1 Corinthians 14
14
Bé nus hootꞌen-i, ꞌi ꞌukꞌenus ookaꞌ noohzin hubaꞌ hoontꞌoh
1ꞋEt ndi be nékꞌetsꞌinsiꞌ-i, ꞌi tsꞌunáhtꞌi. ꞋInkꞌez ndai la Ndoni negha íninla-i, ꞌi ookaꞌ noohzin. ꞋEt ndi be nus hootꞌen-i, ꞌi ꞌukꞌenus ookaꞌ noohzin hubaꞌ hoontꞌoh. 2ꞋEt mbe la lhelhyoo khuni be yalhduk-un, ꞌen Yakꞌusda tsꞌun yálhduk, ꞌaw dune tsꞌun yalhduk iloh whe ꞌutni, daja ni-un ꞌaw dune tꞌehonúszun ꞌet huwa. ꞋAntsꞌi buba wheꞌ hoontꞌoh hooyoh-un, duyughi gha yálhduk ꞌet huwa. 3ꞋEt hoontsꞌi buba nus hooꞌen-un, ꞌen dune tsꞌun yalhduk. ꞋEt ꞌon nus Yakꞌusda ba hilhtus ooleꞌ, budzi yo hoolhtus lheh, ꞌinkꞌez budzi do óotꞌeꞌ ha. 4ꞋEt lhelhtsꞌun unꞌa khuni be yalhduk-un, dichꞌoh ꞌon nus Yakꞌusda ba ulhtus naꞌdudulhtsi. ꞋEt hoontsꞌi ndun nus hooꞌen-un, ꞌen ndunne ꞌilhunaoodulhne ꞌon nus Yakꞌusda ba hilhtus hooleꞌ ꞌubulhtsi. 5Tsꞌiyawh unducha lhelhtsꞌun unꞌa khuni be yalhduk ꞌet hoontsꞌi nus hooꞌenne oohleꞌ ꞌet ꞌon nus nohba hukwaꞌ nuszun. Mbe la nus hooꞌen-un, ꞌen nohni nohba lhelhtsꞌun unꞌa yalhduk-un anus ncha whe ꞌuntꞌoh. Mbe la lhelhtsꞌun unꞌa khuni be yalhduk-un, ndet ꞌuwhúlhni ꞌaw tꞌetsꞌonuszun. ꞋEt daja ni tꞌeooniszin de, ꞌet de za tsꞌihꞌun unꞌa daja ni tꞌetsꞌontizeh. ꞋEt whe ꞌilhunaoodulhne Yakꞌusda ba hilhtus hútile.
Mbe lhelhtsꞌun unꞌa khuni be yalhduk-un, ꞌet ꞌuyoo khuni ye yátilhduk-i daja ni whe ꞌutni tꞌeinoozeh
6ꞋEt ꞌawet sulhutsinke nohghu nusya de lhelhtsꞌun unꞌa be yaduk-i be nohbulh yásduk de, ꞌet de ntsꞌenꞌa suba nohba hózooꞌ? ꞋEt hoontsꞌi ndai la nohba whe ꞌútni hooyoh-i, kꞌus be tꞌeóonudzun-i, kꞌus bé nus hootꞌen, kꞌus be whúnohtsꞌodulhꞌeh-i, ꞌet whuz unꞌa nohbulh yasduk de, ꞌaw ꞌet de za nohba hootázooꞌ. 7Ndai la nulhúkhusna-i ꞌantsꞌi ndai la oolaz dunulꞌai whe be tsꞌujun-i kꞌus ꞌultꞌo-i, ꞌi béꞌ distsꞌai ꞌinkꞌez ꞌilhoh kꞌunꞌa za dustsꞌo de, ꞌet ntsꞌenꞌa suba shun tꞌeznoozeh? 8ꞋInkꞌez be tsꞌujun huyejih-i ꞌutsꞌun unꞌa béꞌ distsꞌai de, ꞌet de ntsꞌenꞌa suba lhutiganne lhahádootneh eh? 9Nohni cha ꞌet whuz unꞌa za lhelhtsꞌun unꞌa yalhduk de, ꞌet ntsꞌenꞌa suba daja dahni-un tꞌetsꞌonoozeh? ꞋAntsꞌi tazai kꞌuz yalhduk leꞌ dutihnelh. 10ꞋEt lhat-un ndi yun kꞌut lhelhtsꞌun unꞌa khuni be yatsꞌulhduk. ꞋI tsꞌiyawh ꞌilho whe hoonli ꞌuwhúlhni. 