1 Corinthians 15

Christ dunadija-un ꞌalha ꞌuhoontꞌoh

1ꞋEt ꞌawet sulhutsinke ndi khuni unzoo-i be nohbulh yásduk. Soo cho tꞌentihzeh hukwaꞌ nuszun. ꞋUdaꞌ úlhchoot ꞌinkꞌez ꞌet huwa ꞌi be yun kꞌut dúlhtsꞌi. 2ꞋInkꞌez ndi khuni be nohbulh yásduk-i, ꞌi soo cho oohtun de, ꞌet ꞌi be dahjih. ꞋEt hoontsꞌi nohba ꞌalhaꞌ lheꞌhootꞌoh de, ꞌaw ookꞌedóohjih ꞌaítꞌoh.

3ꞋEt ꞌudechoo daꞌ nohni nohtlꞌa hoosꞌai ndet la stlꞌa hóoltsꞌut-un, ntsꞌenꞌa la Christ nelubeshi kꞌelha dazsai. ꞋEt whuz unꞌa Yakꞌusda ooghuni ꞌet ndutni. 4ꞋInkꞌez ꞌahuyalhti. ꞋEt whulh tat dzin dunadija. ꞋEt whuz unꞌa Yakꞌusda ooghuni ꞌet ndutni. 5ꞋInkꞌez Cephas yunalhtsꞌet hainya, ꞌet hukwꞌelhꞌaz whunizyai ꞌon ꞌat nane, ꞌenne bunalhtsꞌet hainya. 6ꞋEt hukwꞌelhꞌaz 500ne neyulhutsinke ꞌet tsꞌiyawh ꞌalhgoh bunalhtsꞌet hainya. ꞋEt kꞌus lhane ꞌawhuz hukhuna, ꞌet ꞌonghohne nahunistez. 7ꞋEt James ꞌen cha yunalhtsꞌet hainya, ꞌinkꞌez whélꞌaꞌne, ꞌenne tsꞌiyawh bunalhtsꞌet hainya. 8ꞋInkꞌez ꞌudekꞌez, si cha, ꞌaw ꞌoh whuya whudizulh whe whúzusdli iloh, ꞌet hoontsꞌi snalhtsꞌet hainya.

9Whelꞌaꞌne butoh si ꞌukꞌenus bukꞌeꞌi ꞌustꞌoh naꞌdunúsdzun. ꞋEt Yakꞌusda ba ꞌilhunaoodulhne, ꞌenne dzoh nubusdeh inleꞌ, ꞌet huwa ꞌaw whélꞌaꞌ-un sodutánelh-un ꞌet huba soo lheꞌuzdzooꞌ. 10ꞋEt hoontsꞌi Yakꞌusda ye unzoo-i, ꞌi gha ntsꞌenꞌa dastꞌoh, ꞌet whuz unꞌa za ꞌustꞌoh. ꞋInkꞌez Yakꞌusda whe stsꞌun únzoo-i, ꞌaw ꞌantsꞌi lheꞌhóotꞌoh. ꞋEt whelꞌaꞌne butoh buba nus ꞌultus-i be ꞌistꞌen. ꞋAw si iloh, Yakꞌusda ye unzoo-i sulh ꞌúntꞌoh, ꞌi be ꞌústꞌen. 11ꞋEt huwa si sgha kꞌus ꞌonghohne bugha, Yakꞌusda ooghuni be nohbulh yátsꞌulhduk, ꞌet whuz unꞌa za neghuni nohba ꞌalhaꞌ ꞌuntꞌoh.

