ntsꞌu whulhꞌai?’
6ꞋEt uyúlhni, ‘Khe 100 bundéꞌoolhdzai-i.’ ꞋInkꞌez ꞌuyulhni, ‘Soo ꞌa natlꞌa dindaih ꞌinkꞌez bé ntsꞌu whuzꞌai-i 50 ꞌukꞌeꞌinges!’
7ꞋEt ꞌuyoon cha ꞌuyulhni, ‘Nyun doꞌ, daltsuk ntsꞌú whuzꞌai?’ ꞋInkꞌez uyúlhni, ‘Tlꞌo maiꞌ 100 bundéꞌoolhdzai-i.’ ꞋEt ꞌuyulhni, ‘Bé ntsꞌu whuzꞌai-i, 80 ꞌukꞌeꞌinges!’
8Ndun tsꞌihꞌun lheꞌitꞌoh-un yoh whumoodih, tube ꞌuyoo unli whe ꞌuja. ꞋInka ꞌuyulhni oomoodih, ‘ꞋUyoo inli whe ꞌinja!’” ꞋEt Jesus ꞌubulhni, “Ndiz unꞌa njan duhoontꞌoh, mbe la ooba ꞌalhaꞌ lheꞌhootꞌohne ꞌuyoo unline ꞌuntꞌoh ꞌinkꞌez mbene la Yakꞌusda ba be hootꞌen unline, ꞌenne buba nus ꞌuyoo hinli. 9ꞋInkꞌez nohdusni, ndi sooniya, ꞌi be kꞌeke nahultsih. ꞋInkꞌez datíhtsah de, ꞌet de si, ꞌilhiz ꞌuhoontꞌoh tsꞌe, whuz la danóhoholelh.
10Hoonli lhuhóloh-un, tsꞌihꞌun neꞌwhulhꞌen de, ndai hooncha-un ꞌet cha tsꞌihꞌun neꞌwhutilhꞌen. ꞋEt mbe la hoontsool-unyaz be tankꞌus ꞌuntꞌoh-un, hooncha-un cha whuz unꞌa za ꞌet ndutitꞌelh. 11ꞋEt huwa sooniya, be tsꞌihꞌun nulhéꞌzahtꞌen de, ntsꞌenꞌa suba be hoonzooꞌ hoontꞌoh-i, nohtlꞌa ookat? 12ꞋEt ꞌuyoonne chꞌeꞌ tsꞌihꞌun lheꞌáhlel de, mbe suba nohchꞌeꞌ unli-i nohtlꞌa yóoꞌalh?
13ꞋAw ꞌilhoghun ꞌustlé-un nane moodih ba ootꞌen ꞌaitꞌoh. ꞋEt ꞌilhoghun yutsꞌu dutitni ꞌinkꞌez ꞌilhoghun yukꞌetitsiꞌ. Kꞌus ꞌilhoghun yukꞌúneꞌtitꞌen ꞌinkꞌez ꞌilhoghun yuchꞌaz dútatni. ꞋAw Yakꞌusda kꞌuneꞌintꞌen ꞌinkꞌez sooniya cha kꞌuneꞌontꞌen ꞌaitꞌoh.”
Di la dune ba díztiꞌ-i, ꞌi Yakꞌusda yutsꞌu dutni whe ꞌuntꞌoh
14ꞋEt Phariseene sooniya buba diztiꞌne ꞌuhintꞌoh. Daja ni tsꞌiyawh hidantsꞌo, ꞌinkꞌez highudloh. 15ꞋInka ꞌubulhni, “Dune toh tsꞌihꞌun ꞌuntꞌohne naꞌdudulhꞌi, ꞌet hoontsꞌi Yakꞌusda nohdzi dantꞌoh la tꞌeooninzun. Di la dune ba díztiꞌ-i, ꞌi Yakꞌusda yutsꞌu dutni whe ꞌuntꞌoh.
16Moses be ꞌudustlꞌus cha ꞌinkꞌez nus hooꞌenne bubeꞌ ꞌudustlꞌus cha ndet whutsꞌun la John dune too be ꞌulhꞌen-un khuna daꞌ, ꞌet whutsꞌun dune hikꞌuneꞌ ootꞌen hubaꞌ hoontꞌoh. ꞋEt whutsꞌun whudutizut Yakꞌusda whe lerwe unli-un, ꞌet huwun khuni unzoo-i dune bulh yahulhduk. ꞋInkꞌez tsꞌiyanne whuz unꞌa húkwaꞌ hutꞌen. 17ꞋEt howa lhoohoolnaꞌ whe yatꞌah ꞌinkꞌez ndi yun cha hooloh whutaleh. ꞋEt hoontsꞌi ꞌon nus howa whulnaꞌ whe Moses be ꞌudustlꞌus kꞌut hoontsool-unyaz ꞌukꞌehóoguz-un, ꞌaw hooloh hóleꞌ ꞌaitꞌoh.