11ꞋEt huwa daja ni ꞌaw tꞌeóonuzúszun de, ꞌet de mbe la lhelhtsꞌun unꞌa khuni be yalhduk-un, ꞌen lhelhdowh didowh-un sba le ꞌuntꞌoh ꞌinkꞌez si cha lhelhdowh didowh-un ooba léꞌustꞌoh. 12ꞋEt whuz unꞌa nohni ndai la Ndoni negha óoninꞌai-un soo cho ookaꞌ nahzun ꞌilhunaoodulhne hilhtus huboolhtsꞌelh ha. ꞋEt huwa ndet la Ndoni tsꞌun ꞌukꞌenus nohba hootázooꞌ-un, ꞌi soo tsꞌihꞌun ookaꞌ oohzin. ꞋEt whuz unꞌa oohtꞌeꞌ hubaꞌ hoontꞌoh.
13ꞋInka mbe lhelhtsꞌun unꞌa khuni be yalhduk-un, ꞌet ꞌuyoo khuni ye yátilhduk-i daja ni whe ꞌutni tꞌeinoozeh ꞌet huba soo cho tenadoodli. ꞋEt la daja ni-un tꞌehonoozeh. 14ꞋEt lhelhtsꞌun unꞌa khuni be tenadusdli de, ꞌet de sichꞌoh syughi ꞌi be tenadutisdli ꞌet huwa. ꞋEt hoontsꞌi sichꞌoh seni ba ꞌet ꞌantsꞌi whutále. 15Ntsꞌenꞌa ꞌukꞌenus neba hootázooꞌ? Diz unꞌa ꞌon nus sooꞌ hoontꞌoh, ꞌet sichꞌoh syughi cha ꞌinkꞌez sichꞌoh seni be cha tenadutisdli. ꞋEt sichꞌoh syughi cha ꞌinkꞌez sichꞌoh seni be shun be cha tisjun. 16ꞋEt nyunchꞌoh nyughi ꞌi be za khuni be yailhduk, ꞌet Yakꞌusda dílhtiꞌ whe yailhduk de, ꞌet whe ꞌilhoghun tꞌeoonuszunne butoh usda-un, ndi khuni diztiꞌ-i be yailhduk de, nyuditsꞌo de, ꞌet de ntsꞌenꞌa ndo honeh dooniꞌ, daja dini-un ꞌaw tꞌeoonuszun ꞌet huwa. 17ꞋEt ꞌalhaꞌ nghuni diztiꞌ-i, ꞌi tube únzoo. ꞋEt hoontsꞌi ndun tꞌelhonusze-un, ꞌet huwa Yakꞌusda ba ꞌaw ulhtus ooleꞌ ꞌaítꞌoh.
18Yakꞌusda musi dusni ndi lhelhtsꞌun unꞌa khuni be yalhduk-un si nohanus lhat-un whe lhelhtsꞌun unꞌa yasduk. 19ꞋEt hoontsꞌi ꞌilhunaoosdilne butoh, kwulaiꞌ khuni be hoontsꞌi nohbulh yátisduk de, ꞌet lhai cho lhelhyoo khuni be nohbulh yátisduk-un, ꞌet whanus hoonzoo. ꞋEt hukwaꞌ nuszun.
Lhelhyoo khuni be yaduk-i, ooba ꞌalhaꞌ lheꞌhóotꞌohne, ꞌenne za buba whe hoodalꞌen ꞌuntꞌoh
20Sulhutsinke noheni be tsꞌoodunne kꞌunꞌa oohtꞌeꞌ junih noheni be. ꞋEt chalhtsꞌul dahíntꞌoh la ꞌaw hoontsiꞌ-un tꞌehonuszun, ꞌet whuz unꞌa oohtꞌeꞌ. ꞋEt hoontsꞌi dune suliꞌ kꞌunꞌa nuní noohzut. 21ꞋEt Yakꞌusda ooghuni kꞌut ꞌukꞌu nuzguz ꞌet ndutni,
“Lhane lhelhyoo khuni be yalhduk,
ꞌinkꞌez dune ꞌatsꞌun keyoh whutꞌenne,
bughuni be Lizwifne bubulh yátisduk,
ꞌet hoontsꞌi ꞌaw sodótsꞌo hukwa lheꞌhunízun.”