Tꞌetsꞌoninzun Christ yaidlane toh dunadija

12Tꞌeóonúhzun Christ yaidlane toh danadija. ꞋEt wheni nelatoh tsꞌe whudáhtsꞌo. ꞋInkꞌez di ha whulohne nohni yaidlane ꞌaw dunadudódilh ꞌaítꞌoh dahni? 13Yaidlane ꞌaw dunahudódilh ꞌaítꞌoh de, ꞌet de Christ ꞌaw dunalhdídal. 14ꞋInkꞌez Christ ꞌaw nalhehítnal de, ꞌet de ꞌen ghun neghuni ꞌaw hoonli lhiloh whé ꞌuntꞌoh, ꞌinkꞌez be nohba ꞌalhaꞌ ꞌuwhutátꞌelh, ꞌi cha ꞌantsꞌet ꞌuwhutátꞌelh. 15ꞋEt yaidlane dunalhodídulh de, Christ ꞌen cha ꞌaw dunalhdídal. ꞋInkꞌez wheni cha Yakꞌusda ghun whutsꞌit be yaztilhduk wheꞌ hoontꞌoh. ꞋEt tsꞌiyanne toh be hóodiltsai, wheni ꞌutsꞌutni Yakꞌusda ꞌen gha Christ nahítnah whe dunadija ꞌet huwa. 16ꞋEt yaidlane dunalhodídulh de, Christ ꞌen cha ꞌaw dunalhdídal wheꞌ hoontꞌoh. 17ꞋInkꞌez Christ ꞌaw dunalhdídal de, ꞌet de be nohba ꞌalha ꞌuhoontꞌoh-i ꞌaw hoonliyaz lhiloh whé ꞌuntꞌoh ꞌinkꞌez ꞌawhuz nohlubeshi bulh ꞌáhtꞌoh. 18ꞋInkꞌez mbene la Christ oochꞌeꞌne hinli whe yaidlane, ꞌenne tsꞌiyawh ꞌilhiz wheni nintaꞌninkatne hinli. 19ꞋEt Christ tsꞌun ooka tse tsꞌúhooli ndi yun kꞌut uzdilhtsꞌi-un huba za ꞌuntꞌoh de, ꞌet de tsꞌiyanne toh wheni ꞌukꞌenus telꞌenne tsinli.

Datsꞌutsah-i, ꞌi ꞌudekꞌez ꞌuchꞌaz ditni-i unli, ꞌi musai tileh

20ꞋEt hoontsꞌi ꞌalhaꞌ yaidlane toh Christ ꞌen dunadija. ꞋIlhiz nanistezne toh ꞌen ꞌudechoo dunadija-un whuzdliꞌ. 21Dune, ꞌen gha dune yahadlah ꞌinkꞌez dune, ꞌen gha nahahítnaih ꞌet huwa. 22ꞋEt Adam ꞌen gha tsꞌiyanne yatsꞌadlah, ꞌet whuz unꞌa Christ, ꞌen za dunabudile ꞌinkꞌez nahuhítnaih. 23ꞋEt hoontsꞌi ꞌilhoghun hinli whe ntsꞌoya buba hoozulh whe bugha óoninꞌai, ꞌet whuz unꞌa ꞌuhutitꞌelh. Christ ꞌen ꞌudechoo-un suliꞌ. ꞋEt hukwꞌelhꞌaz mbene la Christ oochꞌeꞌne hinli whe buba whusanátidalh, ꞌet de ꞌenne cha dunahudutádulh ꞌinkꞌez nahuhitátnaih. 24ꞋEt whula toh suliꞌ de, nduwhi tsꞌiyawh ꞌudaꞌ ꞌuhooja tileh. ꞋEt ꞌoh de de oolatoh whutáleh de, tsꞌiyanne moodihtine, ndi yun kꞌut be tsꞌilhtus cha, ndet la ndi yun kꞌut ꞌinkꞌez yat cha, ꞌi tsꞌiyawh ꞌalhgoh musai yutilhtselh. ꞋEt hukwꞌelhꞌaz ndai Jesus Christ dichꞌoh za yugha lerwe unli-un, ꞌi tsꞌiyawh Yakꞌusda tlꞌa ítilelh. ꞋEt whuz unꞌa ꞌudekꞌez dzin whutáleh wheꞌ hoontꞌoh. 25ꞋEt ndet whutsꞌun la duYeꞌ yuchꞌa neꞌutꞌenne, ꞌenne duBá duketlꞌah nébutalelh ꞌinkꞌez bukꞌedútatꞌus de, ꞌet whutsꞌun ꞌinkꞌez tsꞌiyaitsuk ando ꞌuntꞌoh. ꞋEt whe lerwe tileh hubaꞌ ꞌuntꞌoh. 26ꞋInkꞌez be datsꞌutsah-i, ꞌi ꞌudekꞌez ꞌuchꞌaz ditni-i unli, ꞌi musai tileh. 27ꞋEt huwa njan ndutni, “Tsꞌiyaitsuk dudanyo ꞌuntꞌoh yulhtsi.” ꞋEt hoontsꞌi ꞌoh daꞌ ꞌukꞌeyánguz whe ndutni, “Tsꞌiyaitsuk dudanyo ꞌuntꞌoh yulhtsi,” ꞌet hoontsꞌi ꞌaw Yakꞌusda duYeꞌ Jesus Christ anyo neꞌdudoltelh ꞌaitꞌoh ni whe ꞌutni. 28ꞋEt ꞌoh de de, nkede tsꞌiyaitsuk dudanyo ꞌuntꞌoh yutilhtselh de, ꞌet de si ooYeꞌ ꞌen cha duBá yanyo ꞌuntꞌoh ꞌudutiltselh. ꞋEn ꞌuntꞌoh tsꞌiyaitsuk dudanyo ꞌuntꞌoh yulhtsi-un. ꞋEt whe Yakꞌusda dichꞌoh tsꞌiyaitsuk ando tileh.

