Acts 6
6
Lhtakꞌantꞌi dunene whelꞌaꞌne laꞌ ꞌutꞌenne
1ꞋEt ꞌoh daꞌ yugha hodulꞌehne ꞌon nus huldlai suliꞌ. Yugha hodulꞌehne Lizwif nawh la hudidowh, Greek bughuni kꞌuyalhdukne ꞌinkꞌez Lizwif dichꞌoh dughuni kꞌuyalhdukne, ꞌenne la lhdulhyoh nehúwhuntꞌai. Greek kꞌuyalhdukne hutni, “Netsandilhne ꞌaw bugha lhéꞌhusꞌai dzin totsuk sooniya dune huye laꞌ ꞌutꞌen-i whutahudzih te.” 2ꞋEt whunizyane ꞌon ꞌat nane whelꞌaꞌne Jesus Christ yugha hodulꞌehne, tsꞌiyawh ꞌilhubuhozdla ꞌinkꞌez ꞌuhutni, “ꞋAw lheꞌhóozooꞌ Yakꞌusda ooghuni be yatsꞌulhduk whulazdutitni ꞌinkꞌez sooniya dune be laꞌ whutꞌen ꞌutsꞌoolhꞌen ꞌaítꞌoh. 3ꞋEt huwa sulhutsinke lhtakꞌantꞌine dune nohtoh mbene la tꞌebunáhzun Ndoni buyudínda ꞌinkꞌez huwhunih cha ꞌuhintꞌohne ꞌutahábuhle ꞌenne ndi ꞌutꞌen ꞌuhuyoolhꞌen wheni ꞌenne huwu hinli butsꞌoolhtselh. 4ꞋEt wheni tenazdudli ꞌinkꞌez Yakꞌusda ooghuni be yátsꞌulhduk-un, ꞌet za ꞌutsꞌotilhꞌelh,” ꞌubuhútni.
5ꞋEt ꞌilhozdílne tsꞌiyawh whelꞌaꞌne buba sooꞌ hudija ꞌinka Stephen ꞌen ꞌutahahúyalhti soo cho be ꞌalha ꞌuhoontꞌoh ꞌutꞌi-un ꞌúntꞌoh ꞌinkꞌez Ndoni ooyudínda. ꞋEt Philip, Prochorus, Nicanor, Timon, Parmenas cha, ꞌinkꞌez Nicolaus, ꞌen la ꞌudun yun kꞌut whutꞌen-un, Antioch whutꞌen-un ꞌuntꞌoh ꞌen la Lizwif tsꞌú nenadinja inleꞌ, ꞌenne ꞌutahábahanla. 6ꞋEnne whelꞌaꞌne but néboninla whe whelꞌaꞌne buba tenahudidli ꞌinkꞌez bukꞌodálni.#6:6 ꞋEt whuz unꞌa tsꞌiyanne tꞌehininzun bubulh ꞌilhoghi hinli.
7ꞋInkꞌez Yakꞌusda ooghuni ndulcho tꞌenidzin. Yugha hodulꞌehne, Jerusalem whutꞌenne cha ꞌon nus huldlai huzdliꞌ. Lhane Lizwifne bulubret ꞌenne cha Yakꞌusda ooghuni huyílhchoot.
Stephen huyílchoot
8ꞋEt Stephen be ꞌalha ꞌuhoontꞌoh ꞌutꞌi ꞌinkꞌez Ndoni ye óolhtus ha yugha íninꞌai ꞌi gha dune toh hooncha huwa ꞌítꞌen túneꞌ ꞌustꞌen. 9ꞋEt hoontsꞌi whulohne dune hichꞌaz nédindil Lizwifne Cyrenia ꞌinkꞌez Alexandria tsꞌu haíndilne, ꞌenne ꞌuhintꞌoh. ꞋEnne, ꞌet ꞌulhna unlíne oola naditníne ꞌilhoghun lugliz ꞌet whehúhoozi ꞌet ꞌilhuhozdil. ꞋUyoonne Cilicia ꞌinkꞌez Asia tsꞌu haíndilne, ꞌenne cha Stephen hidulhyoh ꞌutni. 10ꞋEt hoontsꞌi Stephen Ndoni gha whunih kꞌet yalhduk te ꞌaw hichꞌa oolhdeh ꞌaítꞌoh.
11ꞋInka ꞌantsꞌi ꞌoh dunene, ꞌenne buba ꞌukꞌelha whuhalhtsi Stephen Moses ooghuni ꞌukꞌu nusguz-i ꞌinkꞌez Yakꞌusda chꞌaz yalhduk hudooniꞌ ha.
12ꞋEt nduhútni whe, butso whúdilhdzulhne, Moses be ꞌudustlꞌus ꞌukꞌu nunáguzne cha, ꞌinkꞌez ꞌonghohne cha buba hodinꞌai, ꞌenne tsꞌiyawh Stephen huyulh húnilchꞌe. Highu nindil, huyílhchoot, ꞌinkꞌez nahíyilhne but néhinilhti. 13ꞋEt whulohne dune hiba hootsꞌit ha whusábahanla ꞌinkꞌez nahíyilhne njan dubuhútni, “Ndun dune nelugliz whucho whudiztiꞌ ꞌinkꞌez Moses huwa néulhꞌa-un ꞌahoolhyiz whuchꞌaz yálhduk. 14Njan ndutni whe uzditsꞌo. ‘Ndun Jesus Nazareth whutꞌen-un nelugliz whucho nawhúduntiyus ꞌinkꞌez Moses khuni netlꞌa ídanꞌai-i cha tsꞌiyawh ꞌutsꞌun unꞌa za naꞌwhutilelh,’ ꞌet ndutni whe uzditsꞌo.”
15Mbene la nahíyilhne tsꞌiyawh Stephen ꞌen za hínilhꞌen oonin unzoo kꞌet ꞌantsꞌi lizas nin ꞌet nduntꞌoh.
Currently Selected:
Acts 6: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.