22ꞋEt huwa ndi lhelhyoo khuni ꞌi be Lizwifne, ꞌenne buba whe hóodalꞌen. Mbene la ooba ꞌalha ꞌuhoontꞌohne ba lheꞌítꞌoh. Ooba ꞌalhaꞌ lheꞌhóotꞌohne, ꞌenne za buba ꞌuntꞌoh. ꞋEt hoontsꞌi dune Yakꞌusda buba nus hooꞌen-i, ꞌi be ooba ꞌalha ꞌuhoontꞌohne ba ꞌuntꞌoh, ooba ꞌalhaꞌ lheꞌhóotꞌohne, ꞌenne ba lheꞌyítꞌoh. 23ꞋEt huwa Yakꞌusda ba ꞌilhunaoodulhne, ꞌenne tsꞌiyawh ꞌilhoh ꞌilhunahootádulh de, ꞌinkꞌez tsꞌiyawh ꞌilhone whe lhelhyoo khuni be yahutilhduk de, ꞌet whuz unꞌa ꞌuhóoja whe whulhodulhꞌene kꞌus ooba ꞌalhaꞌ lheꞌhóotꞌohne, ꞌenne nohgho nindil ꞌinkꞌez nohzih hudilhtsꞌi de, ꞌet ꞌaw lakw nohni whusnine ꞌahli nohódutánelh eh? 24ꞋEt hoontsꞌi tsꞌiyawh Yakꞌusda be nus húhooꞌen de, ꞌinkꞌez ꞌilhoghun butoh whulhodulhꞌe-un kꞌus ꞌaw ooba ꞌalhaꞌ lheꞌhóotꞌoh-un nohghu ninya ꞌinkꞌez nohzih usda de, ꞌet ndunne nus hooꞌenne, ꞌenne bugha ndet whe nintaꞌutꞌih-un unli, ꞌet nahootáꞌalh. Uboozílhtsꞌai huwa tsꞌiyanne hiba nahizya. 25ꞋEt whe la dudzi yo whe yuntilhꞌi-i, ꞌi tsꞌiyanne nalhtsꞌet ha óotiltsꞌulh wheꞌ hoontꞌoh. ꞋEt huwa nachánitno, Yakꞌusda tsꞌun teniꞌ untilhdzilh, ꞌinkꞌez ꞌalhaꞌ Yakꞌusda nohtoh ꞌúntꞌoh dutinelh.
Yakꞌusda ba ꞌilhunaoohdulh de, ndiz unꞌa dutihnelh
26ꞋEt sulhutsinke, ꞌet whula gha tsꞌe, nkede la ꞌilhunaootáhdulh, ꞌoh de de, ꞋIlhoghun ꞌahli whe Ndoni nohgha whuninꞌai-un, whuz unꞌa oohtꞌen. ꞋEt ꞌilhoghun Yakꞌusda tsꞌun uztijun-un whutꞌi, kꞌus ꞌilhoghun whubodutilhꞌeh-un whutꞌi, kꞌus ꞌilhoghun ꞌuyoo khuni bé nohtoh yatilhduk-un whutꞌi, kꞌus ꞌilhoghun ndai la Yakꞌusda tsꞌun be hóodiltsih-un whutꞌi, kꞌus ꞌilhoghun ooghuni daja dutinelh-un whutꞌi. 27Mbe la ꞌuyoo khuni bé nohtoh yatilhduk de, yuba yatilhduk-un ꞌutꞌi de, ꞌet ndudóoniꞌ. ꞋEt nane kꞌus tane ꞌuyoo khuni be yatilhduk de, ꞌenne za ꞌudooniꞌ. ꞋIlhoghun hinli whe ꞌet ꞌuhudooniꞌ. 28ꞋEt hoontsꞌi yuba yatilhduk-un hooloh de, ꞌet de ꞌilhunaoosdilne butoh tꞌedoosnih. Didutchꞌoh dudzi yo whe ꞌinkꞌez Yakꞌusda tsꞌun yaoolhduk.