Whulohne Jesus Christ dunadija-un ꞌawhuz buba ꞌalhaꞌ lheꞌhootꞌoh

29ꞋEt yaidlane dunalhodídulh de, ꞌinkꞌez ndunne yaidlane ꞌuyoonne, ꞌenne buba too beꞌ buhulhꞌen, ꞌinkꞌez ꞌet de dahútinelh? ꞋEt di ha ndunne yaidlane ꞌuyoonne, ꞌenne buba too beꞌ buhulhꞌen? Gak ꞌantsꞌet ꞌuhutꞌen. 30ꞋInkꞌez di ha wheni cha dzin totsuk neba huwa oodli whe yinka tsꞌudilhtsꞌi? 31ꞋInkꞌez hootáhtꞌeꞌ-un si cha ꞌet whuz unꞌa Christ neMoodihti, Jesus, ꞌen gha hootástꞌeꞌ. ꞋInkꞌez nohdusni, ndi khuni be yasduk, ꞌi gha dzin totsuk dásaih. 32ꞋEt keyoh Ephesus tsꞌe dune kꞌunꞌa si khuna-iti bulh lhesdulh. ꞋEt dahoontꞌoh huwa ꞌusja nuhzun? Ntsꞌenꞌa ꞌuhoontꞌoh sba hootázooꞌ? ꞋEt yaidlane dunalhodídulh de, whute ꞌutsꞌooꞌalh, tatsꞌootnaiꞌ, bunde yatsꞌitádlah ꞌet huwa. 33Nanoohtꞌah junih! Ntsiꞌne bubulh ꞌahtꞌen de, ꞌet de nohꞌeꞌutꞌen kꞌoh hoonzoo-un tsꞌiyawh nintaꞌtitꞌelh. 34Ndai la tsꞌihꞌun ꞌuntꞌoh-i, ꞌi doo cha za noheni tánadihꞌaih hukwa ꞌulhꞌen. Lubeshi ꞌulhꞌen-un ꞌetsul ꞌahneh! Whulohne ꞌawhuz Yakꞌusda ghun tsꞌihꞌun tꞌehonúszun. Yooya oohleꞌ ha ꞌunohdúsni.

Yaidlane dunahudutádulh de, dantꞌoh-i yustꞌe be whusanáhutidulh?

