Acts 5
5
Ananias duꞌat Sapphira bulh dahútinelh la
1ꞋEt hoontsꞌi ꞌilhoghun dune, Ananias huyúlhni-un, ꞌinkꞌez ooꞌat Sapphira bulh yun huyutꞌí-i, ꞌi ye ꞌónket, 2ꞌinkꞌez la sooniya yuloh dichꞌoh duba yílhchoot. ꞋEt ooꞌat cha tꞌeoonínzun. ꞋInkꞌez yuloh ꞌi la whelꞌaꞌne butlꞌa yándzai, ꞌinkꞌez la, “Ndi sooniya ꞌi tsꞌiyawh ꞌuntꞌoh,” ubúlhni.
3ꞋEt Peter uyúlhni, “ꞋEt di ha Satan#5:3 ꞋEn netsudule ꞌuntꞌoh. ookꞌúneꞌ tantꞌen hukwaꞌ nizun? ꞋInkꞌez lheꞌdini sooniya ooloh ílhchoot ꞌinkꞌez Ndoni tsꞌun hontsꞌit? 4Ndi yun be ꞌóotahkulh whutso nohchꞌeꞌ unli ínleꞌ. Be ꞌóhket whe oozooneya ꞌi cha nohchꞌeꞌ ꞌuntꞌoh. ꞋInkꞌez di ha ndzi yo whe njan nintaꞌnintꞌen? Yakꞌusda tsꞌun hontsꞌit ꞌaw dune tsꞌun iloh!”
5Soo Ananias whudántsꞌo ibulh, nadílduz ꞌinkꞌez dazsai. Mbe la whulh údantsꞌone tube cho whe hunilhjoot. 6Chilke ꞌenne la dahánindil ꞌinkꞌez hizi higháꞌ ozduz, téhinilhti, ꞌinkꞌez ꞌaháyálhti.#5:6 Dune dahátsai te, ꞌaho ꞌabuhulhtih ínleꞌ, keyoh whunulwus ꞌet huwa.
7ꞋEt tat sadzi hukwꞌu hoonistꞌo atꞌen inleꞌ, ꞌet ooꞌat ꞌaw dáhooja tꞌéoonúszun whe danínya. 8ꞋEt Peter uyúlhni, “Sudíni ndi sooniya, nki netlꞌa yándzai-i be ꞌóhket-i oozooneya, tsꞌiyawh tilah ꞌuntꞌoh?” “A, tsꞌiyawh ꞌúntꞌoh,” yúlhni.
9ꞋEt Peter uyúlhni, “ꞋEt di ha nki bulh Ndoni ólhdzih hukwa ꞌahtꞌan? Ndunne chilke nki ꞌailhtíne dati nódilhya, nyun cha whuz unꞌa tenányotalhtelh!”
10ꞋEt ꞌaho ꞌen cha yubut náltsꞌut ꞌinkꞌez dazsai. Chilke dahánindil ꞌinkꞌez ꞌen cha dazsai hinilhꞌen. ꞋInka ꞌen cha téhinilhti ꞌinkꞌez ooki hizih ꞌahuyalhti. 11ꞋEt ooba ꞌalha ꞌuhoontꞌohne ꞌinkꞌez ꞌuyoonne dune tubulh tsꞌiyawh hodántsꞌo whe nujut cha ꞌi bukeꞌdiltsꞌut.
Whelꞌaꞌne huwa ꞌítꞌen tenéꞌ hutꞌen
12ꞋEt dune toh whelꞌaꞌne lhat-un huwa ꞌítꞌen tenéꞌ hutꞌen. Solomon oobuntsilh bet huwhútni-un, ꞌet la tsꞌiyanne ooba ꞌalha ꞌuhoontꞌohne whuz ꞌilhuhozdil. 13Tsꞌiyanne ꞌuntꞌohne ubuhuninzun, ꞌet hoontsꞌi ꞌaw ooba ꞌalha ꞌuhoontꞌohne ꞌuyoonne dune butahoodilh ꞌaítꞌoh, hubudílhtiꞌ ꞌet huwa whehíntsaz. 14Jesus Christ ooba ꞌalhaꞌ yintꞌohne ꞌon nus huldlai suliꞌ, dune cha ꞌinkꞌez tsꞌekoo cha. 15Whelꞌaꞌne huwa ꞌítꞌen tenéꞌ hutꞌen ꞌet huwa ti whuzih ndudáne hikꞌustez ꞌi bulh tébuhulih khun si Peter ꞌoh whuya uyalh de ootsin ꞌi hoontsꞌi bukꞌut lhúyoltsꞌit. 16Lhane whe dune Jerusalem whunat keyoh whutꞌenne, ꞌenne cha whusahúdilh. Ndudáne cha ꞌinkꞌez ntsiꞌ-i nudúdeh buyudúltsꞌine cha whusábuhule ꞌinkꞌez tsꞌiyawh soo náꞌbuhulhꞌen.