29ꞋEt mbe la nus hóoꞌenne nane kꞌus tane, ꞌenne za Yakꞌusda ooghuni be yahoolhduk. ꞋEt ndai la hiye yaílhduk-i, ꞌet ꞌonghohne, ꞌenne daja hutni-un, ꞌuyoonne buba tsꞌihꞌun unꞌa ꞌuntꞌoh tilah kꞌus ꞌatsꞌun unꞌa tilah ꞌuntꞌoh. 30ꞋInkꞌez butoh ꞌilhoghun hoonliyaz be nghun néwhultsꞌut, ꞌet howu yatilhduk de, ꞌet ꞌudechoo yatilhduk-un, ꞌen tꞌedoosnih. 31ꞋEt whuz unꞌa ꞌilhoghun ꞌahli whe nus hóohꞌen de, ꞌet de si tsꞌiyawh ꞌon nus soo tꞌewhunoohzeh, ꞌinkꞌez tsꞌiyawh buba nus whúnulhtꞌi whe bula oohtꞌen. 32ꞋInkꞌez dichꞌoh ooyughi ꞌi be nus hooꞌen, dichꞌoh za kꞌúneꞌ whulꞌen. 33ꞋEt Yakꞌusda ꞌen be nédzi dizghel-i ꞌen ootsꞌun ha yúkat. ꞋEt hoontsꞌi dune ye dulhyoh ꞌuhudutni-i, ꞌaw ꞌen ootsꞌu ha lheyuskat. ꞋEt whuz unꞌa ntsꞌoh tula Yakꞌusda oochꞌeꞌne ꞌilhunahodulh-un, ꞌet nedzi dizghel-i dizꞌai.
34ꞋEt ꞌilhunaoohdulh te, ꞌet nohtsꞌekoo ꞌenne tꞌehudoosni hubaꞌ hoontꞌoh. ꞋEnne yahutilhduk huba lheꞌhóotꞌoh, dune anyo ꞌuhintꞌoh ꞌet huwa. Moses be ꞌudustlꞌus kꞌut ꞌi cha ꞌet whuz unꞌa za ꞌet ndutni. 35ꞋEt tsꞌekoo hoonli hodutilꞌeh hukwaꞌ huninzun de, duyoh tsꞌe dukike ꞌenne hubuhoodolhkut. Yakꞌusda ba ꞌilhunaoodúlhne butoh, tsꞌeke yalhduk de, nohba hukwaya hoonli wheꞌ hoontꞌoh.
36Daja nuhzun, Yakꞌusda ooghuni nohni eh nohtsꞌun ha díltsꞌut? Kꞌus nohni za eh nohghudinkat? 37ꞋEt mbene la nus hooꞌen naꞌdunúdzunne kꞌus Ndoni hoonliyaz ꞌenne bugha íninꞌai, ꞌet whuz unꞌa dó ninzun de, ꞌet ndiz unꞌa cha ndunóozin, ndai ghun nohtsꞌo kꞌeꞌisguz-i, ꞌi Yakꞌusda khuni netlꞌa ídanꞌai-i, ꞌi za ꞌuntꞌoh. 38ꞋEt hoontsꞌi mbene la hoonli tꞌeóonínzun naꞌdunúdzunne, ꞌenne cha whute whuz unꞌa ꞌuhootꞌeꞌ.
39ꞋEt sulhutsinke nus hooꞌenne tihle soo cho hukwaꞌ noohzun, ꞌinkꞌez mbene la lhelhyoo khuni be yálhdukne, ꞌenne cha whuchꞌa bunáhyoot junih. 40Tsꞌiyawh hoonzoo hukwꞌunꞌa ꞌinkꞌez tsꞌihꞌun unꞌa ꞌuhótꞌeꞌ.
Currently Selected:
1 Corinthians 14: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
