1 Corinthians 11
11
1Ntsꞌenꞌa la Christ kꞌunꞌa ꞌustꞌoh, ꞌet nohni cha si skꞌunꞌa oohtꞌeꞌ.
Netsi kꞌeꞌuzbal-i whe tenazdudli huwun
2ꞋEt ꞌawet sulhutsinke njan ndudusni soo ꞌihtꞌen. Tsꞌiyantsuk whe snalhnih. ꞋEt whunohodusꞌeh-un tsꞌiyawh hoohtun.
3Njan tꞌewhuntihzin hukwaꞌ nuszun, Christ ꞌen za dunene tsꞌiyawh ando ꞌuntꞌoh. Dunene, ꞌenne za tsꞌekoo ando ꞌúhintꞌoh. ꞋInkꞌez Yakꞌusda ꞌen Christ ando ꞌuntꞌoh. 4ꞋEt mbe la dunene ootsi kꞌeꞌuzbal whe tenadudli ꞌinkꞌez kꞌus nus hooꞌen de, ꞌet de mbe la dunene ando ꞌuntꞌoh-un, ꞌen yooya yilhꞌi. 5ꞋEt mbe la tsꞌeke ootsi kꞌulheꞌibal whe tenadudli ꞌinkꞌez kꞌus nus hooꞌen de, ꞌet de mbe la tsꞌeke ando ꞌuntꞌoh-un, ꞌen yooya yilhꞌi. ꞋAntsꞌi ootsighaꞌ hooloh leꞌ titꞌelh ꞌet huwa. 6ꞋEt ꞌaw dutsi kꞌet tilhbal hukwa lheꞌnizun de, ꞌet dutsi nahinoozo. ꞋEt hoontsꞌi hukwaya unli ootsighaꞌ dune kꞌunꞌa ha nitꞌaz kꞌus ha nidzo de, ꞌet de dutsi kꞌeꞌoolhbal hubaꞌ hoontꞌoh. 7ꞋEt ꞌalhaꞌ dunene, ꞌenne Yakꞌusda kꞌeguz-i kꞌunꞌa ꞌuhintꞌoh, ꞌinkꞌez ye diztiꞌ-i kꞌunꞌa ꞌuhintꞌoh. ꞋEt huwa dutsi kꞌeꞌoolhbal ꞌaitꞌoh. ꞋEt tsꞌekoo ꞌenne dune ye diztiꞌne ꞌuhintꞌoh. 8Dune, ꞌen ꞌaw tsꞌeke tsꞌu ha lhizulh, ꞌet tsꞌeke ꞌen dune tsꞌu hainzut ꞌet huwa. 9ꞋInkꞌez Yakꞌusda dune ꞌaw tsꞌeke ba lheꞌyilel, ꞌet tsꞌeke ꞌen dune ba ꞌuyinla. 10ꞋEt huwa Lizasne, ꞌenne bula toh tsꞌe ndet la tsꞌekoo bubaꞌ hoonla-un ꞌi butsi kꞌeoobal hubaꞌ hoontꞌoh.
