2 Thessalonians 1
1
Thessalonica whutꞌenne Paul hadih ꞌubulhni
1Wheni tane tsinli Paul, Sylvanus, Timothy, nohni keyoh Thessalonica tsꞌe Yakꞌusda neBá ꞌinkꞌez Jesus Christ neMoodihti ba ꞌilhunaoodulhne, hadih nohtsꞌutni.
2Ye unzoo-i ꞌinkꞌez nohdzi dóghel, ꞌet Yakꞌusda neBá ꞌinkꞌez neMoodihti Jesus Christ ootsꞌu ha yúkat-i, ꞌi nohbulh óotꞌeꞌ.
Yakꞌusda ꞌudekꞌez neba nahutiyeh ꞌinkꞌez yé diztiꞌ-i
3Ooba ꞌalha ꞌuhoontꞌoh-i, ꞌi lhkꞌuz te ahtꞌi ꞌinkꞌez ꞌilhoghun ꞌahli lhanꞌun te lhkꞌehsiꞌ. ꞋEt huwa neulhutsinke ꞌahoolhyiz Yakꞌusda tsꞌun nohba musi uzdóniꞌ hubaꞌ hoontꞌoh. 4ꞋEt huwa ꞌonghohne Yakꞌusda ba ꞌilhunaoodulhne, ꞌet huwun ꞌukꞌenus nohba tsꞌuhóontꞌiꞌ nohni nohghun. Dune dzoh nunohulhdeh ꞌinkꞌez howa whulnaꞌ-un nohghá whunkat-un, ꞌet hoontsꞌi ooba ꞌalha ꞌuhoontꞌoh-i, ꞌi be ndai la be nohba whutsꞌulhdáhni whe whulh nudulhya.
5ꞋInka tsꞌiyanne tꞌehininzun Yakꞌusda tsꞌihꞌun nahiyilh-un ꞌuntꞌoh. ꞋEt huwa ndet Yakꞌusda lerwe unli, ꞌet soo ꞌúlhdzooꞌ ooleꞌ ookꞌélhꞌotihꞌalh. ꞋEt huba ꞌandit dzoh nahdeh. 6Mbene la dzoh nunóhulhdehne, ꞌenne Yakꞌusda bukꞌelha whutilhtselh. Yakꞌusda tsꞌihꞌun unꞌa neꞌutꞌen-un ꞌuntꞌoh ꞌet huwa. 7ꞋInkꞌez nohni dzoh nudehne nebulh nátilhyis. Whuz unꞌa neba ꞌukꞌelha whutilhtselh. Ndet la neMoodihti Jesus Christ ꞌinkꞌez oolizas cho bulh, ꞌet yakꞌuz tsꞌe bube hóodutaltsilh. 8ꞋEt ꞌoh de ndunne Yakꞌusda tꞌenuszunne ꞌinkꞌez neMoodihti Jesus Christ ooghuni unzoo-i kꞌúnulheꞌustꞌenne, ꞌenne kwun tluk be buba ꞌukꞌelha whutaleh. ꞋEt whuz unꞌa ꞌenne butsꞌun kꞌutitnelh. 9NeMoodihti ꞌinkꞌez ꞌukꞌenus ye diztiꞌ-i, ꞌi ꞌilhiz wheni yuchꞌa nabutálelh. ꞋEt ꞌilhiz wheni hiye dzoh nutideh ꞌinkꞌez ꞌaw buba oolatoh nalhuhóoꞌoh. ꞋEt whuz buba ꞌukꞌelha whutilhtselh. 10ꞋEt dzin whusanája de, ꞌet nduwhutanelh. ꞋEt dzin, Yakꞌusda oochꞌeꞌ unline, ꞌenne tsꞌiyawh buba whudutálhtiꞌ. ꞋInkꞌez ndunne buba ꞌalha ꞌuhoontꞌohne, ꞌenne buba hooncha tileh. Wheni neghuni gha nohba ꞌalha ꞌuhoontꞌohne, nohni cha bubulh ꞌútihtꞌelh.
11ꞋEt huwa ꞌalhoolhyiz Yakꞌusda tsꞌun nohba tenazdudli. Yakꞌusda dutihjih ha nohkaꞌ daniꞌ, ꞌet whe soo ꞌúlhzooꞌ nohulhtsi. Tsꞌiyaitsuk unzoo-i ooghunli, ꞌinkꞌez ꞌutꞌen ꞌulhꞌen-i, be ꞌalha ꞌuhoontꞌoh-i be ꞌulhꞌíh-i, ꞌi tsꞌiyawh ye úlhtus-i bulh ꞌúntꞌoh, ꞌet tsꞌiyawh lhaóodutihleh. 12ꞋEt whuz unꞌa neMoodihti Jesus Christ booziꞌ, nohni nohgha dutátiꞌ. ꞋInkꞌez nohni cha ꞌen gha ꞌahcha tileh. Yakꞌusda ꞌinkꞌez Jesus Christ ye unzoo-i, ꞌi gha nduwhutanelh.
Currently Selected:
2 Thessalonians 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.