1 Thessalonians 5
5
NeMoodihti oodzin dawhútanelh-un
1Neulhutsinke nkede ꞌuwhutanelh ꞌinkꞌez ntsꞌoya hoozulh wheꞌ whutanelh, ꞌaw ꞌet huwun nohtsꞌo kꞌeꞌoosges ꞌaitꞌoh. 2Nohnichꞌoh soo tsꞌihꞌun unꞌa tꞌeoonahzun ꞌundunutꞌih-un kꞌunꞌa ꞌulhdzis whusanúlꞌih, whuz unꞌa neMoodihti oodzin neba whusaootiltsꞌulh. 3Dalhúhootꞌoh ꞌinkꞌez ꞌaw howa lheꞌoodli, hutni te, ꞌet khuntsul bubulh ha oodultsꞌuk. Tsꞌekoo ulchane bubulh ꞌútultsꞌulh, ꞌet whuz unꞌa ꞌet nduwhutanelh. ꞋEt de ndutnine, ꞌenne ꞌaw buyit ꞌuhóneh ꞌaitꞌoh.
4ꞋEt hoontsꞌi nohni sulhutsinke ꞌaw tsalhgus yo lhdúlhtsꞌi. ꞋEt huwa njan dzin whusahooltsꞌut de, ꞌaw ꞌundunutꞌihne kꞌunꞌa nohgha óonolꞌih ꞌaitꞌoh. 5Nohni be hootꞌen-i ꞌinkꞌez dzenis be hootꞌen-i, ꞌi niz dulhtsꞌi. ꞋAw wheni ꞌulhdzis ꞌinkꞌez tsalhgus yo lhtsꞌu díltsꞌih. 6ꞋEt huwa ꞌuyoonne kꞌunꞌa lhtsꞌoostez, whenichꞌoh khutsꞌoodleꞌ. 7ꞋEt huwa mbene la stezne, ꞌenne ꞌulhdzis hootꞌez. ꞋInkꞌez ndunne tatnaine, ꞌenne ꞌulhdzis tahunutnih. 8ꞋEt hoontsꞌi wheni dilhtsꞌine, soo whunih be ꞌutsꞌootꞌeꞌ hubaꞌ hoontꞌoh. Neba ꞌalhaꞌ ꞌuntꞌoh-i, ꞌinkꞌez be lhkꞌetsꞌusiꞌ-i, ꞌi lhuztih dzoot kꞌunꞌa nohba leꞌ titꞌelh. ꞋInkꞌez be uzdujih-i, ooka tse tsꞌuhooli-i, ꞌi tsꞌoh dutsꞌun-i kꞌunꞌa nézdolꞌaꞌ. 9ꞋAw Yakꞌusda ye huske-i, ba iloh ꞌuneinla, ꞌet huba iloh ꞌudun neneninla ꞌet huwa. ꞋEt kꞌus neMoodihti Jesus Christ ꞌen gha be úzdutijih-i, ꞌi tsꞌitálhchulh. 10Neba dazsai. ꞋEt huwa ntsꞌoh dahooja hoontsꞌi, ꞌawhuz tsꞌukhuna kꞌus yatsꞌadla, wheni tsꞌiyawh ꞌen bulh ꞌutsꞌootꞌeꞌ hubaꞌ hoontꞌoh. 11ꞋInka ꞌilhone ꞌahli whe kꞌúnulhunahtꞌah ꞌinkꞌez lhba nus lhúnulhtꞌi. ꞋAndit dahtꞌen la whuz unꞌa za ꞌet ndahtꞌen.
Lhelhtsꞌun unꞌa ndi yun kꞌut ꞌuzdóltsꞌiꞌ
12Neulhutsinke wheni soo cho nohtsꞌu tezdudli, mbene la nohtoh Jesus Christ ba ꞌutꞌenne, ꞌenne neMoodihti gha nohghu hinli ꞌinkꞌez nohba huwhunih nunatsꞌuhulyeꞌ, ꞌenne ꞌuntꞌohne nohba hooleꞌ. 13ꞋEt bube ꞌutꞌen gha nchane ubulhꞌih. Be nekꞌesiꞌ-i, ꞌi gha ndahtꞌen. Tsꞌiyawh nanilhtsulyaz lhtoh dune ꞌahli. 14ꞋInkꞌez neulhutsinke khuni ulhtus-i be njan dunohtsꞌutni, ndunne nohtoh tsedutnine soo cho bugha dahtni. Mbene la oodzi yo ꞌuntꞌohne, soo nenabunihꞌah. Yakꞌusda ba tetsunne cha bula ꞌahtꞌen. Tsꞌiyanne nánilhtsulyaz néꞌboolhꞌen. 15Mbe la hoontsiꞌ nohtsꞌun ꞌuja-un, khun te hoontsiꞌ-i be buba ꞌukꞌelha hoolhtselh junih! ꞋEt kꞌus nohnichꞌoh cha ꞌinkꞌez ꞌuyoonne ba cha, ndai unzoo-i tsꞌunóohtꞌi, ꞌi za lhunihdulh.
16ꞋAhoolhyiz whunulhni. 17Tenadahdli-un, ꞌetsul ꞌudóhnih junih. 18Tsꞌiyantsuk whe musi dahni. Jesus Christ ꞌen gha ꞌet whuz unꞌa Yakꞌusda nohtsꞌu hukwaꞌ ninzun ꞌet huwa.
19Ndoni whunóhnulhtun-un khun te dah noohzin junih. 20Khuni be nohba nus be hootꞌen-i, khun te ꞌantsꞌi ꞌuhoontꞌoh noohzin junih. 21Tsꞌiyantsuk naoodúlhdzih. Ndai la unzoo-i dutsꞌo cho oohtun. 22Ntsiꞌ-i tsꞌiyawh oochꞌoh ꞌahtꞌoh.
Yakꞌusda ye unzoo-i nohbulh óotꞌeꞌ
23ꞋEt ꞌawet Yakꞌusda, be nedzi dizghel-i negha ninꞌai-un, ꞌen nohni dichꞌoh duba ꞌudun nenóholelh-un. ꞋInkꞌez nohyustꞌe, nohzul, nohyughi, ꞌalhgoh ꞌaw hoonli whe nohkꞌé holtsꞌit-un hooloh whe neMoodihti Jesus Christ whusanatidalh whutsꞌun, ꞌet whuz unꞌa Yakꞌusda nohbaꞌ hooleh nohba hukwaꞌ nuszun. 24Mbe la dutijih ha nohka daniꞌ-un, ꞌen ꞌaw nela dootnih ꞌaitꞌoh, ꞌen nohbaꞌ whutilelh.
25Neulhutsinke neba tenadahdli. 26ꞋEt lhulhutsinke nalhutulhꞌih te soo cho dushih beꞌ lhoolhtun whe lubeshi ooghu hooloh-i be nalhudahtsꞌoos.#5:26 Whuz keyoh ꞌet whuz unꞌa lhlá nuhútꞌa. 27NeMoodihti nalh ꞌunohdusni, neulhutsinke ꞌenne Yakꞌusda oochꞌeꞌ unline, ꞌenne tsꞌiyawh ndi ꞌudustlꞌus buba ookꞌu yaoolhduk.
28NeMoodihti Jesus Christ, ꞌen ye unzoo-i, ꞌi nohbulh óotꞌeꞌ. ꞋEt ndo honeh.
Currently Selected:
1 Thessalonians 5: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