11ꞋInkꞌez neMoodihti oochꞌeꞌne ꞌutsꞌintꞌoh. ꞋEt huwa dunene, ꞌenne tsꞌekoo yit ꞌuhootꞌeꞌ ꞌaitꞌoh, ꞌinkꞌez tsꞌekoo cha ꞌenne dunene yit ꞌuhootꞌeꞌ ꞌaitꞌoh. 12ꞋEt tsꞌeke dune tsꞌu hainzut ꞌinkꞌez dune tsꞌeke gha whuzdliꞌ, ꞌinkꞌez tsꞌiyawh Yakꞌusda tsꞌu hainde-i, ꞌi ꞌuntꞌoh. 13Nohnichꞌoh tsꞌihꞌun unꞌa whe duba nahutihdeh. ꞋEt tsꞌekoo tenahududli de ꞌaw dutsi kꞌulhehilhbal de, ꞌet nohba tsꞌihꞌun ꞌuhoontꞌoh eh? ꞋEt nohba dahoontꞌoh? 14Njan ndet za whutsꞌodilꞌeꞌ ndi yun kꞌut? Soo cho whunulhꞌen, dune ootsighaꞌ dinyiz de, ꞌet ooba hukwaya hoonli wheꞌ hoontꞌoh. 15ꞋEt hoontsꞌi tsꞌeke ootsighaꞌ dinyiz de, ꞌet whe ꞌen ba hoonzoo, ootsighaꞌ dinyiz-un, ꞌet ooghá whuntꞌai ootsi kꞌeꞌuzbal leꞌ ootꞌeꞌ ha. 16ꞋEt mbe la njan whudulhyoh ꞌudutinelh hukwaꞌ ninzun de, ꞌet ndiz unꞌa za njan ndudusni, ꞌet ndiz unꞌa za nebaꞌ hoontꞌoh wheꞌ hoontꞌoh. Wheni cha ꞌinkꞌez yun kꞌut dune tsꞌiyawh mbene la Yakꞌusda unidulhne ꞌilhunahodulh totsuk.
NeMoodihti hulhgha naꞌutꞌalh-un huba
17ꞋEt ꞌawet ndi be bunohodusꞌeh-i ulhtus whe be nohbulh yasduk. Tsꞌiyawh ꞌilhunaoozahdil de, ꞌaw soo ꞌáhtꞌen lhduzusni. ꞋEt ꞌutsꞌun unꞌa ꞌahtꞌen nohdusni. 18ꞋUdechoo khuni dustsꞌo-i ndet la Yakꞌusda ba ꞌilhunaoohdulh totsuk, ndet la ꞌilhunaoohdulh te, ꞌet hoontsꞌi whulohne nohtoh lhdulhyoh ꞌudahni, ꞌet whulh ꞌúdustsꞌo. ꞋInkꞌez sba ꞌalhaꞌ ꞌutni. 19ꞋEt nohtoh lhelhtsꞌun unꞌa didohne hinli ꞌet whuz unꞌa ꞌet dó tanelh. ꞋEt whe la mbene nohtoh Yakꞌusda ba unzoone, ꞌenne tsꞌiyanne tꞌebuntizeh wheꞌ hoontꞌoh. 20ꞋEt huwa ndet la ꞌilhunaoozahdil whe ꞌet hulhgha neMoodihti naꞌutꞌalh-un huba, ꞌaw ꞌet huba iloh whusahdil. 21Lheꞌahja nohnichꞌoh ꞌonghohne butso hulhgha tꞌalh-i ahꞌal. ꞋEt huwa whulohne buye ꞌiltsꞌul ꞌinkꞌez whulohne cha tahanísnaiꞌ. 22ꞋAw yoh lhuwhahtꞌi ꞌutihꞌulh ꞌinkꞌez tatihtnelh whuba whe ꞌahtꞌen? Kꞌus ndi Yakꞌusda ba ꞌilhunaoohdulh te ꞌantsꞌi nohba hoonli eh? ꞋInkꞌez mbe la hoonliyaz lhitꞌih-un be yooya ubutilhtselh. Daja uncha nohdosniꞌ? Soo ꞌahtꞌen nohdusni eh? Gak! ꞋAw soo ꞌahtꞌen lhduzusni.