18ꞋEt mbe dune duꞌat ꞌetsul ꞌinla ꞌinkꞌez ꞌuyoon tsꞌeke ghu nasda de, dune lubeshi ꞌulhꞌen. ꞋInkꞌez mbe la tsꞌeke duki chꞌa nasja-un ꞌuyoon dune ghu nasda de, ndun dune cha lubeshi ꞌulhꞌen whe ꞌuntꞌoh.”
Lazarus ꞌinkꞌez dune hoonzoo ꞌuntꞌoh-un
19“ꞋEt ꞌilhoghun dune hoonzooꞌ ꞌuntꞌoh-un, ꞌen naih dulkꞌun-i diztiꞌ-i ꞌinkꞌez laiyin diztiꞌ-i cha, ꞌi ye dune unli. Dzin totsuk unzoo-i za duyulꞌalh. 20ꞋInkꞌez ꞌilhoghun dune telꞌen-un, Lazarus huyulhni, ooyustꞌe ndulcho whe ooka whulhjut. ꞋInkꞌez dune hoonzooꞌ ꞌuntꞌoh-un yudati ꞌet huyulhti. 21Hoonzooꞌ ꞌuntꞌoh-un oolutab kꞌut whenghukat-i, ꞌi uncha usꞌalh ninzun. Lhike highulgok ꞌinkꞌez hika kꞌet whúdlat.
22ꞋEt dune telꞌen-un dazsai. ꞋInkꞌez lizasne Abraham zih nehinilhti. ꞋInkꞌez hoonzooꞌ ꞌuntꞌoh-un cha dazsai. ꞋInkꞌez ꞌahuyalhti. 23ꞋInkꞌez yaidlane toh usda ꞌinkꞌez tube dzoh nuzut. ꞋEt ndo yútanꞌen whe nilhdzaꞌ ꞌet Lazarus, Abraham yuzih usda whe ꞌubutilhꞌen. 24ꞋEt ꞌultus-un yutsꞌu huyih ꞌinkꞌez ꞌuyulhni, ‘ꞋUbá, Abraham, sgha teꞌninzeh! Lazarus ꞌen stsꞌilhꞌalh! Dzoh tsulyaz dulasga be toot nudoolga ꞌinkꞌez ꞌi be stsoola kꞌut nawhunoolhtsul! Ndi kwun be dzoh nuszut!’ yulhni.
25ꞋEt hoontsꞌi Abraham ꞌuyulhni, ‘Syeꞌ yinka sinda daꞌ whunailnih eh? Tsꞌiyaitsuk unzoo-i nghánkat. ꞋEt hoontsꞌi Lazarus hoontsiꞌ-un za oogha whunkat. ꞋEt ꞌawet hoonzoo-un ooghá whultsꞌut, ꞌinkꞌez nyun ꞌandit dzoh ninzut. 26ꞋInkꞌez ꞌaw ꞌet za iloh, nyun ꞌinkꞌez wheni neulh eguz tube yádalhdzaꞌ wheꞌ hoontꞌoh. ꞋEt huwa njan whutsꞌun ꞌaw ntsꞌun hutooyaꞌ ꞌaitꞌoh kꞌus nyun nyooz de cha ꞌaw diz hutooyaꞌ ꞌaitꞌoh.’
27ꞋEt uyúlhni, ‘ꞋUbá Abraham ntsꞌu tedusdli, Lazarus ꞌubá ooyoh tsꞌe ꞌilhꞌalh. 28Kwulane sulhutsinke hooni. Khun tilah khuni bugha óoꞌalh. Doo ka si ndiz dune dzoh nudeh tsꞌe hutoodilh.’
29ꞋEt Abraham ꞌuyulhni, ‘Moses be ꞌudustlꞌus ꞌinkꞌez nus hooꞌenne bubeꞌ ꞌudustlꞌus cha hutꞌi. ꞋI huyoozólhtsꞌaiꞌ da.’
30ꞋInkꞌez ꞌuyulhni, ‘ꞋAwundooh ꞌubá Abraham. ꞋEt ꞌilhoghun yaidlane toh tsꞌe ha nája de ꞌinkꞌez butsꞌu tizya de, ꞌet huwa la dudeni nahondunooleh.’
31ꞋInkꞌez ꞌuyulhni, ‘Moses be ꞌudustlꞌus ꞌinkꞌez nus hooꞌenne bubeꞌ ꞌudustlꞌus cha, ꞌaw huyoozólhtsꞌai hukwa lheꞌhunizun de, ntsꞌenꞌa ꞌilhughun dazsai-un yaidlane tuz ha naja-un hoontsꞌi ꞌaw bubeni ꞌutsꞌun náꞌyooleh ꞌaitꞌoh.’”
Currently Selected:
Luke 16: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
