1 Corinthians 12
12
Lhelhyoo neghankat-i ꞌet ꞌilhoghun Ndoni ꞌen za tsꞌiyawh negha yúle
1ꞋEt ꞌawet sulhutsinke dantꞌoh-i Ndoni negha yúꞌaih, ꞌi ghun ꞌet cha tꞌeóonóhzin nohba hukwaꞌ nuszun. 2Tꞌeóonúhzun ooba ꞌalha ꞌuhoontꞌohne lháhloh inleꞌ. Ndi yun kꞌut dalhtsiꞌ hukwꞌunꞌa, ꞌet ndi ꞌukꞌeltsi yalhúlhduk-i ookꞌoh tsꞌe ookꞌúneꞌ ꞌahtꞌen ínleꞌ. 3ꞋEt huwa noheni taóodutaltsꞌulh hukwaꞌ nuszun. ꞋAw ꞌilhoghun dune Yakꞌusda ooyughi gha Jesus Christ ꞌen untsiꞌ dooniꞌ ꞌaitꞌoh. ꞋAw ndúzdooniꞌ ꞌaítꞌoh wheꞌ hoontꞌoh. ꞋInkꞌez Ndoni ꞌen gha za tsꞌutni Jesus Christ ꞌen neMoodihti tsꞌilhꞌi.
4ꞋEt lhelhyoo neghankat-i ꞌet hoontsꞌi ꞌilhoghun za Ndoni ꞌen za tsꞌiyawh negha yúle. 5ꞋEt lhat-un whe neMoodihti ooba neꞌtsꞌutꞌen ꞌet hoontsꞌi ꞌilhoghun za neMoodihti ꞌuntꞌoh. 6Lhat-un whe Yakꞌusda ba ꞌutsꞌootꞌen hubaꞌ hoontꞌoh ꞌinkꞌez Yakꞌusda za tsꞌiyawh ye ꞌútꞌen lhaídulhꞌih.
7ꞋEt tsꞌiyawh ꞌilho whe Ndoni be hóodiltsih leꞌ hoontꞌoh whe wheni tsꞌiyawh neba hoonzoo ꞌulhꞌih. 8ꞋEt ꞌilhoghun dune, ꞌen Ndoni gha khuni be whunih-i, ꞌi yugha nínꞌai. ꞋEt ꞌuyoon dune cha whuz unꞌa za Ndoni ꞌen khuni be tꞌeoonudzun-i yugha óoninꞌai. 9ꞋEt ꞌuyoon cha Ndoni ꞌen be ꞌalha ꞌuhoontꞌoh-i yugha nínla ꞌinkꞌez doo cha ꞌuyoon, ꞌen cha Ndoni ꞌen ulhtus-i whe dune soo naꞌulhꞌen-un, ꞌet yugha óoninꞌai. 10ꞋEt ꞌuyoon ꞌen ulhtus-i be huwa ꞌítꞌen tunéꞌ titꞌen ꞌet yutlꞌa hónꞌai. ꞋEt ꞌuyoon buba nus hóoꞌen ꞌet yugha óoninꞌai. ꞋEt ꞌuyoon ꞌet nahootáꞌalh ntsꞌenꞌa la buyughi lhelhtsꞌun unꞌa ꞌuntꞌoh ꞌet yugha óoninꞌai. ꞋEt cha ꞌuyoon lhelhtsꞌun unꞌa yahatilhduk-un yutlꞌa hónꞌai. ꞋEt ꞌuyoon doo cha lhelhtsꞌun unꞌa yahalhduk-un, ꞌet tꞌewhuntázin ꞌet yutlꞌa hónꞌai. 11ꞋInkꞌez ndi nduntꞌoh-i tsꞌiyawh ꞌilho Ndoni za ntsꞌenꞌa la hukwaꞌ ninzun kꞌunꞌa, ꞌet whuz unꞌa buba lhkꞌé hónla. ꞋInkꞌez ndet la butaoonínla ꞌilho Ndoni ꞌen be za ꞌuwhutꞌen.
Christ ooyustꞌe lhai unli, ꞌet hoontsꞌi ꞌilho za unli
12Ndiz unꞌa njan dúhoontꞌoh, dune yustꞌe ꞌilho za unli. Neyustꞌe lhat-un wheni ꞌulya whe ꞌuntꞌoh, ꞌet hoontsꞌi ꞌilho za unli. Christ ꞌen cha ꞌet whuz unꞌa ꞌuntꞌoh. 13ꞋInkꞌez ꞌilho Ndoni ꞌen gha wheni tsꞌiyawh too beꞌ tsꞌulya whe ꞌilho yustꞌe tsꞌuzdliꞌ. ꞋEt Lizwifne tsinli, kꞌus ꞌudun yun kꞌut whutꞌenne tsinli, kꞌus ꞌulhnane tsinli, kꞌus oola naditnine tsinli, ntsꞌoh dantꞌohne tsinli hoontsꞌi ꞌilho Ndoni ꞌi gha tsꞌiyawh tsꞌitnaiꞌ neyulhtsi.