NeMoodihti whusanatidalh whutsꞌun, ndi lhes tsꞌooꞌalh ꞌinkꞌez ndi lubot be tsꞌootnaiꞌ, ꞌet whuz unꞌa neba dazsai-un oonaztilnih
23ꞋEt neMoodihti khuni stlꞌa danꞌai ꞌinkꞌez ꞌi nohtlꞌadisꞌai whe ndutni, neMoodihti Jesus Christ ꞌulhdzis daꞌ ndet daꞌ butlꞌa ihitilhtelh whutso, ꞌet lhes yilhchoot. 24ꞋUdechoo musi ni ꞌinkꞌez lhtsꞌe danyuz. ꞋEt ndubulhni, “Ndi lhes ulhchoot ꞌinkꞌez ꞌahꞌalh. Ndi syustꞌe ꞌuntꞌoh. ꞋI nohni nohba lhtsꞌehidanyuz. ꞋEt ndulhꞌen whe snalhnih.” 25ꞋInkꞌez ndi lubot ꞌet whuz unꞌa za ꞌuja. ꞋUhanꞌal hukwꞌelhꞌaz ubudaniꞌ, “Ndi lubot ꞌi ꞌandidi khuni nohba lhadúsdla-i ꞌuntꞌoh. Suzkaiꞌ gha nohba ꞌusdla. ꞋEt ꞌahnai totsuk, ꞌet ndahtꞌen whe snalhnih.” 26ꞋInka ndi lhes tihꞌulh ꞌinkꞌez ndi lubot tihnelh de, ꞌet ndutilhꞌelh totsuk, neMoodihti whusanatidalh whutsꞌun ꞌet za ndólhꞌen. ꞋEt ꞌi be neba dazsai-un whubuznoolhtun.
Jesus neba dazsai-un oonaztilnih whutso, naꞌuzdunoolꞌen, ꞌawhuz tilah lubeshi bulh ꞌutsꞌintꞌoh
27ꞋEt huwa mbe la ndi lhes yutiꞌulh ꞌinkꞌez neMoodihti oolubot yutitnelh whe hiba soo lheꞌhildzooꞌ whe huyilhchoot de, ꞌen neMoodihti ooyustꞌe ꞌinkꞌez buzkaiꞌ bulh ꞌi gha lubeshi ilhchoot. 28ꞋEt dune dichꞌoh naꞌdunulꞌen ꞌet hukwꞌelhꞌaz ndi lhes huyooꞌalh ꞌinkꞌez ndi lubot huyootnaiꞌ. 29ꞋEt mbe la yuba ꞌantsꞌi whe ndi yuꞌalh ꞌinkꞌez yutnaiꞌ de, ꞌet Yakꞌusda yuba nahutiyeh, ꞌet dichꞌoh khaná whuntꞌai. Dichꞌoh ꞌaw tsꞌihꞌun unꞌa whe neMoodihti ooyustꞌe ghun tꞌewhunúszun ꞌet huwa. 30ꞋEt huwa lhane nohtoh tehutsun suliꞌ, whulohne hunduda cha suliꞌ, ꞌinkꞌez lhane ꞌilhiz nahunistez.#11:30 Ndi nahunistez ni-un, ꞌet yahadla ni whe ꞌutni. 31ꞋEt tꞌenaꞌuzdunudzun whe whenichꞌoh naꞌuzdunilꞌen de, ꞌet de neMoodihti ꞌaw neba nahooyeh ꞌaitꞌoh. 32ꞋInkꞌez neMoodihti neba nahuyeh de, ꞌet neoolhtsas. ꞋEt whe ꞌaw ndi yun kꞌut whuduneꞌne bubulh neba nahoodeh ꞌaitꞌoh.
33ꞋEt huwa sulhutsinke, nkede la ꞌutihꞌulh huba ꞌilhunaoohdulh te, lhba sulhꞌi. 34Mbene la ooyeꞌiltsꞌulne duyoh ꞌet ꞌuhooꞌalh. ꞋEt whe la nkede la ꞌilhunaoohdulh de, ꞌaw nohba nahoodeh ꞌaitꞌoh. ꞋInkꞌez ꞌudun cha whunohodutisꞌeh-un ndet la nohtsꞌóozusya de, ꞌet tsꞌiyawh tsꞌihꞌun unꞌa nohba neootasꞌalh.
Currently Selected:
1 Corinthians 11: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