Whelꞌaꞌne dzoh nubuhulhdeh
17ꞋEt ꞌawet Lizwif lubret ꞌukꞌenus diztiꞌ-un, ꞌinkꞌez yutsꞌú ditnine Sadduceene hinli ꞌenne la whelꞌaꞌne tube bugheꞌ hoolni suliꞌ. 18ꞋInkꞌez whelꞌaꞌne ubuhílhchoot ꞌinkꞌez ꞌoh dune ꞌadinla-un, ꞌet la ꞌabuhanla. 19ꞋEt hoontsꞌi la ꞌet ꞌulhdzis neMoodihti oolizas ꞌahaꞌ dinla-un dáhaꞌ dantan, tenábuninla ꞌinkꞌez ubúlhni, 20“ꞋAhdulh ꞌinkꞌez Lizwif bulugliz whucho núdulhya ꞌinkꞌez ndi khuni ꞌandit be tsꞌúkhuna-i ghun bubulh yálhduk.”
21ꞋEt whelꞌaꞌne hikꞌoh tsꞌe ꞌuja. Soo yulhkai ꞌet Lizwif bulugliz whucho dahánindil ꞌinkꞌez ꞌawet dune whuba hodulhꞌeh. ꞋEt Lizwif lubret ꞌukꞌenus diztiꞌ-un ꞌinkꞌez yutsꞌú ditnine, ꞌenne Lizwif butso whúdilhdzulhne ꞌinkꞌez nahíyilhne cha bughú nahúzya yahatilhduk-un huwun. ꞋEt ꞌinkꞌez whelꞌaꞌne ꞌahudinla tsꞌe duduneꞌne bukuwhenábuhalhꞌaꞌ bubut nébotalelh ha.
22ꞋEt whuz hoozdil whe whelꞌaꞌne ꞌahudinla-un, ꞌet hoohooloh hotilhꞌen. ꞋEt nahíyilhne butsꞌu náhoosdil ꞌinkꞌez bubodániꞌ, 23“Dune ꞌahudinla tsꞌe tsꞌoozdil whe ꞌawet dáꞌ dinla tsꞌe dóohoontꞌoh. ꞋInkꞌez huwunlíne cha ꞌawet huwu hinli ꞌet dáhaꞌ uzdanꞌai whe ꞌaw nyoonne whelꞌaꞌne huhooloh!” 24Lugliz whucho huwunlíne bumoodih, Lizwif lubret ꞌukꞌenus diztiꞌne, ꞌinkꞌez Lizwif bulubret moodih tubulh whulh ꞌúhudantsꞌo whe ꞌet huwu yahulhduk, “Whelꞌaꞌne dahúja suba ꞌuhintꞌoh?” hutni.
25ꞋEt ꞌilhoghun dune danínya ꞌinkꞌez ubúlhni, “Whunulhꞌen ndunne dune ꞌabihláne nghut lugliz whucho tsꞌe dune huhodulhꞌeh!” 26Lugliz whucho huwunlíne bumoodih, duduneꞌne tubulh whuz whe handilh, ꞌet ndunne ꞌilhozdílne bubé hunuljut doo ka la tse be bubuhooghan, ꞌet huwa whelꞌaꞌne nánilhtsulyaz nabuhílhchoot.
27ꞋEt whelꞌaꞌne dunáboninla ꞌinkꞌez nahíyilhne bubut néboninla ꞌinkꞌez lubret ꞌukꞌenus díztiꞌ-un, ꞌet uboodulhkut, 28“Soo khuni ulhtus-i be nohba natsꞌúhizya ínleꞌ ndun Jesus ghun dune hubodulhꞌeh íloh nohtsꞌútni inleꞌ. ꞋAndit whunulhꞌen lheꞌahja, Jerusalem ndulcho whe ꞌawet hubodilhꞌeꞌ. ꞋEt ndun dune dazsai ꞌet wheni nekꞌéwhuhꞌai!” hutni.