14Neyustꞌe ꞌilho za unli ꞌet hoontsꞌi lhat-un wheni ꞌulya whe ꞌuntꞌoh. 15Nulhꞌen dune ke ꞌi ꞌutni, “ꞋAw úla lhusdloh, ꞌet huwa yustꞌe oochꞌeꞌ lheꞌustꞌoh.” ꞋEt whuz unꞌa yalhduk de, ꞌet yustꞌe oochꞌeꞌ lhiloh eh? ꞋAwundooh! 16ꞋInkꞌez dune dzo ꞌi ꞌutni, “ꞋAw ꞌuna lhusdloh, ꞌet huwa yustꞌe oochꞌeꞌ lheꞌustꞌoh.” ꞋEt whuz unꞌa yalhduk de, ꞌet ꞌuyustꞌe oochꞌeꞌ lhiloh eh? ꞋAwundooh! 17ꞋEt dune yustꞌe tsꞌiyawh ꞌuna unli de, ꞌet de ntsꞌenꞌa suba hoonliyaz dótsꞌo? Kꞌus yustꞌe tsꞌiyawh ꞌudzo unli de, ꞌet de ntsꞌenꞌa suba hoonli ꞌoolhtsun? ꞋAw ꞌuhótꞌeꞌ ꞌaitꞌoh! 18ꞋEt ꞌinka Yakꞌusda neyustꞌe lhat-un wheni ꞌulya yulhtsi, ꞌet whuz unꞌa hukwaꞌ ninzun ꞌinka ꞌet ꞌúyinla. 19Ntsꞌenꞌa suba ꞌilho za ooleꞌ? ꞋEt ꞌúja de, ꞌet ntsꞌenꞌa suba yustꞌe ooleꞌ? ꞋAw ꞌuhótꞌeꞌ ꞌaitꞌoh! 20ꞋEt whe la ꞌuyustꞌe lhat-un wheni ꞌulya unli ꞌet hoontsꞌi ꞌilho za unli.
21ꞋInkꞌez ꞌuna ꞌula, “ꞋAw nkaꞌ nooszin ꞌaítꞌoh,” dooníꞌ ꞌaitꞌoh. ꞋInkꞌez cha ꞌutsi ꞌuke, “ꞋAw nkaꞌ nooszin ꞌaítꞌoh,” dooniꞌ ꞌaitꞌoh. 22ꞋEt kꞌus ndi ꞌuyustꞌe whuloh tube tetsun unli ꞌuzninzun ꞌet hoontsꞌi ꞌi ooyit ꞌaw ꞌutsꞌootꞌeꞌ ꞌaítꞌoh. 23ꞋInkꞌez ndi ꞌuyustꞌe whuloh ndai la ꞌaw lhdítiꞌ ꞌuzninzun, ꞌi ꞌuntꞌoh ꞌon nus unzoo ꞌinkꞌez sóo neꞌtsꞌoolhꞌen hubaꞌ hoontꞌoh. ꞋInkꞌez ndi ꞌuyustꞌe whuloh-i ndet la ꞌaw dune nalhtsꞌet huba lheꞌhóozooꞌ ꞌi ꞌukꞌenus sóo neꞌoolꞌen hubaꞌ hoontꞌoh. 24ꞋEt ꞌuyustꞌe soo otꞌen de, soo ꞌúntꞌoh. ꞋEt hoontsꞌi Yakꞌusda tsꞌiyawh lhkayánla. ꞋEt whe la ndai la ꞌuyustꞌe whuloh ootoh huyooloh-i, ꞌi ba ꞌon nus ooba idíztiꞌ kꞌunꞌa ꞌuyínla. 25ꞋEt diz unꞌa yustꞌe ꞌaw lhkꞌeookat ꞌaítꞌoh. ꞋEt hoontsꞌi ndai la yustꞌe whuloh tsꞌiyawh lhgha hudli. 26ꞋEt yustꞌe whuloh ꞌilho hoontsꞌi dzoh nuzut de, tsꞌiyawh ꞌalhgoh dzoh nudeh. ꞋEt ꞌilho yustꞌe ooloh hidílhtiꞌ de, tsꞌiyawh ꞌalhgoh lhba hóontꞌiꞌ.
27ꞋEt whuz unꞌa za nohni cha Christ ooyustꞌe ꞌahtꞌoh. ꞋIlhone ꞌahli whe ꞌi yustꞌe ooloh ꞌahtꞌoh. 28ꞋInkꞌez ꞌilhunaoodulhne butoh, Yakꞌusda ꞌutahábanla whe whélꞌaꞌne, ꞌenne ꞌudechoo nébuninla. ꞋEt nus hooꞌenne whulh nat-un nébuninla. ꞋEt dune hodulhꞌehne whulh tat-un nébuninla. ꞋEt ꞌon ꞌat-un huwa ꞌítꞌen túneꞌ ꞌutꞌenne nébuninla. ꞋEt ꞌon ꞌat-un dune soo naꞌyulhꞌenne nébuninla. ꞋEt ꞌon ꞌat-un ꞌuyoonne laꞌ ꞌutꞌenne nébuninla. ꞋEt ꞌon ꞌat-un dune moodihne nébuninla, ꞌinkꞌez whulohne lhelhtsꞌun unꞌa yahalhduk nébuninla. 29ꞋEt wheni tsꞌiyawh eh whélꞌaꞌne tsinli? Wheni tsꞌiyawh eh nus hooꞌenne tsinli? ꞋEt wheni tsꞌiyawh eh dune hodulhꞌehne tsinli? Wheni tsꞌiyawh eh huwa ꞌítꞌen túneꞌ ꞌuztitꞌelh? 30ꞋEt wheni tsꞌiyawh eh netlꞌa hóoltsꞌut dune soo náꞌtsꞌulhꞌen? Wheni tsꞌiyawh eh lhelhtsꞌun unꞌa yaztilhduk? Wheni tsꞌiyawh eh lhelhyoo khuni tꞌeznuzih netlꞌa hóoltsꞌut? ꞋAwundooh! 31ꞋEt ꞌukꞌenus ꞌuzooꞌ-i negha ntꞌai-i soo cho hukwaꞌ nuhzun, ꞌet hóontsꞌi ꞌon nus hoonzoo-un, ꞌet whunóhuntistun.
Currently Selected:
1 Corinthians 12: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.