35ꞋEt whulohne nduhútni, “Ntsꞌenꞌa yaidlane dunáhudutádulh? Dantꞌoh-i yustꞌe be whusanáhutidalh?” 36Tube whuzahnih! Di la ꞌananla-i, dazsai de za, ꞌet whuz unꞌa za nahitátnalh. 37ꞋInkꞌez di whé ꞌílhꞌen ꞌaninle, ꞌet ndai tileh ha nányai de, ꞌet ꞌananla-i, ꞌi iloh ꞌuntꞌoh ꞌantsꞌi oomaiꞌ za ꞌuntꞌoh. 38ꞋEt hoontsꞌi Yakꞌusda ntsꞌenꞌa hukwaꞌ ninzun, ꞌet whuz unꞌa ꞌuyulhꞌih. ꞋInkꞌez ndi oomaiꞌ tsꞌiyawh lhelhdoh didowh ꞌi ꞌuntꞌoh. 39ꞋInkꞌez khuna-i tsung tsꞌiyawh ꞌaw lhkꞌunꞌa lheꞌítꞌoh. Dune tsung ꞌi ꞌuyoo ꞌuntꞌoh. Khuna-i tsung ꞌi cha ꞌuyoo ꞌuntꞌoh. ꞋEt lho tsung ꞌi cha ꞌuyoo ꞌuntꞌoh. ꞋEt dutꞌai tsung ꞌi cha ꞌuyoo ꞌuntꞌoh. 40ꞋEt yakꞌuz whutꞌenne buyustꞌe hoonli ꞌinkꞌez ndi yun kꞌut whutꞌenne, ꞌenne cha buyustꞌe hoonli. ꞋEt hoontsꞌi yakꞌuz whutꞌenne buyustꞌe hiyé diztiꞌ-i ꞌinkꞌez yun kꞌut whutꞌenne buyustꞌe hiyé diztiꞌ-i, lhelhyoo ꞌuntꞌoh. 41ꞋEt sa ꞌi cha be yé diztiꞌ-i hoonli. ꞋUlhdzis oozaꞌ ꞌi cha be yé diztiꞌ-i hoonli. Sum ꞌi cha be yé diztiꞌ-i hoonli. ꞋEt ndi sum tsꞌiyawh be yé diztiꞌ-i, ꞌi lhenyoo unli.

42ꞋEt yaidlane dunahudidil de, ꞌenne cha lhelhtsꞌun unꞌa ꞌuhintꞌoh. Buyustꞌe ꞌabahanla whe tilhjut whe ꞌuntꞌoh. ꞋEt dunahudidil de, ꞌaw buyustꞌe lhilhjut. 43ꞋEt buyustꞌe lhdítiꞌ whe ꞌahuyalhtih. ꞋEt hoontsꞌi diztiꞌ-i whe dunádutádulh. Tetsun whe ꞌahuyalhti, ꞌet hoontsꞌi ulhtus whe dunádutádulh. 44Yinka dune yustꞌe unli whe ꞌahuyalhti. ꞋEt dunahudutádulh de, ꞌet yakꞌuz huba ꞌuyoo buyustꞌe natidleh. ꞋEt ndi yun kꞌut uzdilhtsꞌi huba, neyustꞌe tsꞌutꞌi. ꞋEt yakꞌuz huba ꞌuyoo neyustꞌe natídleh.

45ꞋEt whuz unꞌa ꞌukꞌehóoguz whe ndutni, “ꞋEt ꞌudechoo dune Adam ꞌet oozul khuna suliꞌ.” ꞋEt ꞌudekꞌez-un Adam ꞌen gha neyughi khuna, ꞌet whuz unꞌa ꞌuneínla. 46ꞋEt hoontsꞌi neyustꞌe ꞌaw yakꞌuz huba lheꞌítꞌoh. Neyustꞌe ndi yun kꞌut whuchꞌeꞌ ꞌuntꞌoh. ꞋEt datsꞌuzsai hukwꞌelhꞌaz yakꞌuz huba ꞌuyoo neyustꞌe nádlih. 47ꞋEt Yakꞌusda ꞌudechoo dune ndi yun kꞌut whutlꞌus ꞌi dune yulhtsi. ꞋEt whulh nat-un dune, ꞌen neMoodihti, ꞌen yakꞌuz tsꞌe hainzut whe ꞌuntꞌoh. 48ꞋEt dune whutlꞌus be ꞌulya whutlꞌus be ꞌulyane, ꞌenne ꞌen kꞌunꞌa ꞌuhintꞌoh. ꞋEt whuz unꞌa ndun yakꞌuz tsꞌe haínzut-un, dantꞌoh-un unli, ꞌet yakꞌuz huba ꞌuntꞌohne, ꞌenne ꞌen kꞌunꞌa ꞌuhintꞌoh. 49ꞋEt ndun whutlꞌus be ꞌulya-un, ꞌet wheni cha ꞌen bundútsꞌúltꞌoh. ꞋEt whuz unꞌa ndun yakꞌuz tsꞌe hainzut-un, ꞌen dantꞌoh dune unli ꞌet whuz unꞌa wheni cha ꞌen bundutsꞌúltꞌoh ꞌuztileh.