29ꞋEt hoontsꞌ Peter ꞌinkꞌez ꞌuyoonne whelꞌaꞌne bulh whuz yahatilhduk, “Yakꞌusda za ookꞌu néꞌtsꞌootꞌen hubaꞌ hoontꞌoh, ꞌaw dune ookꞌu néꞌtsꞌootꞌen huba lheꞌhóotꞌoh,” hutni. 30“ꞋEt Jesus tulalhgus undunulhtꞌo whe súlhghi ꞌet hoontsꞌi netsodaꞌne buYakꞌusda ꞌen nahuyílhnaꞌ. 31ꞋEt Yakꞌusda yakꞌuz whenáyalhti dunailhni tsꞌe duzih ꞌet yulhda, ꞌinkꞌez Moodihti ꞌinkꞌez neulhyís-un cha yulhtsi. ꞋEt Israel ootsꞌu haindene dudeni náhondunooleh, ꞌet de la bulubeshi buba ꞌún yutoolhdilh. 32ꞋEt wheni Yakꞌusda neꞌustꞌen-un honꞌenne tsinli ꞌinkꞌez huwu yatsꞌulhduk. ꞋInkꞌez Ndoni, ꞌen Yakꞌusda kꞌuneꞌ ꞌutꞌenne bugha íninꞌai-un, ꞌen cha nela ꞌutꞌen,” ꞌet hubúlhni.
33ꞋEt nahíyilhne njan huwhudántsꞌo whe, tube cho ꞌon nus hukwa hohunílchꞌe kꞌet whelꞌaꞌne ubotuzilhghelh hukwaꞌ huninzun, ꞌet howu yahalhduk. 34ꞋEt hoontsꞌi ꞌilhoghun dune, Gamaliel huyúlhni-un, ꞌen Pharisee unli tsꞌiyanne hidilhtiꞌ, ꞌen butoh dudinya ꞌinkꞌez ubúlhni, “ꞋAtsulyaz ꞌaz úbilhlelh.” 35ꞋEt ꞌinkꞌez nahíyilhne ndúbulhni, “Israel whudunéꞌne huwa óohli whe ndunne dune néꞌbulhꞌen. 36Dzoh saꞌ inleꞌ ꞌilhoghun dune Theudas huyúlhni-un, ꞌen la ninya ‘Dune ncha-un usdli,’ ni whe bubulh yálhduk. ꞋEt 400ne atꞌen ꞌenne hitsꞌú nedindil, ꞌet hoontsꞌi hizilhghi, ꞌinkꞌez yutsꞌú nedindil inleꞌne tsꞌiyawh ꞌantsꞌi yanahadil. ꞋEt nduhúja whe gak huzdliꞌ. 37ꞋEt hukwꞌelhꞌaz ꞌuyoon dune cha nduja, Judas Galilee whutꞌen-un huyúlhni, ꞌet dune naoolto whe ꞌet ninya. ꞋEt cha lhane dune hitsꞌú nedindil. ꞋEn cha hizilhghi ꞌinkꞌez yutsꞌú nedindil ínleꞌne, ꞌenne cha tsꞌiyawh yanahadil. 38ꞋEt ndúhooja inleꞌ ꞌet huwa nohdúsni, ndunne dune hoonli uboohleh junih, butsꞌú ha lhozahꞌai! ꞋEt dichꞌoh duba ꞌuhutꞌen ꞌinkꞌez whunohodulhꞌeh de, ꞌaho gak naóotadleh. 39ꞋEt hoontsꞌi Yakꞌusda ndi ꞌutꞌen kꞌoh tsꞌe bugha ininꞌai de, ꞌaw buchꞌaꞌ oolhdeh ꞌaítꞌoh, doo ka si Yakꞌusda chꞌa neꞌahtꞌen oohleꞌ.”
40ꞋEt nahíyilhne buba ꞌalhaꞌ dija. Whelꞌaꞌne danáboninla ꞌinkꞌez “Bubuholhtsas,” ꞌubuhútni. ꞋInkꞌez “Jesus booziꞌ gha dune huhodoolhꞌeh junih!” ꞌubuhútni, ꞌinkꞌez la bula nahuditni.
41ꞋEt whelꞌaꞌne nahiyílhne bughu tenáhundil. Yakꞌusda Jesus Christ ba dzoh nuhudeh ꞌet huba sooꞌ huldzooꞌ didutchꞌoh ꞌet ndunaꞌhundunudzun, ꞌinkꞌez howu nílhni. 42ꞋEt dzin totsuk Lizwif lugliz whucho ꞌinkꞌez dune buyoh te ꞌawhuz Jesus Yakꞌusda OoChrist, ꞌen ghun dune huhodulhꞌeh ꞌinkꞌez khuni unzoo-i be dune bubulh yáhulhduk, ꞌaw ꞌetsul lheꞌhudínel.
Currently Selected:
Acts 5: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.