Bé datsꞌutsah-i, ꞌi cha hooloh tileh

50ꞋEt sulhutsinke njan ꞌunóhdusni, Yakꞌusda whe lerwe unli-un, ꞌet yun kꞌut neyustꞌe ꞌi be iloh Yakꞌusda ndai yutꞌi-i ꞌaw tsꞌólhchoot ꞌaitꞌoh. Ndi yun kꞌut neyustꞌe tilhjut-i, ndai lhtilhjut-i, ꞌi be iloh tsꞌuhootálhchulh ꞌet huwa. 51ꞋEt soo zúlhtsꞌai. Ba whéꞌ hoontꞌoh hooyoh-i, ꞌi ghun nohbulh yátisduk. Whulohne ꞌaw ꞌilhiz nalhtsꞌuntistus, ꞌet hoontsꞌi tsꞌiyawh lhelhtsꞌun unꞌa naꞌuztitnelh. 52Tube khun ꞌuwhutánelh, ꞌantsꞌi tsꞌoonultsꞌilh hukwꞌunꞌa ꞌuwhutánelh. ꞋOh de de ꞌudekꞌez be tsꞌújun huyejih-i beꞌ distsꞌai de, ꞌet whuz unꞌa ꞌuwhutánelh. ꞋEt yaidlane, buyustꞌe ꞌaw lhilhjut whe dunáhudutádulh, ꞌinkꞌez wheni tsꞌiyawh lhelhtsꞌun unꞌa naꞌuztitnelh. 53ꞋEt ilhjut-i, ꞌi ꞌaw lhílhjut natidleh. ꞋInkꞌez ndi bé datsꞌutsah-i, ꞌi ꞌaw be dalhtsꞌutsa-i natidleh. 54ꞋEt nkede ilhjut-i, ꞌaw lhilhjut nasdliꞌ de, ꞌinkꞌez bé datsꞌutsah-i, ꞌi cha hooloh suliꞌ de, ꞌet ꞌoh whuya whudizulh de, ꞌukꞌehooguz-un tsꞌiyawh ꞌet lhaóodutanelh. ꞋEt njan ndutni, “Bé datsꞌutsah-i, oochꞌaꞌ ninde whe ꞌuntꞌoh.”

55ꞋEt huwa ꞌutsꞌutni, bé datsꞌutsah-i ꞌaw ꞌon ꞌat be datsꞌootsah ꞌaítꞌoh.

ꞋInkꞌez be datsꞌutsai-i,

ꞌaw oochꞌaꞌ ninde.

56Ndi bé datsꞌutsah-i, ꞌi lubeshi ꞌi gha ꞌuhooja. ꞋInkꞌez Moses ooghuni kꞌuz ninyuz-un, ꞌi be tꞌetsꞌonanzin lubeshi dáltus whe ꞌuntꞌoh. 57ꞋEt hoontsꞌi neMoodihti Jesus Christ, ꞌen gha Yakꞌusda whuchꞌa tsꞌulhdehne neulhtsi. ꞋEt huwa tube cho musi ꞌuzninzun.

58ꞋEt huwa sulhutsinke, ulhtusne oohleꞌ. Khun nahóohtnah junih! ꞋAhoolhyiz neMoodihti be ꞌutꞌen kꞌoh soo cho ꞌuwhulhꞌen. Tꞌeóonúhzun neMoodihti ba ꞌahtꞌen, ꞌaw ꞌantsꞌet iloh ꞌahtꞌen wheꞌ hoontꞌoh.

Currently Selected:

1 Corinthians 15: crx

Highlight

Copy